Bible in duytsche (Delftse bijbel 1477)

§ Capittel .xxxiiij.

1

LYen dochter dijna ghinc wt. om dat sij sien soude die wiuen van dien lantscappe.

2

Ende doe sychem emors zone die van eueen gheslachte was. ende prince van dien lande dijnam ghesien hadde. so minde hijse. ende namse: ende slieper mede: ende vercrachte die maget

3

Ende sijn ziell worde verheelt met haer: ende mit smekene so zaluede hijse. die drouich was:

4

ende hi ghinc tot emor sinen vader ende seide. nem dese ioncvrouwe mi tot ene wiue.

5

Doe dit iacob gehoert had. so waren sijne zonen van dair ende waren inden voeden vanden vee veronledicht: so sweech hij tot dat si weder quamen

6

Ende doe emor sychems vader wtgheomen was. om dat hi iacob spreken soude.

7

siet soe quamen sijn zonen vanden acker: ende doe si hoirden wat dair gesciet was. soe worden si zeer gram. om dat hi een vuyl dinck ghedaen had in israhel: ende om dat hi een ongheoirloft dinc ghedaen had. ende iacobs dochter vercracht

8

Ende emor sprac hem aldus toe. sychems mijns zoons ziel hanget an uwer dochter ziel.

9

Gheefse hem te wiue: ende laet ons onderlinghe huwelic maken. Gheuet ons uwe dochteren: ende neemt weder

[p. *48]

onse dochteren:

10

ende woent mit ons. Tlant is in uwer macht: oeffenet vercoept ende coept ende besittet

11

Ende sychem seide oec tot haren vadder ende tot hare broeders Ist dat ic mach gracie vinden voer uwen luyden: ende so wat ghi setten sult sal ic gheuen.

12

Meerret die duwarie. ende eysschet ghiften: ic sal garen geuen dat gi eysschen sult: mer allene geuet mi dese ioncvrouwe te wiue.

13

Ende iacobs zonen antwoerden. sychem ende sinen vader in boesheden: also gram waren si om dat haer suster vercracht was.

14

Wi en moghen niet doen dattu eyssches: ende wi en moghen onse suster niet gheuen enen obesneden man: dat ongheoorloft is ende sonde met ons.

15

Ende hier sullen wi beloefte doen moghen Wildi ons gelijc wesen. ende besniden in uwen luyden al dat mans maecsel heeft:

16

dan sullen wi nemen ende gheuen onderlinghe onse dochteren ende uwe: ende wi sullen mit di wonen: ende sullen een volc wesen.

17

Mer en wildi niet worden besneden soe sullen wi onse dochteren nemen ende gaen wech.

18

Haer presenteringhe ghenoechde emor ende sinen zone sychem:

19

ende die ionghelinc en beide niet hi woude te hant doen dat si eysscheden. Want hi minde die ioncfrouwe sere: ende hi was die voerbarichste in al sijns vaders huys.

20

Als si inder poerten vander stede ghecomen waren spraken sij tot den volke

21

dese mannen sijn vredelick: ende willen mit ons wonen. Si copen ende vercopen int lant ende si oeffenent dat wijdt ende breet is ende het behoeft oeffenens. Wi sullen haer dochteren nemen te wiue: ende wi sullen hem die onse gheuen.

22

Een dinc is daer dit grote guet mede belet wort. Ist dat wij onse mannen besniden. ende wi deser luyden zeden houden:

23

soe sal haer guet ende haer vee ende al dat sij besitten int lant ons wesen. Allene laet ons dit doen: ende wi sullen te gader wonen ende een volc maken.

24

Si consenteerdent alle: ende besneden alle haer mannen.

25

Ende siet ten dorden daghe als die wonden alre zeerste doen. soe begrepen twe van iacobs zonen symeon ende leui dinen broeders haer zwaerden. ende ghinghen stoutelic in die poerte: ende als si alle die mannen dootgheslaghen hadden.

26

soe doden sij emor ende sychem te gader: ende namen dynam haer suster van sychems huys.

27

Ende doe si vter poerten gecomen waren. so vielen iacobs anders zonen op die doden. ende si woesten die poort in wraec dat haer sustet vercracht was: ende sij woesten al dat daer was in die huysen ende in die ackeren.

28

haer scapen. haer vee. ende die ezels:

29

ende haer cleine kinderen leiden si gheuanghen ende haer wiuen

30

Doe si vromelic ghedaen hadden: so seide iacob tot simeon ende leuy Ghi hebt mi ghestoert: ende ghehaet ghemaect mitten chananeen ende pherezeen dye in dit lant wonen. Wij sijn luttel: ende si sullen hem vergaren ende slaen mi: ende ic sal worden ofghedaen ende mijn huys.

31

Si antwoerden. Waren si sculdich te misbruycken onse suster als een licht wijf