Bible in duytsche (Delftse bijbel 1477)

§ Capit .xliiij.

1

IOseph beual den bereider van sinen huyse. ende seide. Vulle haer sacken mit koorne also vele als daer ingaen mach: ende legt elken dat ghelt bouen inden sacken.

2

Mer minen silueren nap. ende dat ghelt dat hi gaf vanden tarwe: legt inden mont van des minste broeders sac. Ende het wort alsoe gedaen.

3

Ende duet smorgens worden was so lietmense gaen mit haren ezelen.

4

Ende si waren te hant vter poerten ghegaen ende waren een luttel voertgegaen. Doe

[p. *63]

dede ioseph den bereider sijns huys voer hem comen ende seide Stant op ende volghet die mannen na: ende alstuse begrepen hebste so selste hem segghen Waer om hebt ghi quaet voer guet ghegheuen?

5

Den nap dien ghi ghestolen hebt: is daer mijn here wt drinct ende daer hij in te houeren pleecht. Gi hebt alte quaden dinc ghedaen.

6

Hi dede so als hem ioseph beual: doe hijse bi ordinancien begrepen had so seide hijt.

7

Si antwoerden Waer om spreect onse here aldus dat sijn knechten dus groten quaetheit ghedaen souden hebben?

8

Dat ghelt dat wi vonden bouen in onsen sacken. hebben wi weder ghebrocht tot di vanden lande van chanaan. Ende hoe mach dat wesen. dat wi gestolen hebben van dijns heren huys. siluer of gout?

9

Onder welken van dinen knechten geuonden wort dattu soekes hi sterue: ende wi sulten ons heren knechten wesen.

10

Ende hi seide hem Na uwen vonnisse selt gheschien. Onder wien ict vinden sal. hi sal mijn knecht wesen: mer ghi ander sult onsculdich wesen

11

Ende aldus soe leiden si haestelic haer sacken of op die aerde: ende elc ondeden.

12

Ende hi ondersocht die sacken. ende begonsten vanden meesten totten minsten: ende hi vant den nap in benyamins sack

13

Ende si scuerden haer clederen. ende loeden weder haer ezelen. ende keerden weder in die poert:

14

ende iudas ghinc eerst weder in mit sinen broederen tot ioseph. Want noch en was hi niet gegaen vander stat Ende si vielen altegader voer hem op die aerde.

15

Ende hi seide hem. Waer bi woud gi aldus doen? Of en weet ghi niet dat mijns ghelijc niet en is in consten van touerien?

16

Ende iudas seide hem. Wat sullen wi minen here antwoerden of wat sullen wi spreken of watmogen wi gerechtelic teghen hem spreken? God heuet gevonden dijnre knechten quaetheit. Siet wi sijn alle mijns heren knechten Ende wi ende onder wien dat dien nap gevonden wort

17

Ioseph antwoerde. Dat moet verre van mi wesen: dat ic alsoe doen sal Die den nap ghestolen heeft hi sal mijn knecht wesen: mer gaet gi vri wech tot uwen vader.

18

Ende iudas ginc wat naerre: ende seide vromelic. Ick bidde here hoer mi. dat dijn knecht spreken soude moghen een woert in dinen oren: ende worde niet gram op dinen knecht. Want du biste mijn here na pharao.

19

Du vraechdeste eerst dinen knechten hebdi vader of broeder:

20

ende wi antwoerden minen here. Ons is een out vader: ende een cleyn kint dat in sijnre outheit gheboren wort: ende sijn lichamelike broeder is doot: ende sijn moeder heuet dit kint allene: ende sijn vader minnet dit kint tederlic.

21

Ende du seides dinen knechten Brengten tot mi: ende ic sal mijn oghen op hem slaen

22

Wi seiden minen here: dit kint en mach sinen vader niet laten. Want lietet sinen vader so sel hi steruen.

23

Ende du seides dinen knechten. Ten si dat uwe minste broeder mit v come: gi en sult nimmermeer mijn aensicht sien.

24

Ende doe wi opghecomen waren tot dinen knecht onsen vader: so vertelden wi hem al dat minen here ghesproken had

25

Ende onse vader seide Keer weder: ende coept

[p. *64]

ons een luttel tarwe.

26

Wi seiden. Wij en moghen ghinder niet gaen. Ten si dat onse minste broeder mit ons neder gae so sullen wi tiden te gader: want anders en waer hi niet mede so en dorren wij des mans aensichte niet aensien

27

Hier op antwoerde hi. Gi weet dat rachel mijn wijf twe zonen gebaerde.

28

Die een ghinc wt ende ghi seit een beest heeften ghegheten: ende tot noch en sietmens niet

29

Ende ist dat ghi desen wech leidet ende gheschiet hem yet inden weghe: so suldi mijn outheit mit droefhett ter hellen leiden

30

Hier om ist dat ick income tot onsen vader dinen knecht ende dat kint niet mit mi en is: ende om dat sijn ziel an des kints ziel hanghet

31

ende siet hi dattet mit ons niet en is. soe sal hij steruen: ende dijn knechten sullen sijn outheit mit droefheit ter hellen leiden.

32

Ic sal properlic dijn knecht wesen: die dit kint ontfinc in mijnre trouwen. ende ic beloefde ende seide hem. Ten si dat ict weder brenge: so sal ic tot allen tiden sculdich sijn die sonde teghens minen vader.

33

Ende aldus sal ic bliuen dijn knecht voer tkint in mijns heren dienste: ende dat kint gae op mit sinen broederen.

34

Want ic en mach niet wederkeren tot minen vader sonder dat kint: op dat ic mit oerconde daer bi stae dien verdriete dat mijn vader verderuen sal