Bible in duytsche (Delftse bijbel 1477)

Ca .v.

1

HIer na ghingen moyses ende aaron in: ende seiden pharaoni. Dit seit die here israhels god. Laet gaen mijn volc: dattet mi offerhande doe inder wildernissen.

2

Pharao antwoerdeWie is die here. dat ic sijn woert horen sal: ende israhel laten gaen? Ic en weet dien heer niet: ende ic en sal israhel niet laten gaen

3

Sij seiden. Die here der hebreuscher god heeft ons gheropen: dat wij gaen sullen inder wildernisse den wech van drie daghen: om dat wi den here onsen god sacrificie doen sullen: dat ons niet an en come sterfte of swaert.

4

Ende die coninc van egipten seide tot hem. Moyses ende aaron waer om trect ghi dat volc van sinen wercken? Gaet tot uwen lasten.

5

Ende pharao seide. vele is des volcs vanden lande. Ghi siet datter toegewassen is een grote scare: hoe veel te meer sullen si wassen of gi hem ruste gheuet vanden wercken?

6

Ende pharao gheboet in dien daghe den prouoesten vanden wercken: ende den genen die dat volc dwongen ende seide.

7

Gheens sins en suldi den volcke meer gheuen stro om die teghelen mede te backen also ghi te voren dedet. mer si gaen: ende vergaderen stoppelen:

8

ende ghi sult op hem legghen: die mate vanden teghelen die si te voren maecten: ende ghi en sult niet minderen. Want si sijn ledich: ende hier om ropen si. ende segghen. Gaen wi ende doen den here sacrificie onsen god.

9

Verladetse mit wercken. ende si voldoent: soe dat si hem an ghenen ydelen ende logenachtighen woerden en houden.

10

Hier om quamen wt die prouoesten vanden wercken ende die dwinghers tot den volc. ende seyden. Dit seit pharao. Ic en gheue v gheen

[p. *78]

stro.

11

Gaet vergadert die stoppelen of ghijse ergent vint: ende men sal niet minderen van uwen wercke.

12

Ende dat volck wort ghespreyt doer al dat lant van egipten: om stro te gaderen.

13

Ende die prouoesten vanden wercken. laghen hem an ende seiden. Voldoet alle daghe v werck: also gi pleghet te doen doemen v stro gaf

14

Ende die ghene die bouen die kinder van israhels wercken waren die worden gheslaghen: van pharaonis sarianten die hem seiden. Waer om en heb di niet voldaen die mate vanden teghelen: ghisteren noch huyden als ghi pleget?

15

Ende der kinder van israhels prouoesten quamen: ende riepen op pharao ende seiden. Waer om doetstu aldus teghen uwen dienstluyden?

16

Men en gheuet ons gheen stro: ende men ghebiet ons oeck die teghelen te maken. Sich dijn knechten worden gheslaghen: ende men doet onrechtelic tegen dijn volc.

17

Pharao seide. Ghi sijt ledich: ende daer om segdi. Gae wi ende sacrificeren den here.

18

Daer om gaet ende werct. Men sal v gheen stro gheuen: ende ghi sult gheuen ghetal vanden teghelen als ghi pleget.

19

Ende der kinder van israhels prouoesten saghen dat si waren int quade: om datmen hem seide. men sal alle dage niet minderen vanden teghelen.

20

Doe si wt quamen van pharao: so quamen si moyses ende aaron te ghemoet die teghen hem stonden:

21

ende seiden tot hem. Die here moet sien ende domen: want gi hebt voer pharao ende sinen knapen doen stincken onsen roke: ende ghi hebt hem ghegheuen een swaert om ons doot te slaen.

22

Ende moyses keerde weder totten here. ende seyde. Here: waer om hebdi dat volc gequellet? Waer om hebdi mi ghesent?

23

Want van dier tijt dat ic ghinc tot pharao om in dinen name te spreken. soe heeft hij dijn volc ghequellet: ende du en hebstese niet verlost.