Bible in duytsche (Delftse bijbel 1477)

Ca .xlv

1

NIet langher en mochte hem ioseph bedwinghen. daer vele luyde bi stonden: waer bi dat hi gheboet dat si alle daer buyten gaen souden: ende dat niemant vreemders daer bi wesen en soude daer si die een die ander kennen souden.

2

Ende hi hief op sijn stemme mit gheween: so dattet die van egipten hoerden ende alle pharaonis huys:

3

ende hi seide sinen broederen Ic bin ioseph Leuet mijn vader noch? Ende sine broederen en mochten niet antwoerden: soe seer waren si veruaert van groten anxt

4

Ende hi seide guedertierlic tot hem: come te mi. Ende doese bi hem ghecomen waren so seide hi. Ic bin ioseph uwen broeder die ghi vercocht in egipten.

5

En wilt v niet ontsien: noch ten duncken v niet hart dat ghi mi vercocht in desen lantscappen. Want om uwe salicheit soe sant mi god in egipten voer v.

6

Het is twe iaer dat die honger begonde te sijn inden lande: ende noch so bliuen daer vijf iaren. Inden welken men en sal niet mogen ackeren noch oesten.

7

Die heer sende mi voer om dat ghi sout mogen behouden bliuen bouen der aerden: ende dat ghi sult hebben spise te eten.

8

Ic en bin hier niet ghesent bi uwen rade mer mit goids wille: die mi gemaect heeft als of ick pharaonis vader waer. ende heer van al sinen huse: ende prince van al dat lant van egipten.

9

Haest v ende gaet op tot minen vader: ende gi sult hem segghen. Dit ontbiet dijn zoon ioseph God heuet mi here gemaect van al dat lant van egipten. Coemt neder tot my ende en merret niet:

10

ende du suls wonen int lant van gessen. Ende du suls bij mi wesen. du ende dijn zonen. ende dijnre zonen zonen: dijn scaep. ende dijn vee. ende alle dattu besittes:

11

ende daer sal ic di voeden. Want noch sijn daer vijf iaren honghers ouerbliues: dattu niet

[p. *65]

en verderues. ende dijn huys: ende al dattu besittes.

12

Siet uwe oghen. ende benyamins mijns broeders oghen sien: dat mijn mont v toespreket.

13

Boetscapt minen vader al mijn glori: ende al dat gi ghesien hebt in egipten. Haeste v: ende brengten te mi.

14

Doe hi benyamin sijnen broeder omhelsede ende gheuallen was op sinen hals so weende hi: ende benyamin weende oec op iosephs hals.

15

Ende ioseph custe alle sine broeders: ende weende op elken Ende daer na worden si coene tot hem te spreken

16

Ende het wort gehoert ende mit feesteliken reden in des conincs sael vermaert: iosephs broeders sijn gecomen. Ende pharao is verblijt ende al sijn ghesinne.

17

Ende hi seide tot ioseph: dat hi sine broederen gebieden soude ende segghen. Ladet uwe beesten ende gaet in tlant van chanaan:

18

ende brenget van daer uwen vader ende uwe maechscappe. ende come te mi: ende ick sal v gheuen al dat guet van egipten. op dat ghi eten moecht vanden morge vanden lande.

19

Beuele hem oec dat si nemen waghenen vanden lande van egipten: om te voeren hare cleyne kinderen ende haer wiuen. Ende du suls segghen. Neemt uwen vader. ende haest v te comen haestelic:

20

ende en laet niet van uwen hauen een cleynoet: want alle die rijcheden van egipten sullen v sijn.

21

Israhels zonen deden als hem beuolen was. Ende ioseph gaf hem waghenen. na pharaonis ghebot: ende spisen inden weghe.

22

Ende hi dede elke voertbrengen twe stoolen: mer benyamin gaf hi drie hondert silueren penningen. ende vijf alte guede stolen: ende also veel ghelts ende alsoe vele cleder sende hi sinen vader:

23

ende hi gaffer hem thien ezelen toe die mededraghen souden van alle die rijcheden van egipten ende also vele ezellinnen die tarwe ende broden droghen inden wege

24

Dus liet ioseph sine broederen: ende doe si wech gingen so seide hi hem. En wort niet gram inden weghe.

25

Ende si ghinghen op wt egipten. ende quamen int lant van chanaan tot haren vader iacob:

26

ende si vertelden hem ende seiden. Ioseph dinen zone leuet: ende hi is heer in alt lant van egipten. Doe dat iacob hoerde: so was hem of hi ontwaecte van enen swaren slaep. nochtan so en gheloefde hijs hem uiet:

27

mer daer teghen so vertelden si hem alle die ordinancie vander saken dier gheschiet waren. Doe iacob gesien hadde die waghene ende al dat ioseph gesent had: soe wort sijn gheest leuende.

28

ende seide. Het is mi ghenoeeh op dat ioseph minen zoon noch leuet: ick sal gaen ende sal hem sien eer ic sterue