Bible in duytsche (Delftse bijbel 1477)

§ Capittel .xxxij.

1

IAcob ginc oec wech den wech dien hi begonnen had. Ende hem quamen te ghemoet gods enghelen.

2

Ende doe hij se sach so seide hi. Dit sijn gods scaren Ende heet den name van dier stat manaym: dat is scaren.

3

Ende hy sende voerboden tot esau sijnen broeder. int lant seyr. vanden lantscappe van edom ende hete hem

4

ende seide. Dus suldi spreken tot minen here esau. Dit seit iacob tot sinen broeder. Ic hebbe ghewoent mit laban ende daer gheweest tot in desen daghe toe.

5

Ic heb ossen ende ezels ende scapen. ende knapen ende ioncwiuen ende ic sende nu bootscap an minen here: dat ic gracie mach vinden in dinen aenscouwen.

6

Ende die boden keerden weder tot iacob ende seiden. Wi quamen tot esau dinen broeder: ende sich hy comt di te ghemoet mit vier hondert mannen.

7

Iacob ontsach hem harde seer ende van vreesen soe deylde hi dat volc dat mit hem was: ende oec die cudden ende die scapen ende die ossen. ende dye cameels in tween scaren ende seyde.

8

Comt esau ter eenre scaren ende slaet hij se: sal die ander scaer die ouer is behouden bliuen.

9

Ende iacob seide. God mijns vaders abrahams. ende god mijns vaders ysaacs. here die mi geseit hebste. krer weder in dijn lant ende in die stat dijnre geboerten. ende ic sal di wel doen:

10

ic bin te clein tot allen dinen ontfermicheden: ende der waerheit die du mit dinen knechte hebste voldaen. Mit minen stock leet ic ouer dese iordane: ende nu come ick weder mit tween scaren.

11

Bescherme my van mijns broeders esaus handen. want icken ontsie alte seer: dat hi machschien niet en come ende verslae die moederen mitten kinderen.

12

Du hebs ghesproken dattu mi weldoen sels: ende dattu mijn zaet breiden soudes ghelijc den zande van der zee: datmen niet tellen en mach omdats soe vele is.

13

Ende doe hi daer dien nacht gheslapen hadde. soe scheide hij daer vandaen ende hi sende giften esau sinne broeder:

14

twe hondert gheyten twintich bocken. twe hondert scapen.twintich rammen:

15

ende drachtighe cameels mit haren volenen dortich: ende veertich coeyen. ende stieren twintich ende twintich ezelinnen ende thien haerre volenen

16

Ende dit sende hi bi sijnre knapen handen. elc cudde verscheiden ende hi seide sinen kinderen.Ganc voer mi ende een spacie sal wesen tusschen elc cudde.

17

Ende hi beual den eersten seggende. Ghemoetstu minen broeder esau. ende vraget hi di. wiens dattu biste ende werwaert dattu gaeste ende wies is dattu volges:

18

soe sulstu antwoerden. Wij sijn dijns

[p. *46]

knechts iacobs. Hi heuet giften gesent sinen heer esau: hi comt oec na ons.

19

Oec gaf hy den anderen den derden ende hem allen die den cudden volgheden gheboden ende seide Mit desen woirden so spreect tot esau als gi hem vindt: ende gi sult daertoe segghen.

20

Iacob dijn knecht. hy volghet oec onsen wech na Want iacob seide. Ic sal hem beureden mitten ghiften die voergaen: ende daer na sal ickem sien. Ende misschien hi sal mijns guedertieren worden.

21

Ende aldus so ghinghen die ghiften voer iacob: mer hi bleef alle die nacht inden scaren.

22

Ende doe iacob vroge op was ghestaen so nam hi beide sijn wiuen: ende also vele ioncwiuen mit elf zonen: ende hy ghinc ouer dat wedde iaboch.

23

Ende doe hi al ouer gheleit had dat hem toe behoerde.

24

so bleef hi dair allene: ende sich dair so worstelde enen man mit hem tot des morghens.

25

Ende doe hi sach dat hi iacob niet verwinnen en mochte: so taste hi die zenen van sinen dye. ende te hant verdroechdese.

26

Ende hi seide tot iacob. Laet mi gaen: want te hant gaet de dagheraet op. Hi antwoirde. Ic en sal di niet laten gaen: ten si dattu mi ghebenedies

27

daer om seide hi. Wat is dinen naem?

28

Hy antwoerde. Iacob. Ende die ghene die seide. Men sal dinen naem niet meer heten iacob: mer israhel sulstu heten. Want oftu teghen gode biste starc: gheweest: hoe veel meere sulstu stercker wesen tegen die menscen?

29

Iacob vragede hem Segt mi mit wat name bistu gheheten. Hi antwoerde. Waer bi vraechstu minen name die wonderlic is? Ende hi ghebenediden inder seluer stat

30

ende iacob hete den naem van dier stat phanuel. ende seide Ic heb den here gesien van aensichte tot aensichte: ende mijn ziel is behouden gheworden.

31

Ende te hant ghinc hem dye zon op: ende doe hi ouer phanuel was gheleden. Mer hi hinckede mitten voete.

32

Ende om die sake soe en eten die kinder van israhel niet die zenen. die verdroechde in iacobs dye tot in desen daghe: om dat hi tastede die zene van sijnre dye: ende dat si verdroghede.