Bible in duytsche (Delftse bijbel 1477)

§ Capittel .x.

1

ENde die here seide tot moysen. Ganc in tot pharao. Want ic heb sijn hert verherdert. ende sijnre knapen herte om dat ic mijn teikenen in hem doen sal

2

ende om dattuse vertellen suls in dijnre kinder oren ende in dijnre neuen oren hoe menichweruen ic gheplaghet heb die van egipten ende mijn teykenen in hem ghedaen: ende oec dat ghi weten sult dat ic die here bin.

3

Hier om ghinghen moyses ende aaron in tot pharao: ende seyden hem. Dit seit die here der hebreuscher god Hoe lange toe. en wilstu mi niet onderdanich wesen? Laet mijn volc gaen: dattet mi sacrificie doe.

4

Wederstaestuut ende en wilstuut noch niet laten gaen: sich so sal ic morghen brengen op dinen lande spelthanen.

5

ende si sullen dat bouenste vanden lande bedecken. soe datmen daer niet of en sal mogen sien mer si sullen eten al dat vander haghel ouer bleuen is. Want si sullen alle hout doer knagen dat groyet inden ackeren:

6

ende si sullen veruollen dijn huysen. en dijnre knapen huysen. ende alle dier van egipten huysen: ia datter dijn vader noch dijn oudeuaders nye so vele en saghen. sint dat si gheboren waren opter aerden. tot in desen daghe. Ende hi keerde hem achterwaerts: ende ghinc wt van pharao.

7

Ende pharaonis knapen seiden tot hem. Hoe langhe sullen wi dese plaghen doghen? Laet dese luyden gaen. dat si den here haren god

[p. *85]

sacrificeren. En siestu niet dat egipten verdoruen is?

8

Ende si riepen tot pharao moysen ende aaron. Ende pharao seide hem Gaet: ende sacrificeert den here uwen god Wie sijn si die mit di gaen sullen?

9

Moises seide. Wi sullen gaen mit onsen ouders ende mit onsen cleinen kinderen: ende mit onsen zonen ende dochteren. mit onsen scapen ende onsen vee. Want het is des heren ons gods grote feeste.

10

Ende pharao antwoerde. Also moet die here mit v sijn. Hoe sal ic moghen laten gaen v ende uwe cleyne kinderen: wie mach twiuelen ghi en penset alte qualiken?

11

Ten sal also niet wesen: mer alleen gi mannen gaet ende sacrificeert den here. Want dat hebdi gheeysschet. Ende te hant worden si wtghesteken van pharaonis aensichte.

12

Ende die here seide tot moysen Steect wt dijn hant op tlant van egipten totten spelthanen: dat si daer opcomen ende eten alle dat cruyt dat ouer ghebleuen is vanden hagel.

13

Ende moyses stac wt die ruede op tlant van egipten: ende die here bracht voert een bornende wint alle den dach ende alle den nacht. Ende doet morghenstont gheworden was: soe hief die barnenden wint die spelthanen.

14

Ende si quamen op alle tlant van egipten: ende sij saten ouertallich in alle die terminen van egipten: ia dat alsulc voer die tijt niet en waren noch comen en sullen.

15

Ende si ouerdecten alle dat bouenste vanden lande: ende woesten alle dinc. Dus wort verteert alle dat cruyt vanden lande ende so wat dat van appelen inden bomen was dat die haghel ghelaten hadde. Want mit allen niet dat groeyende was bleef in thout. ende int cruyt. vanden lande: in al egipten.

16

Om dese sake. soe riep pharao haestelic moysen ende aaron ende seide hem. Ic heb ghesondicht tegen den here uwen god. ende teghen v.

17

Mer verlaet mi nv oec dese werf die sonde ende bid den here uwen god: dat hi desen doot van mi neme.

18

Ende moyses ghinck wt van pharaonis aensichte: ende hi bat den here.

19

Ende hi dede waeyen enen alten verseliken wint van westen: ende die begreep alle die spelthanen ende worpse in die rode zee In al tlant van egipten en bleeffer een niet.

20

Ende pharaonis hert wort verherdet: ende hi en liet die kinder van israhel niet gaen.

21

Ende die here seide tot moysen. Steeck op dijn hant inden hemel: ende het worden donckerheden op al tlant van egipten also dicke datmense tasten mach.

22

Ende moyses stac sijn hant op inden hemel ende in al tlant van egipten worden vreselike donckerheden.

23

Want in drie daghen en sach nyemant sinen broeder: noch en porrede hem vander stede daer hi in was Mer so waer die kinder van israhel waren: daer was tlich.

24

Ende pharao riep moysen ende aaron: ende seide hem. Gaet sacrificeert den here uwen god. Alleen sullen v vee ende uwe scapen hier bliuen: ende uwe cleine kinderen sullen mit v gaen.

25

Moyses seide. Du selste ons gheuen hostien ende holocausten: die wij offeren sullen den heer onsen god

26

Alle onse cudden sullen mit ons gaen Van dien en sal niet een claeuwe achter bliuen die noeturftich sijn inder oefeninghe ons heren gods: sonderlinghe

[p. *86]

om dat wij niet en weten watmen offeren sal: voer dat wi te dier stat comen sullen.

27

Ende die here verharde pharaonis hert: ende hi en woudse niet laten gaen

28

Ende pharao seide tot moysen. Ganc wech van mi: ende wachte di dattu niet meer mijn aensichte en sietste. In wat daghe dattu voer mi comes soe sulstu steruen.

29

Moyses antwoerde. Also du gesproken hebste so moet geschieu. Ic en sal dijn aensichte voertmeer niet sien.