Bible in duytsche (Delftse bijbel 1477)

§ Ca .xliij.

1

HIer en binnen so dwanc die honger al dat lant anxtelic:

2

ende doe die spisen verteert waren die si gebrocht hadden van egipten: so seide iacob tot sinen zonen. Keert weder: ende coopt ons een luttel spisen.

3

Iudas antwoerde. Die man seide ons onder oercontscap van ede ende seide. ghi en sult mijn aensichte niet sien: ten si dat gi brenct mit v uwen minsten broeder.

4

Daer om ist dattu hem mit ons senden wils so sullen wij daer gaen te gader ende copen di dijn notorfte:

5

mer en wilstu des niet doen: soe en sullen wi daer niet gaen. Want alsoe wi dicke geseit hebben. so seide ons die man. Gi en sult mijn aensicht niet sien sonder uwen minsten broeder.

6

Israhel seide hem. Ghi deet dit in mijnre catiuicheit: dat ghi seit dat ghi noch enen anderen broeder had.

7

Ende si seiden hem Die man vraechde ons bi ordinancie onse gheslachte: of onse vader leefde: ende of wi noch enen broeder hadden. Ende wij antwoerden op al: dat hi ons vragede. Mochten wi weten wat hi ons vragen soude: ende dat hi seggen soude brenct uwen broeder mit v?

8

Ende iudas seyde tot sinen vader. Sende dat kint mit mi dat wi tiden mogen ende dat wi leuen ende dat wi ende onse cleine kinderen niet en steruen

9

Ic ontfae dat kint: eysschet weder van mijnre hant. Ten si dat ict weder brenghe ende hem v leuere: so sal ic der sonden sculdich sijn in di tot alre tijt.

10

Ende hadder niet merringhe in gheweest: wij waren te hants weder ghecomen anderwerf.

11

Hier om seide israhel: hoer vader tot hem. oft so noot is. duet dat gi wilt. Neemt in uwen vaten vanden besten vruchten vanden lande ende brenct den man ghiften: ende een luttel resinen ende honichs. ende storacis ende stacten. ende therebinthi. ende amandalen.

12

Ende draget mit v dubbelt ghelt: ende dat ghelt dat ghi vont in den sacken dat draghet weder: dattet machscien onwetende niet gedaen en is

13

Mer neemt oec uwen broeder: ende gaet totten man

14

Ende mijn god almactich die moet v den man guedertieren maken: ende hi moet mit v senden uwen broeder dien hi hout in banden: ende dese benyamin Want ic sal sijn beroeft van kinderen.

15

Dus namen die mannen ghiften ende dubbelt ghelt ende benyamin: ende si ghingen neder in egipten: ende si stonden voer ioseph.

16

Ende doe hijse ghesien hadde ende benyamin te gader: so beual hi den bereider van sinen huyse ende seide Leit dese mannen int huys: ende dodet offerhanden. ende ghereide een werscap: want si sullen huyden mit mi eten te middaghe

17

Hi dede also als hem beuolen was: ende leide die mannen int huys

18

Ende daer waren si veruaert ende seyden onderlinghe. Wi sijn hier ingheleidet.

[p. *62]

om dat ghelt dat wij eerst droeghen in onsen sacken: om dat hi op ons ouerdaet legghen wil: ende dat hi ons ende onze ezelen mit cracht onderdoen wil.

19

Om dese sake gingen si in die dore totten bereyder. ende seiden hem.

20

Wi bidden here dattu ons hores Onlanghes hier voir quamen wi neder. op dat wi spisen copen souden:

21

ende doe wise gecocht hadden ende wi quamen ter rusten. so deden wij onse sacken op. ende wi vonden dat ghelt in den mont van onsen sacken:

22

ende wi brenghent nv weder vanden seluen gewichten Mer wi hebben oec ander gelt gebrocht om te copen dat ons notorftich is Ten is in onsen weten niet: wiet leide in onsen sacken.

23

Die bereider antwoerde Vrede is mit v: en wilt niet ontsien. V god ende uwes vaders god. gaf v die scatten in uweu sacken. Want dat ghelt dat gi mi gauet: heb ic gheprouet. Ende hij bracht symeon wt tot hem.

24

Ende doe hijse in dat huys gebracht had so brach hi hem water: ende si dwoeghen hare voeten:

25

ende hi gaf haer ezels teten. Ende si ghereiden die giften: tot dat ioseph in quam te middaghe. Want si hadden ghehoert dat si daer broot eten souden.

26

Dus quam ioseph in sijn huys: ende si gauen hem die ghiften. houdende in haren handen: ende si aenbede langhes opter aerden .

27

Ende hi gruetese guedertierlic weder: ende vraghede hem ende seide. Is uwe oude vader gesont: daer ghi mi of seide? Leeft hi noch?

28

Si antwoerden. Dijn knecht onse vader is ghesont. Noch leeft hi. Ende si knielden neder ende aenbede hem.

29

Ende doe ioseph sijn oghen op sloech: so sach hij benyamin sinen lichaemliken broeder. ende seide. Is dit uwe cleyne broeder: daer gi mi of seide? Ende hi seide echter. God ontferme dijns mijn kijnt.

30

Ende hi haeste hem in sijn huyse. want sijn binnenste worden beruert op sijnen broeder: ende die tranen braken hem wt: ende hi ghinc in sijn camer ende weende.

31

Ende echter dwoech hi sijn aensichte ende quam voert. ende onthielt hem. ende seide. Legt broot.

32

Ende doe die broden geleit waren. so ghinc ioseph sitten aen die een zide. ende sijn broeders an die ander zide. ende die van egipten die te gader aten in die ander zide: want het was ongheoerloft die van egypten te eten mitten hebreuschen want si houden sulke werscap als onbehoerlic:

33

so saten si neuen ioseph. die eerst gheboren neuen die eerstgeboren ende die minste na haere outheit:

34

ende si verwonderden seer: doe si die gerechten namen die si van hem ontfingen. Ende dat meerre deel quam benyamin: also dat hi vijf deel ouer ghinc. Ende si droncken: ende si worden droncken mit hem.