Bible in duytsche (Delftse bijbel 1477)

Ca .L.

1

ALs dat ioseph sach. so viel hi op sijns vaders aensichte. ende custen wenende:

2

ende hi hete den medicijnres sijn knapen: dat si sinen vader balsamen souden mit duerbaren cruyde. Ende si deden dat hem beuolen was:

3

ende hielden hem daer na veertich dagen. Want dat was die zede vanden balsaemden lichamen. Ende al egipten beweenden tseuentich daghen.

4

Ende doe die tijt des geween van iacob gedaen was: so sprac ioseph tot pharaonis ghesinne. Of ick gracie gheuonden heb in uwen aenscouwen. soe spreket in pharaonis oren.

5

om dat my mijn vader besworen heeft. segghende. Sich ic sterue: du sulste mij begrauen in minen graue dat ic mi gegrauen heb in tlant van chanaan. Hier om sal ic op gaen ende begrauen minen vader: ende ic sal weder keren.

6

Ende pharao seide hem Ganc op ende begraue dinen vader: alsoe du besworen bist.

7

Ende doe ioseph op ghinc. so ghinghen mit hem alle die ouders van pharaonis huyse. ende alle die meeste van gheboerten vanden lande van egipten:

8

iosephs huys mit sijn broeders sonder haer cleyne kinderen. ende haer cudden ende haer vee: dat si lieten in tlant van gessen.

9

Ende ioseph had in sijn geselscap waghenen geredenen ende het wort een scare niet cleine:

10

ende si quamen totten pleine arad. dat ouer die iordane leyt: ende daer deden si die wtuaert mit groten anxtelike ghewene. ende voldeden seuen dagen

11

Doe dat ghesien hadden die woenden in tlant van chanaan: so seiden si. Dit is een groet ghewene dier van egipten. Ende hier om heten si den naem van dier stat. gheween van egipten.

12

Dus deden iacobs zonen also hem iacob haer vader beuolen had:

13

ende droeghen hem in tlant van chanaan. ende groeuen hem in die dubbelde spelunc: dien abraham mitten acker ghecoft had in besittinghe des graues van ephron van etheo: tegen dat aensichte van mambre.

14

Ende ioseph keerde weder in egipten mit sinen broedren ende mit alle sijn gheselscap: doe hi sinen vader begrauen had.

15

Ende doe die vader doot was. soe ontsaghen hem sijn broeders ende spraken onderlinge. dat hi machschien niet en verdencke des onrechts dat hi ghedoget heuet. ende dat hi ons gelde alle dat quaet dat wi hem deden

16

daer om ontboden si hem Dijn vader beual ons eer hi sterf:

17

dat wi di dit seg-

[p. *72]

ghen souden wt sinen woerden. Ic bid dattu verghetes die misdaet van dinen broederen: ende der sonden ende der quaetheit die si tegen di deden. Ende wi bidden oec: dattu godes knecht dinen vader verlaetste dese quaetheit die sij teghen di deden. Doe dit ioseph hoerde so weende hi:

18

ende sijn broeders quamen tot hem. ende si aenbeden hem langhes opter aerden ende seiden hem Wij sijn dijn knechten

19

Ende hi antwoerde En wilt niet ontsien. Mogen wi gods wille wederstaen?

20

Ghi pensde quaet van mi. mer god verkeerde dat in guet om dat hi mi verheffen soude als ghij mij siet ende dat hi vele volken behouden maken soude.

21

En wilt niet ontsien Ic sal v voeden: ende uwe cleine kinderen. Ende hi vertroestese ende sprac guedertierlike ende sachtmoedelic:

22

ende hi woende in egipten mit alle sijns vaders huys. Ende hij leefde hondert iaer ende thien. ende hij sach effrayms zonen totten dorden geslachte. Ende op iosephs knien worden oec gheboren. machirs zonen die manasses zone was.

23

Als dese dinghen gheleden waren: so sprac hi tot sinen broederen. Na mijnre doot so sal v god visiteren: ende hi sal v doen op gaen van desen lande. ten landewaert daer hi op ghesworen heeft abaraham. ysaac. ende iacob.

24

Ende doe hijse besworen had ende geseit god sal v visiteren. draget mit v wech mijn beenre van deser stat:

25

so sterf hi. doe hi volgedaen had hondert ende tien iaer sijns leuens ende gebalsaemt mit cruyde. so leidmen in een graft besijden in egipten.

§ Hier eyndt genesis.