Bible in duytsche (Delftse bijbel 1477)

Capittel .xlvij.

1

IOseph ginc in tot pharao ende boetscapte hem ende seide. Mijn vader ende mijn broeders. hare scapen ende haer vee. ende al dat si besitten. sijn comen vanden lande van chanaan: ende siet sij sijn in tlant van gessen.

2

Ende ioseph brochte mit hem voerden coninc vijf mannen die achterste van sinen broeders.

3

Ende die coninc vraechde hem Wat heb gi van werck? Si antwoerden. Wi sijn dijn knechten ende herden van scapen: ende wi ende onse vaders.

4

sijn gecomen om te peregrineren in dijn lant: ouermits den hongher die meerret. so en is daer gheen cruyt tot dijnre knechten cudden in tlant van chanaan Ende wi bidden dattu ons gebiedes te wesen dijn knechten in tlant van gessen.

5

Ende aldus seide die coninc tot ioseph. Dijn vader ende dijn broeders sijn gecomen tot di Dat tlant van egipten is in dijnre aenscouwen:

6

int beste lant duetse wonen: ende leuert hem dat land van gessen. Ende weetstu dat onder hem sijn naerstige mannen maketse meesters van minen vee.

7

Hier na so leide ioseph sinen vader totten coninc in: ende hi setten voer den coninck.

8

Ende doe iacob den coninc gebenedijt had: ende hem die coninc vraechde. hoe veel sijn die daghen vanden iaren dijns leuens:

9

so antwoerde iacob. Die dage der pelgrimagie mijns leuens sijn hondert ende dortich iaer. cleyn ende quaet: ende si en sijn noch niet ghecomen tot mijnre vader daghen inden welken sij pelgrimagie hebben ghedaen.

10

Ende hi gebenedide den coninc. ende ghinc wt

11

Ende ioseph gaf sinen vader ende sinen broederen besitting in egipten in die beste stat vanden lande ramesses. also pharao geboden hadde:

12

ende hi voedese. ende al sijns vaders huys. ende gaf elken spisen.

13

Want in alle die werlt so gebrac broot ende die hongher had tlant verdoruen: ende sonderlinghe egipten ende chanaan

14

Wt welken landen ioseph alle dat gelt vergaderde mitten coorne te vercopen ende hi brochtet in des conincs tresore.

15

Ende doe den coepluden dat ghelt ghebrack: so quamen alle egipten tot ioseph ende seiden. Gif ons broot. Waer om steruen wi voer v. als ons ghelt gebrect?

16

Hi antwoerde hem. Brenct uwe vee: ende ic sal v spisen daer voer geuen: ist dat ghi gheen ghelt en hebt.

17

Ende doe sij haer vee brachten so gaf hi hem spisen om paerden ende scapen ossen ende om ezelen: ende hi voedese dat iaer om die wisselinghe vanden vee.

18

Ende si quamen ten anderen iaer ende seiden hem. Wi en

[p. *68]

hebbeu onsen here niet te helen dat ons ghelt. ende vee te gader ghebreken: ende di en si niet verholen: dat wi niet en hebben sonder dat lant ende die lichamen.

19

Waer bi sullen wi dan steruen. dattuut sien suls? Ende wi ende onse lant sullen dijn wesen. Coept ons in des conincs dienst. ende ghif saet: dattet lant niet woeste en worde. ist dat die aerdwinre verderue.

20

Dus cofte ioseph al dat lant van egipten: want elc vercocht sijn besittinghe om die groetheit vanden hongher: ende hi dedet al onder pharao

21

ende alle sijn volc. vanden achterster terminen van egipten totten buytensten eynden

22

sonder des papen lant dat hem ghegeuen was vanden coninc. Want die gafmen ordineerde spisen vten scueren openbaer: ende hier bi so en waren si niet sculdich te vercopen haer besittinghe

23

Daer om seide ioseph totten volken. Siet also ghi siet so besit pharao beyde v ende v lant. Neemt saet ende saeyt die ackers: dat gi vrucht hebben moget

24

Dat vijfte deel sal ghi den coninc gheuen: die ander vier deel laet ic v te spise uwen knapen ende uwen kinderen.

25

Sij antwoerden. Onse saliheit is in uwer hant Onse here aenscouwe ons allene ende wi sullen blidelic den coninc dienen

26

Van dier tijt tot in desen dage so gelt men in al dat lant van egipten den coninc dat vijfte deel: ende het is gheworden als een wet. sonder dat papelike lant: dat vry was van deser condicien.

27

Dus woende israhel in egipten. dat is in tlant van gessen ende besat dat: ende wies ende wort seer ghemenichfoudicht:

28

ende hi leefde daer in seuentien iaer Ende alle die dagen sijns leuens worden ghemaect hondert iaer ende seuen ende veertich

29

Ende doe hi sach dat die dach sijns doots naecte. so riep hi ioseph sinen zoon: ende seide tot hem Of ic gracie geuonde heb in dinen aenscouwen so legt dijn hant onder mijn dye. ende du suls mi doen ontfermherticheit ende waerheit: dattu mi niet en begraues in egipten.

30

Mer dat ick slapen mach mit mijn vaders: ende voert mi wech wt desen lande. ende begrauet mi in mijnre meere graft. Ioseph antwoerde. Ic sal doen dattu mi beuolen hebste.

31

Iacob seide so sweret mi dan. Doet ioseph swoer: so keerde hem israhel ten hoefde vanden bedde: ende aenbede gode.