Bible in duytsche (Delftse bijbel 1477)

Ca .xlvi

1

ENde israhel toech wech mit al dien dat hi had. ende quam ten putte des eedts: ende doe hi daer offerhanden ghedodet had ysaacs sijns vaders god.

2

so hoerde hi bi visioen des nachts dat god hem: riep ende seide hem. Iacob iacob. Hi antwoerde. Siet ic bin hier

3

God seide hem. Ic bin die starcste god dijns vaders. En wilt niet ontsien mer ganc neder in egipten: want ic sal dy daer maken in groet volc.

4

Ic sal mitti darwaert neder gaen: ende ic sal di weder brenghen als du van daen wederkeerste. Ende ioseph sal oec sijn hant op dijn

[p. *66]

oghen legghen.

5

Daer om stont iacob vroech op vanden put des eedts: ende sijn zonen voerden hem mitten cleynen kinderen ende mitten wiuen. inden wagenen die pharao gesent had om den ouden man te draghen:

6

ende al dat hi beseten had in tlant van chanaan. Ende hi quam in egipten mit sinen zade al:

7

sijn zonen ende neuen: dochteren ende altemael dat gheslachte.

8

Dit sijn der kinder van israhels namen: die in egipten quamen: hi mit sinen kinderen. Die eerst gheboren was ruben.

9

Rubens zonen waren: enoch ende phallu. esrom ende charmi.

10

Symeons zonen waren: iamuhel ende iamin ende iami. ende ahod. ende iachin. ende saber ende saul een wijfs zoon van chanaan.

11

Leui zonen waren gerson. ende caath. ende merari.

12

Iudas zonen waren her. ende onan. ende sela. ende phares. ende zara. Mer her ende onan waren doot in dat lant van chanaan. Ende phares waren zonen gheboren: esrom ende amul.

13

Ysachar zonen waren: thola ende phua. ende iobab. ende semron.

14

Zabulons zonen waren: fareth ende chelon ende iahetel.

15

Dit waren lya zonen: die si gebaerde in mesophothamien van syrien mit hare dochter dina. Ende alle die zielen van haren zonen ende dochteren waren drie ende dortich.

16

Gads zonen waren: sephon. ende aggi. ende suni. ende esebou. ende beri. ende arodi. ende areli.

17

Asers zonen waren: iemna ende iesua. ende iesui. ende beria. ende sara was oec haer suster. Beria zonen waren: heber ende melchiel.

18

Dit waren selphe zonen die laban lya sijn dochter gaf. ende dese ghebaerde iacob: sestien zielen.

19

Rachel iacobs wijfs zonen waren: ioseph ende benyamin.

20

Ende ioseph waren zonen gheboren in tlant van egipten: dien hem ghebaerde assenes phutiphars dochter des papen van helyopoleos. manasses ende effraym.

21

Benyamins zonen waren: bela. ende bechor. ende asbel. ende gera. ende naaman iechri ende. iethros. inophin ende ofim ende ared.

22

Dit waren rachels zonen dien si iacob ghebaerde: alle die zielen waren veertien

23

Dans zoon was vian.

24

Neptalims zone waren: iasiel. ende guni. ende ieser. ende salem.

25

Dit waren bala zonen die laban rachel sijnre dochter gaf: ende dese ghebaerde si iacob: alle die zielen waren seuen.

26

Alle die zielen die mit iacob in egypten ghecomen waren: ende wtghegaen van sijnre dyen. al sonder sijnre zone wiuen: waren ses ende tsestich

27

Mer ioseps zonen. die hem gheboren waren in tlant van egipten: waren twe zielen. Alle die zielen die van iacobs huse in egipten ghinghen: waren tseuentich.

28

Ende iacob sende voer hem iudam tot ioseph in egipten dat hi hem boetscappen soude: dat hi hem te ghemoet quaem in yessen.

29

Doe iudas tot hem gecomen was so dede ioseph sijn waghen bereiden ende ghinc op sinen vader te gemoet tot dier seluer stat. Ende doe ioseph sijnen vader sach. soe viel hi op sinen hals: ende int omhelsen so weende hi.

30

Ende die vader seide tot ioseph Te hant sal ic van bliscappen steruen om dat ick dijn aensichte ghesien hebbe: ende ick laet di te liue.

31

Ende ioseph sprack tot sinen broederen: ende tot al sijns va-

[p. *67]

ders huys. Ic sal opgaen ende pharaoni boetscappen: ende ic sal hem seggen mijn broeders ende mijns vaders huys die in dat lant van chanaan waren. sijn gecomen tot mi:

32

ende si sijn mannen herden van scapen. ende si hebben naersticheit cudden te voeden. Si hebben gebracht. haer vee mit hem. ende al dat si mochte hebben.

33

Ende als hi v roepen sal. ende seit. wat is v werck:

34

So suldi antwoerden. Wij sijn mannen herden dijn knechten. van onser kintheit tot nv: wi ende onse vaders. Want dat sal ghi segghen. op dat ghi moghet wonen in tlant van gessen: want die van egipten veronwaerden alle herden van scapen.