Bible in duytsche (Delftse bijbel 1477)

§ Ca .xxxi.

1

NA dien dat iacob hoerde labans zonen woerden die seiden. Iacob hevet al ghenomen dat ons vaders was. ende van sinen guede is hi gheworden rijc. ende voerbarich:

2

ende hi merkede oec labans aensichte. dat hi te hem waert niet en was ghelijc dat hi ghisteren ende eerghisteren hadde gheweest:

3

ende sonderlinghe om dat die here seide keer weder in dijnre vader lant. ende in dijn gheslachte ende ic sal mit di wesen:

4

so sende hi ende riep rachel ende lya inden acker daer hi die cudde voede: ende seide hem.

5

Ic sie uwes vaders aensichte: dat hi te mi waert niet en is als hi ghisteren ende eerghisteren was. Ende mijns vaders god heeft mit mi geweest:

6

ende ghi weet dat ic mit alle minen crachten uwen vader heb ghedient.

7

Mer v vader heuet mi ommegaen. ende heuet mijn loon verwandelt thien werf: nochtan en liet hem god niet dat hij mi scaden mochte

8

Soe wanneer dat hi seide die onghelike scapen ende gheyten sal dijn loon sijn. so gebaerden sij alle ongelike scapen ende drachten: mer als hi verkeert seide. du sels alle die witte nemen voer dijn loon: soe ghebaerden alle die cudden wit

9

Ende god heuet uwes vaders guet ghenomen: ende heeftet mi ghegeuen

10

Want na als die tijt van ridene der

[p. *43]

scapen toecomen was. soe hief ic mijn ogen op. ende ic sach in drome die mannen springhen op die wiuen. die onghelike ende die geulecte ende die van verscheidene verwen waren.

11

Ende des heren engel seide tot mi inden slape Iacob

12

Ic antwoerde Ic bin hier Hi seide. Hefte op dijn oghen. ende sich alle die mannekijn die onghelike ende die ghesprekelde ende die gheulecte springhende op die wiue Want ic heb al gesien datti laban ghedaen heeft.

13

Ic bin god van bethel. daer dn den steen saluedes: ende mi belofte beloefdes. Nu daer om stant op ende ganc wt desen lande: ende keer weder int lant dijnre geboorte.

14

Ende rachel ende lya antwoirden. Hebben wi yet bliuende int guet. ende inder erfachticheit van ons vaders huys?

15

Ende heuet hi ons niet gheacht als vreemde wiuen Ende heeft ons vercoft: ende heuet onse loon ghegeten/1

16

Mer god heuet ons vaders rijcheit genomen: ende heeftse ons ende onsen kinderen gegeuen. Dair bi so duet al dat di dye heer beuolen heeft.

17

Ende aldus stont iacob op. ende hi settede sinen kinderen ende sinen wiuen op cameels ende ghinc wech:

18

ende nam al dat guet ende die cudden. ende so wat dat hi in mesophothamien ghewonnen had: ende voer tot ysaac sinen vader int lant van chanaan

19

Te dien tiden was laban ghegaen om sijn scapen te sceren: ende rachel stal haers vaders afgoden.

20

Ende iacob en wilde sijn sweer niet seggen dat hi vlien wilde.

21

Doe hi wech gegaen was beide hi ende alle dat sijns van rechts was: ende hy drie riuieren ouerleden was ende hi tide teghen den berch van galad:

22

soe wort laban ghebootscapt ten dorden daghe dat iacob vloe.

23

Ende hi nam mit hem sijn broeders. ende volghede hem na seuen daghen: ende hi begrepen inden berch van galaad.

24

Ende laban sach in drome god teghen hem seggende. Wachte di dattu niet scarpelic en sprekes tegens iacob.

25

Ende iacob had te hants sijn tabernaculen wt gespreyt inden berch. Ende doe hem laban mit sinen broedern hadden veruolget: soe settede hi tenten inden seluen berch van galaad.

26

Ende hi seide tot iacob. Waerom hebstu aldus ghedaen: dattu my heimelic mijn dochteren ontfoeren woudes als gheuanghen mitten zwairde?

27

Waer bi woustu vlien buyten mynen weten ende en woudes my niet laten weten: dat icti hadde moghen volghen mit bliscappen ende mit gesange. mit tamburen ende mit citharen?

28

Du en woudes niet ghedoghen dat ic cussen soude mijn zonen ende mijn dochteren. Du hebste sottelic ghedaen.

29

Ende nu is mijn hant oec machtich di quaet te doen mer dijns vaders god seide mi gisteren Wacht di dattu teghens iacob niet hardelick en sprekes.

30

Nu het si alsoe. Du begheerdes tot dinen vrienden te gaen: ende in dijn begeerte was dijns vaders huys. Waer om hebstu gestolen mine goden?

31

Iacob antwoerde. Dat ic wech tide sonder dine weten. Ic ontsach dattu mit cracht dijn dochteren gehouden soudes hebben

32

Mer dattu mi van diefte berispes: onderwien dattu dinen goden vindes: salmen doden voer onse

[p. *44]

broeders. Ganc ende ondersoke: ende soe wat dattu van dinen goeden onder mi vinden suls neemt. Doe hi dit seide so en wiste hi niet dat rachel die afgoden ghestolen had

33

Ende aldus ghinc laban in iacobs tabernaculen. ende besocht lya ende beide die ioncwiuen. ende hi en vant daer niet Ende doe hi in rachels tente ghecomen was:

34

soe haeste si ende berchde die afgoden onder eens cameels stro ende sij sat daer op: ende doe hi alle die tente ondersocht hadde ende hi niet en vant.

35

so seide rachel Mijn here en belge hem niet. dat ic voer dy niet opstaen en mach: want mi is nu gheschiet na die gewoente vanden wiuen

36

Ende aldus wort bespot labans naersticheit die sochte. Ende iacob verhyef sinen moet ende seide met ghescelde. Om welke mine misdaet ende om wat sonde bistu na mi aldus onsteken.

37

ende hebste ondersocht al mijn huysraet? Wat hebstu gheuonden van allen den gueden dijns huys? Zegget hier voer mijn broeders. ende voer dijn broeders: dat sijt vonnissen tusschen di ende my.

38

Heb ic hier om twintich iaer met dy geweest: dat dine scapen ende dine gheyten. niet ondrachdich en waren. ende dat ic niet die weders dijns cudden en hebbe gegheten:

39

noch dat ic di niet en hebbe ghetoent dat gheuaen was vanden beesten. Ic gout di alle scade. Ende so wat dat ghestolen wort dat eysschedes du van mi:

40

dach ende nacht wort ic verbarnt van hetten ende van coude: ende die slaep vloe van minen oghen.

41

Dus heb ic ghedient twintich iaer in dijn huys veerthien iaer om dine dochteren ende ses iaer om dine cudden. Ende du verwandelste thienwaruen mijn loon:

42

Ende en hadde nu mit mi niet geweest mijns vaders abrahams god. ende ysaacs vrese: so soustu mi nu misschien bloet hebben laten gaen. Met god aensach mijn vernoy ende die pine mijnre handen: ende hi berispede di ghisteren.

43

Ende laban antwoerde hem. Mijn dochteren ende al dattu sies is mijn. ende die zonen ende die cudden. Wat mach ic doen minen zonen ende minen neuen?

44

Daerom com ende aengaen wi beloefte: dattet si oerconstcap tusschen di ende my.

45

Ende aldus nam iacob enen steen: ende verhieffen in enen tytel.

46

Ende hi seide sinen broederen. Brenct toe stenen. Ende si vergaderden stenen ende maecten enen hoep: ende si aten daer op.

47

Ende laben heten. den hoep des oerkondes: Ende iacob heten den hoep des oircontscap elck na die proprieteyt na sijnre talen

48

Ende laban seide Desen hoep sal oerconde wesen huden tusschen mi ende di. Ende daer bi wort sinen naeme geheten galaad: dat bediet hope des oercondes

49

Ende laban seide daer toe Die here moet aensien ende vonnissen tusschen ons als die een vanden anderen wesen sal:

50

oftu mijn dochteren quelleste: ende oftu ander wiuen bouen hem inhaelste. Niemant en is onse reden oirconde sonder god: die tegenwoerdich dit ansiet

51

Ende hi seide echter tot iacob. Sich desen hoop ende desen steen die ic verheuen hebbe:

52

sal een oirconde wesen tusschen mi ende di. Ia desen hoop ende desen steen seg ic sullen

[p. *45]

wesen in oircontscap: want of icker ouerlide ende te di waert come of dattu ouerlides. mi quaet peinsede.

53

Soe moet abrahams god ende nachors god ende haerre vader god vonnissen tusschen ons Iacob swoer bider vresen ysaac sijns vaders:

54

ende doe iacob offerhande gheoffert had inden berch soe riep hi sinen broeders dat sij broot eten souden. Ende doe si ghegheten hadden so bleuen sij daer.

55

Mer laban stont op bi nachte. ende custe sijn zonen ende sijn dochteren: ende ghebendide hem: ende keerde weder in sijn stat