Bible in duytsche (Delftse bijbel 1477)

§ Ca .xii

1

OEc seide die heer tot moysen ende aaron: int lant van egipten.

2

Dese maent sal v sijn dat beghinsel vanden maenden. Die eerste maent inden maenden vanden iaer.

3

Spreect seide die heer tot moysen ende aaron tot alle die vergaderinghe der kinderen van israhel: ende segt hem Die thiende dach van deser maent. soe sal ene yghelijc nemen een lam in sinen gheslachte ende sinen huse.

4

Mer is dat ghetal te cleine. soe datter niet ghenoech en is om een lam te eten: soe sullen sij nemen haer ghebuyren die neuen haer huys wonen: om dat ghetal vanden zielen dat ghenoech sijn mach om een lam te eten.

5

Want het sal wesen een lam sonder smette: ende een iarich mannekijn. Na deser seden sul di oec nemen een ionc bucke:

6

ende ghi seltet houden totten viertienden daghe van deser maent Ende dat sullen alle die menichte vanden kinderen van israhel doden des auonts:

[p. *87]

7

ende si sullen nemen vanden bloede. ende legghent op beide die posten: ende anden ouer dorpel vanden husen daer sijt in eten sullen.

8

Ende in dier nacht sullen sij dat vleysch eten ghebraden metten vuere: ende derue broot met velt latuwen.

9

Ghij en snlt vanden lam niet eten rauwe noch ghesoden mitten water: mer allene ghebraden mitten vuer Dat hoeft mitten voeten ende mitten inaderen suldijt verswelghen:

10

ende ghi en sult vanden lam niet laten bliuen tot smorghens. Ende ist datter yet ouer blijft. dat susldi metten vuer verbarnen.

11

Ende aldus suldi dat eten. Ghy sult uwe lendene toe gorden: ende gheschoeyte hebben an uwe voeten. ende houden stocken in v handen: ende ghi sult haestelic eten. Want het is phase: dat is des heren ouerliden.

12

Ende in dier nacht sal ic ouerliden doer dat lant van egipten: ende ic sal verslaen alle eerst gheboren van egipten. vanden mensche totten quicke: ende ic sal vonnissen doen in allen den goden van egipten ic die here.

13

Want dat bloet sal v wesen in een teiken inden huse daer ghi in wesen sult: ende ic sal dat bloet sien ende ic sal ouer v liden: ende in v luden en sal gheen plaghe wesen v verderuende. als ic dat lant van egipten slaen sal.

14

Desen dach suldi hebben in een ghedencken ende ghi sulten vieren feestelijc den here in uwen gheslachte. met eweliker oeffeninghe.

15

Ghi sult seuen daghen derf broot eten. In den eersten daghe en sal niet gheheffet broot sijn in uwen husen. Soe wie dat gheheffet broot eten sal. sijn ziel sal veruaren van israhel: van den eersten daghe totten seuenden daghe.

16

Die eerste dach sal heilich wesen ende feestelijc: ende den seuenden dach. suldi eeren met al sulker feesten In desen daghe en suldi niet werckes doon. al sonder dat eten toebehoert:

17

ende ghi sult behouden die derue brode In desen seluen daghe sal ic uwe here leide wt den lande van egipten: ende met eweliker oefeninghe suldi wachten desen dach in uwe gheslachten.

18

In die eerste maent inden viertienden daghe vander maent so suldi des auonts derf broot eten: totten eenen twintichsten dach van dier seluer maent totten auonde

19

Binnen seuen daghen en salmen niet gheheffet vinden in uwen husen Die gheheffet eten sal. sijn ziel sal verderuen vander menichte van israhel: also wel vanden toecomelinghen als den ingheboren des lants.

20

Ghi en sult gheen gheheffet eten. In alle uwe woninghe suldi derue broot eten.

21

Ende moyses riep alle die ouders der kinder van israhel: ende seide tot hem. Gaet ende neemt een beeste van uwen ghesinne: ende offert phase.

22

Ende dopet een bondekijn ysopen inden bloede dat anden dorpel is: ende bespreinghet daer mede den ouerdorpel ende beide die stilen. Niemant van v luden en gae vter doren van sinen huse. voer smorghens.

23

Want die heer sal ouerliden slaende die van egipten Ende als hi dat bloet sien sal anden ouerdorpel ende aen beide die stilen so sal hi ouerliden die dore vanden huyse: ende en laten die slagher niet in

[p. *88]

uwen husen. noch quetsen.

24

Wachte dit woert: wettelic di ende dinen kinderen tot in eweliken.

25

Ende als ghi in dat lant comen sult wesen dat v die heer v god gheuen sal. also hi beloeft heuet: so suldi dese oefeninghen doen ende houden

26

Ende als v uwe kinder sullen segghen. welc is dese religioen: so suldi hem segghen.

27

Het is die offerhande van ons heren ouerliden: doe hi bouen der kinder van israhels husen ouerleet in egipten: doe hi die van egipten sloech. ende hi onse husen verloste. Ende dat volc viel neder ende aenbede.

28

Ende die kinder van israhel ghinghen wt: ende deden also die heer gheboden had moysen ende aaron.

29

Ende het ghesciede int midden des nachts: dat die heer sloech int al lant van egipten alle die eerst gheboren: van pharaonis eerst gheboren soon die op sijn setel sat: tot eens gheuanghens wijfs eerst gheboren. die inden karker was: ende alle die eerst gheboren vanden vee.

30

Ende pharao stont op bij nachte ende alle sijn knapen. ende alle egipten ende het wort een groot gheroop in egipten. Want daer en was gheen huys daer en lach een dode in.

31

Ende pharao riep bi nachte moysen ende aaron. ende seide. Staet op: ende gaet wt van minen volc ghi ende v kinder van israhel. Gaet ende offert den heer uwen gode. also ghi segt

32

Vwe scapen ende uwe vee neemt met v: ende gaet wech also ghi eyschet. ende benedijt mij

33

Ende die van egipten dwonghen dat volc van israhel haestelijc wech te gaen wt den lande. ende seiden. Wij snllen alle steruen.

34

Hier om nam dat volc beslaghen meel eerment heffede: ende si bondent in mantelen ende leident op haer scouderen.

35

Ende die kinder van israhel deden. also moyses hem beuolen had: ende ontleenden die van egipten silueren ende gulde vaten ende menigherhande clederen.

36

Ende die heer gaf den volc gracie voer die van egipten dat sijse hem leenden: ende sij roefden die van egipten.

37

Ende die kinder van israhel sijn voert ghegaen van ramasse in sochot. bina ses hondert dusent mannen te voet: sonder die cleine kinderen ende die wiuen.

38

Ende oec ghinc mit hem op ontellic volc ghemenghet: ende seer veel scapen ende beesten ende vee. van menigherhande manieren.

39

ende si biecken dat meel dat si besleghen met hem wt egipten ghebracht hadden: ende sij maecten derf broot onder die assche ghebacken. Want si en haddent niet moghen heffen. om datse die van egipten dwonghen haestelic wt te gaen. ende en lietense niet letten: ende si en hadden niet moghen ghereiden enighe pot eten.

40

Ende die woninghe dat die kinder van israhel in egipten ghewoent hadden. was vier hondert iaer ende dertich

41

Ende doe die voldaen waren: soe ghinc op den seluen dach alle des heren heer vten lande van egipten.

42

Desen nacht is diemen sculdich is te houden den heer: doe hise vten lande van egipten leide. Dese sijn sculdich alle die kinder van israhel te houden. in haren gheslachten.

43

Ende die here seide tot moysen ende aaron. Dit is die religioen van phase Gheen vreemde en sal daer af eten.

44

Mer elken ghecochten

[p. *89]

knecht salmen besniden: ende also sal hijs eten.

45

Gheen toecomeling noch huerling en salder of eten

46

In een huys sal ment eten: ende ghi en sult vanden vleysh niet daer buten draghen: ende ghi en sult vanden benen niet breken.

47

Alle die vergaderinghe der kinderen van israhel. sullen dit doen

48

Ende wilder enich vremde comen tot uwer zeden ende doen des heren phase: so salmen eerst besniden alle haer manlicheit. ende dan soe sal hijt vieren alsmen pleghet: ende hi sal wesen als een ingheboren des lants. Mer so wie niet besneden en sal wesen: hi en salder niet af eten

49

Want het een wet sal sijn: den in gheboren: ende den lantwinre die onder v vreemde is

50

Ende alle die kinder van israhel deden also die here beuolen had moysen ende aaron:

51

ende in dien seluen daghe so leide die here der kinder van israhel bij haren scaren vten lande van egipten