Bible in duytsche (Delftse bijbel 1477)

Capittel .xlij.

1

ENde doe iacob hoerde datmen voetselen vercoft in egipten: soe seide hi sinen zonen. Waer bi verroekeloesdi?

2

Ic heb ghehoert datmen tarwe vercoept in egipten Gaet neder ende coept ons dat ons noet is. op dat wi mogen leuen: ende dat wi niet en verderuen van ghebreke

3

Dus ghinghen thien iosephs broeders neder. om dat si coren souden copen in egipten.

4

mer iacob hielt benyamin te huys: want hi seide sinen broederen. dat hi inden wech bi auontueren geen quaet gedogen en soude

5

ende si quamen int lant van egipten: mitten anderen die daer ghinghen om te copen. Want in dat lant van chanaan was die honger:

6

ende ioseph was prince van egipten: ende te sinen oerloue so vercoftmen den volke dat coren. Ende doe hem sijn broeders aenbedet hadden.

7

ende hijse bekent had so sprac hi hem hardelic toe als tot vreemden luyden. ende vraechde hem. Waen sij ghi ghecomen? Si antwoerden. van den lande van chanan: om te copen notorft der lijftocht

8

Ende noch bekende hi al sijn broeders: ende hi en was van hem gheen bekent.

9

Ende ioseph ghedacht der dromen die hi wilen ghesien hadde: ende seide tot hem. Ghi sijt alle spiers ende ghi sijt ghecomen om te spien die onuasticheit vanden lande.

10

Ende si seiden. Here ten is also niet: mer dine knechten sijn gecomen om spise te copen.

11

Wi sijn alle een mans zonen.. Ende wi sijn vredelic gecomen: ende dijn knechten en iaghen gheen quaet.

12

Hi antwoirde. Het is anders. Ghi sijt ghecomen om te merken die onvasheit vanden lande.

13

Ende si seiden. Wi sijn twaelf gebroederen dine knechten: een mans zonen int lant van chanaan. Die minste is mit onsen vader: ende die ander en is niet bouen.

14

Ioseph seide dat is. dat ic gheseit hebbe. Want ghi sijt spiers.

15

Nu sal ic te hant prouinc an v nemen Bi pharaonis salicheit ghi en sult alle niet van henen gaen. Voer dat uwe minste broeder comen sal.

16

Sent enen van uwen luyden ende hi brenghen: mer

[p. *60]

ghi sult in vanghenisse wesen. tot dattet gheproeft worden sal dat gi geseit hebt: weder het valsch of waer sij. Anders sijt gi spiers. bi pharaons salicheit

17

Daer om leuerde hijse in hueden drie daghen.

18

Ten dorden daghe. dede hijse wt den kerker brenghen ende seide hem Duet dat ic v geseit hebbe: ende gi sult leuen. Want ic ontsie gode.

19

of gi vreedelic sijt. men houde een van uwen broeders inden kerker: mer gaet ghi wech ende voert dat coren dat gi gecoft hebt in uwen husen.

20

ende brenct uwen minderen broeder tot mi: dat ic uwe redene prouen mach. ende ghi en sult niet steruen.

21

Si deden also hi gheseit had ende si spraken onderlinghe. Mit verdiente so doghen wi dit: want wi sondichden teghen onsen broeder doe wij dat verdriet sagen sijnre zielen doe hij ons bat. ende wijs niet en hoerden: hier om is dese tribulacie op ons ghecomen

22

Ende ruben een van hem luyden seide. En seide ic v niet. en wilt niet sondighen int kint: ende ghi en hoerde mi niet? Siet sijn bloet wort geeysschet.

23

Mer si en wisten niet dattet ioseph verstont: om dat hi hem toe sprac mit enen beduder.

24

Ende hi keerde hem een luttel achterwaert of. ende weende: ende hi keerde weder ende sprac tot hem. Ende hi nam symeon. ende bant hem voer hem luyden.

25

ende hij heet sinen knapen dat sij haer sacken vollen souden mitten tarwe ende dat si elc dat ghelt wederleggen souden in sinen sac: ende dat si hem dair en bouen spise gheuen soude inden weghe. Ende si deden also.

26

Ende si tiden wechdragende dat koren op haren ezels

27

Ende doe die ene van hem luyden sinen sac opghedaen hadde. om den ezele teten te gheuen daer si rusten. doe hi dat gelt sach inden mont vanden sac:

28

soe seide hi tot sinen broederen. Tghelt is mij weder ghegheuen. Siet het is inden sac Ende si worden verwondert ende bescaemt Ende seiden onderlinghe. Wat is dit dat ons god heuet gedaen?

29

Ende si quamen tot iacob haren vader int lant van chanaan: ende si vertelden hem alle dat hem geschiet was ende seiden.

30

Die here vanden lande sprac ons hardelike an ende hi waende dat wi spiers waren van der prouincie.

31

Wi antwoerden hem. Wi sijn vredelic: ende wi en pinen om ghene verradenisse

32

Wi sijn twaelf gebroederen van enen vader gheboren: die een en is niet bouen: die minste hout hem mit onsen vader int lant van chanaan.

33

Hi seide ons. Also ic sal prouen of ghi vredelic sijt. Laet enen van uwen broederen mit mi: ende neemt spisen die notorftich sijn in uwen huysen. ende gaet wech.

34

Ende brengt uwen minsten broeder tot mi. dat ic weten mach dat ghi gheen spiers en sijt ende dat ghi voertmeer moget hebben oerlof te copen dat ghi wilt: ende dat gi desen oec moget ontfaen diemen hout in vanghenis. Doe si dit gheseit hadden.

35

Ende als si haer coren wtghestort hadden so vant elc sijn ghelt inden mont vanden sack legghende ghebenden: ende doe si alle veruaert waren:

36

so seide haer vader iacob. Ghi hebt mi doen wesen sonder kinderen. Ioseph en is niet bouen: sy-

[p. *61]

meon houtmen inden bande. benyamin sal ghi wech leiden?

37

In mi sal al dit quaet keren. Ruben antwoerde Dode beide mijn zonen of icken niet weder en brenghe.Leuerten in mijn hant: ende ic sellen di weder gheuen.

38

Ende iacob seide. Mijn zoon en sal niet gaen mit v neder. Sijn broeder is doot: ende hi is alleen ghebleuen. Ist dat hem yet weder waer geschiet te lande daer gi gaet so soudi dan mijn outheit mit rouwen ter hellen leyden.