Bible in duytsche (Delftse bijbel 1477)

§ Capittel .xv.

1

MOyses ende die kinder van israhel. songhen doe dese sanck den here: ende seiden. Singhen wij den here. Want hij is glorioselic gheeert: dat paert ende den opsitter warp hij neder in die zee.

2

Mijn starcheit ende mijn lof is die here: ende hij is mij ghemaket in salicheit. Dit is mijn god ende ic sellen eren mijns vaders god: ende ic sellen verheffen.

3

Die here is als een man een vechter. almachtich is sinen naem:

4

pharaonis waghenen. ende sijn heer warp hij auerecht in die zee. Sijn wtuercoren princen verdroncken in die rode zee

5

dat afgront ouerdectese: ende si soncken neder te gronde als een steen

6

Here dijn rechter hant is groet gheworden in starcheden: here dijn rechter hant versloech den viant:

7

ende in die menichte dijnre glorien so dedestu mine wedersaken of. Du sendeste dine gramscap. diese verteerde als stoppelen:

8

ende inden gheest dijns torens so vergaderden die wateren. Dat vloyende water stont: die afgronden worden vergadert int midden der zee.

9

Die viant seide. Ic salse nauolghen ende begripense: ende ic sal die rouen deilen: ende mijn ziel sal worden veruollet. Ic sal mijn swaert vter scheiden trecken: ende mijn hant salse doot slaen.

10

Dijn gheest blies. ende die zee ouerdectese: ende si worden verdroncken als loot in yseliken wateren

11

Here wie is dijn ghelijc onder die starken? Wie is dijn ghelijc groot in heylichede: vreselic ende te louen. ende wondere te doen?

12

Du stakeste wt dijn hant: ende die aerde verslantse.

13

In dijnre ontfarmherticheit waerstu leider: den volc dattu verlostes. Ende du droechste hem in dijnre starcheit: tot dijnre heyligher woninghe.

14

Dat volc quam op ende sij worden gram: rouwe behielden die ghene die woonden in philistiim.

15

Doe worden verstoert die princen van edom: die vrome van moab hadden anxte: ende alle die int lant van chanan woenden worden verstijft.

16

Anxt ende vrese moet op hem vallen: in die grootheit dijns arms. Si moeten worden onberuerlic als een steen tot dat dijn volc sal ouerleden wesen here: tot dat dese dijn volc sal wesen ouerleden dattu bezeten hebste.

17

Du salstese inleiden. ende planten inden berghe dijnre erfachticheit: in dijnre alre starcse woninghe dien du ghemaect hebste here. Dine sanctuarie here: dat dijn handen hebben vast

[p. *93]

ghemaect

18

Die here sal regneren ewelic ende vorder.

19

Want pharao trat ghereden in die zee mit sijne waghene ende sijn gheredene: ende die here bracht op hem die wateren der zee Mer die kinder van israhel ghinghen op droghe: in midden der zee.

20

Ende maria die prophetisse aarons suster. nam een tambure in haer hant: ende alle die wijuen ghinghen wt achter haer met tamburen ende mit reyen:

21

ende si sanc hem voer ende seide. Singhen wij den here. Want hi is glorioselijc gheeert: dat paert ende die opsitter warp hij neder in die zee.

22

Ende moyses bracht israhel vter roder zee: ende sij ghinghen wt inder wildernissen sur. Ende sij wanderden drie daghen doer die wildernissen: ende sij en vonden gheen water.

23

Ende si quamen in marath: ende si en mochten niet drincken die wateren van marath. om dat sij bitter waren. Ende daer bi gaf hi der stat enen naem die haer betaemde: ende hietse marath dat bediet bitterheit.

24

Ende dat volc murmureerde ieghen moysen ende seiden. Wat sullen wij drincken?

25

Ende moyses riep anden here. Ende die here toende hem een hout: ende doe hij dat int water ghedaen had. so wortet verkeert in sueticheit. Daer gaf hem die heer gheboden ende vonnissen: daer proefde hi hem ende seide

26

Ist dattu hoerste des heren dijns gods stemme. ende doestu dat gherecht is voir hem. ende bistu ghehoirsaem sinen gheboden. ende behuedestu alle sine gheboden: so en sal ic op di niet brenghen. alle die quellinghe die ic inden lande van egipten ghedaen heb. Want ic bin dijn here dijn ghesontmaker.

27

Daer na quamen die kinder van israhel in helim: daer waren twaelf fonteinen waters ende tseuentich palmbomeen: ende sloghen tenten neuen dat water