Bible in duytsche (Delftse bijbel 1477)

Ca .xiiij.

1

DIe heer sprac tot moysen ende seide.

2

Segt den kinderen van israhel. Si keren weder ende slaen tenten teghen phiairoth: die tusschen magdalum is ende die zee. teghen beelsephon. Ghi sult daer voer tenten setten op die zee.

3

Want pharao sal segghen. vanden kinderen van israhel. Si sijn becringelt int lant: ende inder wildernissen sijn si besloten.

4

Ende ic sal sijn hert verherden. ende hi sal v nauolgen ende ic sal worden glorificeert in pharaone: ende in alle sijn heer ende die van egipten sullen weten. dat ic die here bin: ende sij deden also.

5

Ende dier van egipten coninc wort gheboetscapt: dattet volc gheuloghen was. Ende pharaonis ende sijnre knapen hert vort verwandelt op dat volc: ende si seiden. Wat wouden wij doen: dat wi israhel lieten gaen dattet ons niet dienen en soude?

6

Daer om ghereide pharao sijn waghenen: ende nam al sijn volc mit hem.

7

Ende nam seshondert wtghecoren waghenen ende so wat van waghenen in egipten was: ende die maerscalcken van al sijnen here.

8

Ende die here verharde pharaonis herte des conincs van egipten: ende hi veruolghede die kinder van israhel. Mer sij waren daer wtghegaen in hogher hant.

9

Ende doe die van egipten volgheden der gheenre voetscappen die voer ghegaen waren: soe vonden sijse in haren tenten op die zee. Alle dat ghereden volc ende pharao mit al sijne waghenen. ende alle sijn here. waren in phiairoth teghen beelsephon.

10

Ende doe pharao ghenaket

[p. *91]

was. so hieuen die kinder van israhel haer oghen op ende saghen die van egipten na hem comen: ende si ontsagen hem zeer

11

Ende riepen totten here: ende seiden tot moysen. Machschien in egipten en waren gheen grauen. daer om hebstu ons daer wt gheleit om dat wij steruen souden inder wildernissen. Waer om woutstu dit doen: dattu ons leideste wt egipten?

12

En is dit niet dat wij seiden tot di in egipten. segghende: ganc van ons dat wij die van egipten dienen moghen? Want het is veel beter hem te dienen dan te steruen inder wildernissen.

13

Ende moyses seide toten volc. En wilt niet ontsien. Staet ende besiet des heren wonderen: dien hi huiden doen sal. Want die van egipten die ghi nu siet. en suldi voertmeer niet sien: tot inder ewicheit.

14

Die heer sal voer v vechten ende ghij sult swighen.

15

Ende die here seide tot moysen. Wat roepstu tot mij. Segt den kinderen van isrhel: dat si voert gaen.

16

Mer heffe du dijn ruede op ende steke dijn hant bouen die zee: ende scheidese. dat die kinder van israhel moghen gaen midden doer die zee al droge.

17

Want ic sal dier van egipten hart verherden dat si v sullen nauolghen: ende ic sal worden gheglorificeert in pharao. ende in alle sijn here. ende in sijn waghene ende in sine ghereden.

18

Ende die van egipten sullen weten dat ic die here bin: als ic geglorificeert sal wesen in pharao: ende in al sine waghene ende in sine gheredene.

19

Ende die enghel gods die voer die scaren van israhel ginc: hi dede hem wech ende ginc achter hem luiden: ende die columme vanden wolke mit hem ende lietse voer ende stont achter hem.

20

tusschen die tenten van israhel ende den tenten van egipten. Ende het was oec een doncker wolke. ende den nacht verlichtende: also dat die van egipten binnen al dier nacht niet ghesien en conden die een den anderen of toecomen

21

Ende doe moyses die hant bouen die zee wtghesteken hadde so dede die heer die zee wech gaen. met enen vreseliken barnenden wint die alle die nacht wayede: ende hi maectese droech. Ende dat water scheide hem:

22

ende die kinder van israhel ghinghen in midden doer die droeghe zee Want dat water was hem ter rechter hant ende ter luchter hant als een mure.

23

Ende die van egipten volgheden hem ende ghinghen achter hem in midden doer die zee ende alle pharaonis gheredene ende sijn waghene ende sijn paerden.

24

Ende te hant wast worden wake vanden morghenstonde: ende sich die here aensach mitter colummen des wolken ende des vuers op dier van egipten scaren: ende hi dode haer heer.

25

ende hi worp die wielen vanden waghenen om. ende si vielen neder inden gront. Ende die van egipten seiden. Laet ons vlien israhel: want die heer vicht teghen ons voer hem.

26

Ende die heer seide tot moysen Steec wt dijn hant bouen die zee so dat die wateren weder keren tot dien van egipten. op haer waghenen ende op haer gheredenen.

27

Ende doe moyses die hant wtghesteken had teghen die zee: so keerde si weder in die eerste dagheraet tot haren eersten stat. Ende doe die van egipten vloghen so quam hem dat

[p. *92]

water teghen: ende die here wenteldese int midden der vloeden:

28

ende dat water keerde: ende ouerdecte die waghenen ende die gheredene van al pharaonis heer. die israhel nauolgheden ende in die zee ghegaen waren: ende van hem luden en bleefter een niet ouer.

29

Mer die kinder van israhel. toghen doer die middewairt vander drogher zee: ende die wateren waren hem als een muyer. ter rechterziden ende ter luchterziden.

30

Ende in dien daghe verloste god israhel van dier van egipten hant:

31

ende sij saghen die van egipten dootlegghen op dat ouer vander zee: ende die grote hant die die here ghebesicht hadde teghen hem. Ende dat volc ontsach den here: ende si gheloefden den here ende moysen sinen knecht