Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–
Auteursrechtelijk beschermd1[37:2]ALs ioseph sestien iaer out was: soe voede hy een cudde mit sinen broeders. doe hi noch een kint was. Ende hi was mit bale ende selphe sijns vaders vriedinnen zonen: Ende hi wroechde voer sinen vader sine broeders. van al te quader sonden. | |
2[37:3]Want israhel minde ioseph bouen alle sine zonen: om dat hy hem gewonnen had in sijnre outheyt Ende hi maecte hem enen rock mitten naelde ghewracht. | |
3[37:4]Mer doe sijn broeders saghen. dat hi meer was ghemint vanden vader dan alle sijne broederen soe hate si hem: ende si en mochten hem niet vreedsamelic spreken. | |
4[37:5]Ende het geschiede. dat hi sinen broederen vertelde enen droem dien hi ghesien had: ende dat was een sake ende een sayen van meerre haten. | |
5[37:6]Ende hi seide tot hem Hoert | |
[pagina *52]
| |
minen droem dien ic ghesien heb. | |
6[37:7]Mi docht dat wi bonden scouen inden acker: ende dat mijn scoue opstont ende bleef staende: ende uwe scouen daer omtrent stonden ende aenbeden minen scoue. | |
7[37:8]Sijn broederen antwoerden. Sulstu onse coninc sijn. of sullen wi onder dijn heerscappie sijn of worden ghedaen? Dese saec van desen droem ende van desen redenen: gaf voetsel van hate ende van nijde. | |
8[37:9]Hi sach oec enen anderen droem: ende dien vertelde hi sinen broeders ende seide. Ick sach bi drome: als of mi die sonne. ende die mane. ende elf sterren aenbeden. | |
9[37:10]Ende doe hi dit sinen vader ende sinen broederen gheseit hadde: so berispede hem sijn vader. ende seyde. Wat wil hem dese droem die du ghesien hebste? Sullen wi ic ende dijn moeder ende dijn broeders di aenbeden opter aerden? | |
10[37:11]Hier om soe haten hem sijn broeders: mer die vader mercte dit dinc al swigende | |
11[37:12]Ende doe sijn broeders waren duerende om sijns vaders cudden te weyden hoedende in sychem: | |
12[37:13]so seide. israhel tot hem | |
13[37:14]Dijn broeders hueden ter weyden die scapen in sychem: com ic sal di tot hem senden. Doe hi antwoerde ic bin bereet: so seyde hi. Ganc ende besich of alle dingen te punte sijn omtrent dijn broeders. ende dat vee: ende brenct mi boetscap watmen daer duet. Ioseph wort ghesent vander valeyen hebron: ende quam in sychem. | |
14[37:15]Ende een man vant hem dolende inden acker: ende vraechde hem wat hi sochte. | |
15[37:16]Hi antwrerde hem. Ick soeke mijn broders. Segt mi: waer sij die cudden ter weyden hoeden | |
16[37:17]Ende die man seide Sij sijn wech ghegaen van deser stat. Want ic hoerde hem seggen Gae wi in dothaim Daer om ghinck ioseph nae sinen broderen: rnde hi vant se in dothaim | |
17[37:18]Ende doe si hem van verre sagen: eer hi tot hem quam so pensden si hem te doden: | |
18[37:19]ende spraken onderlinge. Sich die dromer comt. | |
19[37:20]Comet ende doden wi hem. ende werpen hem in die oude cysterne: ende wi sullen seggen dat hem een alte qnaden beest verslonden heeft: ende dan sullen wi sien wat hem sine dromen vorderen sullen. | |
20[37:21]Doe dit ruben hoerde soe pinde hi hem hoe hi hem van haren handen verlossen mochte: ende seide. En laet ons sijn ziel niet doden: | |
21[37:22]noch en storten wi sijn bloet niet wt: mer werpten in dese oude cysterne die inder wildernissen is: ende hout uwe handen sonder misdaet. Mer dit seide hi om dat hi en verlossen wilde van haren handen: ende sinen vader weder gheuen. | |
22[37:23]Te hant doe ioseph tot sinen broederen ghecomen was. so deden si hem wt sinen rock die tot sinen inckel ghinc ende mitter naelden ghewracht was: | |
23[37:24]ende si deden hem inden ouden put: die gheen water en hadde. | |
24[37:25]Ende doe si gheseten waren om broot te eten. soe saghen sij comen wegeganghers van ysmahels geslachte van galaad: ende haer cameels droeghen specien ende resinen. ende scatten ende tiden in egipten waert | |
25[37:26]Daer om seide iudas tot sinen broederen. Wat batet ons dat wi onsen broeder doden ende wi helen sijn bloet? | |
26[37:27]Beter ist dat wi hem vercopen dese van ysmahel: ende dat onse handen niet en worden besmet. | |
[pagina *53]
| |
Want hi is onse broeder ende onse vleysch Sinen ghebroederen ghenoechde sijne redene: ende si toghen hem vter cysternen. | |
27[37:28]ende vercoften hem den coopluyden van ysmahel die daer leden om dortich silueren penninghen: ende sij voerden in egipten. | |
28[37:29]Ende doe ruben wedergecomen was ter cysternen so en vant hi dat kint niet: ende hi scuerde sijne cledere. | |
29[37:30]ende ghinc tot sijnen broederen ende seide. Dat kint en openbaert niet ende waer sal ic gaen? | |
30[37:31]Ende si namen iosephs rock ende wentelden in een hueken bloet dat si ghedoot hadden: | |
31[37:32]ende si senden enighen dien totten vader draghen soude ende segghen Desen rock hebben wi gheuonden: besich oft dijns zoons rock is of niet. | |
32[37:33]Ende doen die vader bekende soe seide hi. Het is mijns zoons rock. Een alte quaden beest heeften gegheten: een beest heeft ioseph verslint. | |
33[37:34]Ende hi scuerde sine clederen ende dede een haren cleet an: ende beweende sinen zone vele tijts. | |
34[37:35]Ende doe sine kinderen vergadert waren om dat si vertroesten souden haers vaders rouwe: so en woude hi gheen troest ontfaen. mer hi seide. Ic sal wenende nede r gaen te minen zone in die helle. Ende doe gheduerde israhel in ghewene: | |
35[37:36]die van madyan vercoften ioseph in egipten. phutiphar pharaons gelubde knaep. die meester was van sinen ridderen |
|