Bible in duytsche (Delftse bijbel 1477)

Capittel .xlix.

1-2

IAcob riep sijn zonen: ende seide hem Wordet vergadert iacobs zonen ende hoert israhel uwen vader. Wort vergadert: dat ic v boetscappen mach wat v te gheschien is inden vtersten daghen

[p. *70]

3

Ruben mijn eerstgheboren zoon. Du biste mijn starcheit: ende dat beginsel van mijnre droefheit. Eerst in giften: meest in geboden.

4

Du worts wt gestort als water. Du en moets niet wassen: want du biste ghegaen op dijns vaders bedde: ende du besmettest sijn coetse.

5

Symeon ende leni broeders: vechtende vaeten der quaetheit.

6

Mijn ziel en moet niet comen in haren rade. ende mijn glorie en moet niet wesen in haere vergaderinge want in haren toorne so dode si die manne: ende in haren wille so ondergrouen si die muere.

7

Vermaledijt si haer toerne. want hi is gheduerich ende onwaerdich want si is hert. Ic salse deylen in iacob: ende ic salse stroyen in israhel.

8

Iudas: di sullen dijn broders louen Dijn handen sullen wesen in dijnre vianden necken: ende dijns vaders zonen sullen di aenbeden

9

Iudas du biste eens leuwen ionc. Sone mijn du gincste opten roef: du laghes rustende als een leeu: ende als een leuinne. Wie sullen wecken?

10

Die coninclike ruede en sal van iuda niet genomen worden. noch hertoghe van sijnre dye: voer dat hi comen sal diemen senden sal: ende hi sal sijn ontbeidinc der luyden

11

Bindende anden wijngaert sijn voelen: ende anden wijnstoc o sone mijn sijn ezelinne. Hi sal sijn stole dwaen in den wijn: ende sinen mantel int bluet der druuen

12

Sijn oghen sijn schoenre dan wijn: ende sijn tanden sijn witter dan melck

13

Zabulon sal wonen anden ouer vander zee: ende in stede daer die scepen staen ghereikende tot sydonen.

14

Ysachar is een starc ezel: leggende tusschen der terminen.

15

Hi sach die ruste dat si guet was ende dat lant dattet alte guet was ende hij leider sijn scouderen onder om te dragen: ende hi is gheworden dienende den exsisen

16

Dan sal sijn volc vonnissen: als een ander gegheslacht in israhel

17

Dan. moet worden een slanghe inden wech ende een cerastes inden pade: bitende des paerts houen dat die opsitter vallet achter waert.

18

Dijn salicheit sal ick ontbeiden here.

19

Gad toeghehoert sal voer hem vechten ende hi sal achterwaert toegegort worden

20

Aser. sijn broot is vet: ende het sal den coninghen weelden gheuen.

21

Neptalim is een wtghesent hart: ende gheuende spraec der schoenheit.

22

Een toewassende zoon is ioseph: een toewassende zoen ende schoon van aensichte.

23

Die dochteren liepen op al die mueren: mer si veronwaerden hem. ende streden: ende si beniden hem ende hadden ghescutten.

24

Mer inden sterke was sijn boghe: ende die banden van sinen handen ende arme worden ontbonden. biden handen des machtigen van iacob. Van daen is hi herder. wtgegaen steen van israhel.

25

Dijn vaders god sal dijn hulper wesen: ende die almachtighe sal di ghebenedien mitter benedictien des hemels van bouen. ende mitter benedictien des afgronts die beneden leit mitter benedictien der borsten ende der vrouwen wijflicheit.

26

Dijns vaders benedictien. sijn vastgheworden mitter benedictien sijnre vaderen tot dat quam die begeerte der eweliker bergen Si moeten worden op iosephs hooft inden top des nazareus: onder sijn broeders.

27

Benyamin sal wesen een gripen-

[p. *71]

de wolf: des morghens sal hi eten die proeye: ende des auonts sal hi die roue deylen.

28

Ende alle dese waren inden gheslachten van israhel twaelf. Dit sprac hem haer vader toe: ende hi ghebenedide elken mit proper benedictien

29

ende hi gheboet hem ende seide. Ic worde vergadert tot minen volke. Begrauet mi mit minen vaderen in die dubbelde spelunc. die in ephron van ethei acker is.

30

tegen mambre in tlant van chanaan: die abraham cofte mitten acker van ephron van etheo in besittinghe des graues.

31

Dair grouen si hem: ende saram sijn wijf Ende daer is begrauen ysaac: mit rebecca sijn wijf. Ende daer leyt lya begrauen.

32

Doe hi die gheboden gheeyndet hadde. daer hi sijn zonen mede leerde. so vergaderde hi sijn voeten opt bedde ende hi sterf ende wort tot sijn volc gheleyt.