Bible in duytsche (Delftse bijbel 1477)

§ Ca .iiij.

1

MOyses antwoerde: ende seide. Si

[p. *76]

en sullen mi niet gelouen: noch mine stemme horen: mer si sullen segghen die heer en heeft di niet gheopenbaert

2

Daer om seide die here tot hem Wat ist dattu in dijn hant houdes? Hi antwoerde. Een ruede.

3

Ende die here seyde hem Werpse op die aerde Ende hi worpse. Ende si verwandelde in een slanghe: so dat moyses vloech.

4

Ende die here seide hem Steec wt dijn hant: ende begrijp haer stert. Hi stac sijn hant wt. ende hieltse: ende si verwandelde weder in een ruede.

5

Om dat si ghelouen sullen sprac die here dat di die here gheopenbaert heuet dijnre vadere god: abrahams god. ende ysaacs god. ende iacobs god.

6

Ende die here seide echter. Steect dijn hand in dijn bosem. Hi toechse inden bosem. Ende doe hijse inden bosem getoghen hadde: so brocht hijse wt al lasers ghelijc den snee.

7

Ende die here seide trect weder dijn hant in dijn bosem Hi toechse weder inden bosem. ende brochtse weder voert: ende si was ghelijc den anderen vleysche.

8

Ende die here seide of si di niet en ghelouen. noch en horen dat woert vanden eersten teiken: so sullen si ghelouen den woerde vanden anderen teyken.

9

Of si oec dese twe teykenen niet en ghelouen. noch en horen dijn stemme: so neem water van der riuiere ende stort dat opt dat droghe lant: ende wat dattu sceppen suls vter riuieren. dat sal worden verkeert in bluede.

10

Ende moyses seide. Here ic bidde want ic en bin niet wel sprekende van ghisteren ende van eer ghisteren ende van dier tijt dattu gesproken hebste tot dinen knecht: so bin ic tragher van tonghe

11

Ende die here seide hem. Wie heeft des menschen mont ghemaect? Ende wie heeft ghemaect den stommen. den douen. den sienden. ende den blinden Ende dede ic dat niet?

12

Daer om tide wech ende ic sal mitti sijn in dijn mont ende ic sal di leren wattu spreken suls.

13

Ende moyses seide: ic bidde here: sende die du senden suls.

14

Ende die here wort vergramt teghen moyses ende seyde. Aaron die leuijt. dijn broeder. ick weet dat hi welsprekende is. Sich hi sal wt comen dij te ghemoet: ende als hi dij sien sal so sal hi verbliden van herten

15

Spreect tot hem. ende legt mijn woerden in sinen mont: ende ic sal in dinen mont sijn ende in sinen mont: ende ic sal v tonen dat ghi doen sult.

16

Hi sal voer di spreken totten volke: ende hi sal sijn dijn mont: mer du suls wesen in dien dat gode toebehoert.

17

Nemet oec die ruede in dijn hant: daer du die teykenen in doen suls.

18

Ende moyses ghinck wech ende keerde weder tot iethro sinen zwagher. Ende seide hem. Ick sal gaen ende keren weder tot minen broederen in egipten: dat ic besien mach of si noch leuen. Ende iethro seide hem. Gaet in vreden

19

Doe seide die here tot moysen in tlant van madian. Ganc ende keer weder in egipten. Want si sijn alle doot die dine ziele sochten.

20

Daer om nam moyses sijn wijf ende sijn zonen. ende settese op den ezel: ende hi keerde weder in egipten waert: ende droech gods ruede in sijn hant.

21

Ende die here seide hem doe hij keerde te egipten waert. Besich: dattu

[p. *77]

alle die teykenen die ic in di geset hebbe doetse voer pharao. Ic sal sijn hart verherden: ende hi en salt volc niet laten gaen.

22

Ende dit sulstu tot hem segghen. Dit seit die here Israhel is mijn eerstgheboren zoon.

23

Ic heb di gheseit. Laet gaen mijn zoon dat hi mi diene: ende du en wilstes niet laten gaen. Sich ic sal dijn eerstgeboren zoon dootslaen.

24

Ende doe moyses inden weghe was inden ghemeen huys. soe quam hem dije here tegen: ende wilden dootslaen.

25

Ende sephora nam haestelic enen alte scarpen steen. ende si besneet haer zoons ouersloef Ende dat bluet gheroerde sijn voeten ende si seide. Du biste mi een bruydegom des bluets

26

Ende si lieten gaen na dien dat si gheseit had. du biste mi een bruydegom des bluets: om die besnidinghe.

27

Ende die here seide tot aaron. Ganc moysen dinen broeder te ghemoete inder wildernissen. Ende aaron ghinc hem teghemoete tot gods berghe: ende hi custen

28

Ende moyses vertelde aaron al des heren woerden. daer hi hem om ghesent had: ende die teykenen die hi hem beuolen had.

29

Ende si quamen te gader: ende vergaderden alle die ouders. der kinder van israhel

30

Ende aaron seide alle die woerden die die here tot moysen gheseit had: ende hi dede die teykenen voerden volc:

31

ende dat volc gheloefdes. Ende si ghehoerden dat die here den kinderen van israhel gheuisiteert hadde. ende dat die here haer vernoy aen ghesien hadde: ende sij aenbaden langhes op die aerde