Bible in duytsche (Delftse bijbel 1477)

§ Capittel .xl.

1

ALs dese dinghen aldus ghedaen waren: so gheschiede dat twe gelubde mannen misdeden tegen haren here des conincs scencker van egipten ende sijn backer.

2

Ende pharao die teghen hem vergramt

[p. *56]

was. want die een was bouen den scenckeren. ende die ander bouen den backeren

3

so sant hijse in des princen vanden ridderen kercker: daer ioseph in gheuanghen was.

4

Ende die wachter vanden kercker leuerdese oec ioseph: die hem oec diende Een deel tides was leden: ende men hielt dese in hoede.

5

Ende op enen nacht saghen si beide enen droem: na gherechte beteykenisse die hem ghesciede.

6

Ende doe ioseph smorgens tot hem ghecomen was. ende hijse drouich sach:

7

so vraechde hi hem ende seide. Waer bi is huyden v aensicht droeuigher dant pleget?

8

Si antwoerden. Wi hebben enen droem ghesien: ende niemant en is dien ons beteikenen mach. Ende ioseph seide tot hem. En is die beteikeninge niet goets Versegghet mi dat ghi ghesien hebt.

9

Eerst soe vertelde die ouerste vanden schenckeren. sinen droem ende seide. Ic sach voer mi enen wijngaert daer drie scoten aen waren

10

ende die knoppen vanden druuen allencxken wiesschen: ende na die bloemen die druuen rijp worden:

11

ende ic sach pharaons nap in mijn hant. Ende ic nam die bessen ende wrancse inden nap dien ic hielt: ende ic gaf den dranc pharaoni.

12

Ioseph seide. Dit is die beteikenisse vanden droem. Die drie scoten sijn noch drie daghe.

13

na den welken pharao sal worden ghedachtich dijns dienstes. ende hi sal di weder setten in dijnen eersten staet: ende du sulst hem den nap gheuen na dinen dienst: als du te voren plaghes te doen.

14

Alleen ghedenc mijns als di wel wesen sal: ende du suls mit mi ontfermherticheit doen dtatu rades pharaoni dat hi mi wt desen kercker doe

15

want ic bin hier dieflick ghebracht vander hebreuscher lande: ende hier bin ic sonder misdaet inden kerker gedaen.

16

Doe der backeren meister sach dat hi den drome wijsselic ontbonden had. so seide hi. Ic sach oeck bi drome. dat ic drie koruen meels op mijn hoeft had:

17

ende inden enen korf die hoechste was so dochte mi dat ic droech allespise die men mit conste maket van backen: ende dat die vogelen daer wt aten.

18

Ioseph antwoerde. Dit is die beteikenisse van den droem

19

Die drie koruen. dat sijn noch drie daghe naden welken die coninc dijn hoeft ofdoen sal: ende hi sal di hangen inden cruce: ende die voghelen sullen dijn vleysche scueren.

20

Daer na wast opten dorden dach pharaons gheboerte. Ende hi maecte sinen kinderen een grote werscap ende tusschen der spisen so gedachte hi des meesters vanden schenckeren ende des princen vanden backeren:

21

ende sette den enen in sijn stat: dat hi den coninc drincken gheuen soude.

22

ende den anderen hinc hi inder galghen: om datmen des waersaghers waerheit soude proeuen.

23

Ende nochtan vergat die prince van den schenckeren ioseph sines dromes beteikenaers: ouermits der groter voerspoedicheden die hem voer vielen