Bible in duytsche (Delftse bijbel 1477)

§ Ca .xi

1

ENde die here seide tot moysen. Noch sal ic pharao ende egipten nopen mit eenre plaghen. Ende hier na sal hij v laten gaen ende sal v dwingen wt te gaen.

2

Daer om sulstu alle den volc segghen: dat elc man eyssche van sinen vrient ende elc wijf van haren buerinnen sulueren ende gulden vaten ende clederen.

3

Ende die heer sal sinen volc gracie gheuen voer dien van egipten. Want moyses was een harde groet man int lant van egipten. voer pharaonis knapen ende al dat volc.

4

Ende hi seide. Dit seit die here. Te middernacht sal ic comen in egipten.

5

Ende in dier van egipten lant sullen steruen alle eerstgheboren van pharaonis eerstgheboren die in sinen stoel sit tot des ioncwijfs eerstgheboren zoon die ter molen is: ende alle die eerstgheboren vanden beesten.

6

Ende in al tlant van egipten sal wesen grote rope: ia dat daer voer nie soe groot en was: noch daer na comen en sal.

7

Mer onder alle die kinder van israhel en sal enen hont niet grimmen. vanden menschen totten vee: om dat ghi weten sult met hoe groeten wonder die here sceiden sal die van egipten ende ysrahel.

8

Ende alle dese dine knechten sullen tot mij neder coemen: ende sullen mij bidden ende segghen. Ganc wt du: ende dijn volc ende al dat onder dij is. Hier na sullen wij wt gaen

9

Ende moyses ghinc wt van pharao. seer gram. Ende die heer seide tot moysen. Pharao en sal v niet horen: om datter vele teikenen sullen worden ghedaen int lant van egipten.

10

Ende moyses ende aaron deden alle die teikenen ende wonderen die ghescreuen sijn. voer pharao: ende die heer verherde pharaonis herte: ende hi en liet die kinder van israhel niet gaen wt sijnen lande