Bible in duytsche (Delftse bijbel 1477)

Ca .xli.

1

NA twe iaren so sach pharao enen droem. Hem dochte dat hi op die riuiere stont:

2

wt welker riuieren op quamen seuen ossen schoen ende seer vet: ende si weiden in broecachtighen steden

3

Oec quamen seuen ander vander riuieren vuyl ende seer ingheslaghen van magherhe-

[p. *57]

den: ende si weyden inden ouer vander riuiere in groeyenden steden:

4

ende si verslonden die ossen die also wonderlike schoon waren. ende so groet van lichame.

5

Doe ontspranc pharao ende hi wort echter slapende: ende sach enen anderen droem. Seuen aderen sproten in een stro. vol ende schoon:

6

oec so resen seuen ander dunne. ende geslaghen mit brande:

7

ende si verslonden alle die schoenheit vanden eersten.

8

Doe pharao nae die ruste ontwacte ende het dach gheworden was. so sende hi veruaert ende beanxt tot al die waersaghers van egipten. ende tot alle den wisen: ende deedse voer hem comen ende vertelde hem den drome: ende niemant en was dien mochte beduyden.

9

Doe ghedachte eerst die meester vanden scenckeren om ioseph ende seide. Ic belye mine sonde.

10

Doe die coninc vertorent was op sinen knechten. so dede ghi mi ende den meester vanden backeren werpen in des princen van den ridderen kerker:

11

ende daer saghen wi beide op enen nacht drome: te enen teiken dat ons te gheschieden was.

12

Ende daer was een hebreusch kint. die des leidmans vanden ridderen knecht was ende wi vertelden hem den droem. ende wi hoerden beide den wtganc vanden dinghe

13

ende ons gheschiede also hi onsen droem beteikende. Want ic wort weder gheset in minen dienst: ende hi wort ghehanghen inden cruce.

14

Te hant ten ghebode vanden coninc. so deden si ioseph wt den kerker ende scoren hem: ende si verwandelden hem sijn cleet ende brachten hem voer den coninc.

15

Die coninck seide ioseph. Ic heb dromen ghesien. ende niemant en is diese ontbinden mach ende ic heb ghehoert dattu die alte wiselic ontbindes.

16

Ioseph antwoerde Al sonder mi so sal god voerspoedighe dinghen antwoerden pharaoni.

17

Doe vertelde pharao dat hi ghesien had. Mij docht dat ic stont op die ouer vander riuiere:

18

ende ic sach seuen ossen wtcomen vander riuiere: seer schoen ende vet van vleyssche: ende si weyden datter groeyde inder weyden des broecs.

19

Ende sich na desen volgheden seuen ander ossen also lelic ende also magher: dat ic nye gheen so magher ende also danich en sach int lant van egipten.

20

Ende doe si verslonden ende verteert hadden die eerste ossen.

21

so en gauen si geen teyken van satheden: mer si bleuen ghelijc van magherheden ende van quader ghedaenten. Doe ic oec ontwaecte.

22

so wort ic echter slapende ende sach droem Seuen aren sproten op een stro. vol ende alte schone.

23

Oec resen seuen ander aderen dunne ende ghesleghen van brande:

24

ende die verslonden der eerster schoenheit. Ic vertelde den waersaghers den drome: ende nyemant en was dien ontbant.

25

Ioseph antwoerde. Des conincs droem. is een dinc. Dat god sal doen dat heeft hi pharao vertoent

26

Die zeuen schone ossen. ende die seuen volle aren. sijn seuen iaren van drachticheden: ende si begripen een cracht van drome.

27

Oec die seuen dunne ossen ende magher die achter hem op quamen. ende die seuen dunne aderen. geslegen mit barnende winde. dat sijn die seuen iaren van hongher:

[p. *58]

die comen sullen:

28

ende in deser manieren worden voldaen

29

Sie het sullen comen seuen iaren van so groter drachticheit in al dat lant van egipten:

30

ende na die sullen volghen seuen ander iaren van so groter ondrachticheit: datmen vergheten sal al die oueruloedicheit die achterleden is. Want die hongher sal al dat lant verteren:

31

ende die grootheit van der behoefticheit sal doen verliesen die groticheit vander drachticheit.

32

Mer dattu den drome anderwerue sages. ten seluen dinghen behorende. dat is een teiken des sekerheits: om dat godes reden geschien moet: ende haestelic moet worden voldaen

33

Nu daer om so voersie den coninc enen wisen man ende enen naerstighen ende hi setten bouen dat lant van egipten:

34

dat hi sette prouoesten in elc lantscap. ende hi vergadere in scuere dat vijften deel vanden vruchten. dese seuen iaer der drachticheit die nu te hant comen sullen:

35

ende men legghe al dat koerne op onder pharaonis machte: ende men hout inden poerten. ende men bereit teghen die seuen iaren des hongers die toecomende sijn.

36

ende die alle egipten quellen sullen: so dattet lant niet en worde verderft van ghebreke.

37

Dese raet genoechde pharao: ende alle sine knapen

38

Ende hi seide tot hem luyden. Sullen wi dustanighen man vinden moghen die vol si van goeds gheeste als ioseph is

39

Daer om seide hi tot ioseph. Want dij god alle dinc vertoent heeft dattu gesproken heefs. sal ic enen wiseren of dijns ghelijc vinden moghen?

40

Dus suls wesen bouen minen huyse: ende al dat volc sal gehoersaem wesen den gebode dijns monts Ic sal bouen di wesen alleen in enen zetel of trone des riken.

41

Echter seide pharao tot ioseph. Sich ic hebdi gheset bouen al tlant van egipten

42

Ende hi dede sijne vingherline van sine hant ende gaffen in iosephs hant: ende hi cleden mit enen witten clede: ende hi dede hem om den hals een gulden halsbant.

43

Ende hi deden gaen op sijnen anderden waghen ende hi dede enen eraut ropen: dat alle die luyden voer hem knielen souden: ende dat si souden weten dat hi waer gheset bouen al dat lant van egipten

44

Ende die coninc van egipten seide tot ioseph Ic bin pharao. Sonder dijn gebot en sal niemant hant noch voet moghen roeren in al dat lant van egipten.

45

Ende pharao keerde iosephs name: ende heten nader tonghen van egipten: die behouder der werlt. Ende pharao gaf hem te wiue: assenes phutiphars des papen van eliopoleos dochter. Ende ioseph ghinc wt den lande van egipten: ende omme ghinc alle die lantscappen van egipten.

46

Want hi was dortich iaer out. doe hi stont in des conincs pharaonis aenscouwen.

47

Ende die drachticheit vanden seuen iaren quam: ende doe dat coorne ghebonden was in scouen

48

so vergadertmense in scueren van egipten. In allen poerten so wort oec opgheleit. alle die ouertallicheit vanden vruchten.

49

Ende die menichte vanden tarwe was so groet. datmense rekenen mocht teghen dat sant vander zee. ende die menichte ghinc bouen maten.

50

Eer die hongher quam worden ioseph twe zonen gheboren: die hem assenes phu-

[p. *59]

tiphars des papen dochter van helyopoleos ghebaerde.

51

Ende sijns eerst geborens zoons naem heet hi manasses ende seide. God heeft mi doen vergeten alle mijn pijn: ende mijns vaders huys.

52

Ende sijns anders zoons naem hete hi effraym ende seide God heeft mi doen wassen inden lande mijns armoeden.

53

Doe dus gheleden waren die seuen iaren van drachticheden die daer geweest hadden in egipten:

54

so begonsten te comen die seuen iaren van ghebreken. die ioseph voerseit had: ende in al die werlt so was die hongher te bouen. Ende oec in al dat lant van egipten: so was die hongher.

55

Ende doe si honger hadden: so riep dat volc tot pharao. ende eysscheden daer bi dat si leuen mochten. Ende hi antwoerde hem. gaet tot ioseph: ende so wat dat hi v seit dat duet.

56

Ende dagelix so wies die hongher in al dat lant: ende ioseph dede op alle die scueren: ende vercoften dien van egipten. Want die honger dwancse.

57

Ende alle prouincien quamen in egipten. om dat si spise copen souden: ende dat si dat quaet des ghebreken minderen souden.