Bible in duytsche (Delftse bijbel 1477)

Ca .xxx.

1

DOe rachel sach dat si ondrachtich was. soe benide si haer suster: ende seide tot haren man. Ghif mi kinder: of anders so sal ic steruen.

2

Ende iacob antwoerde ende wort gram ende seide. Om gode bin ict. die di berouet heeft van der vruchte dijns buycs

3

Si seide. ic heb een ioncwijf bala: ganc in tot haer dat si gebare op mijn knyen: ende dat ic van haer kinder hebben mach

4

ende si gaf hem bala dat hi daer mede wesen mach. Ende doe die man tot haer inghegaen was:

5

soe ontfinc si ende ghebaerde enen zoon.

6

Ende rachel seide. Die here heeft mi gheuonnist: ende heeft mijn stemme ghehoert ende heeft mi enen zoon gegeuen. Ende hier om heet si sinen naem dan.

7

Ende echter ontfinc bala ende ghebaerde enen anderen zoon:

8

ende rachel seide. Die here heeft mi ghelijc ghemaect mijnre suster: ende ic bin starc geworden. Ende si hete sienen naem neptalim.

9

Doe lya gewaer wort dat si liet te ghebaren: soe gaf si selpham haer ioncwijf haren man.

10

Ende doe si nae haere ontfanc enen zoon ghebaerde.

11

soe seide si salichlic. Ende hier om hete si sinen naem gad.

12

Zelpha gebaerde noch enen anderen zone:

13

ende lya seyde. Dit is om mine salicheit. Want alle

[p. *41]

die wiuen sullen mi salich heten. Ende hier om heet si hem aser.

14

Ende ruben ghinc wt inden acker inden tide des tarwen oest ende hi vant mandragoren: ende hi brachtse lya sijnre moeder Ende rachel seide Ghif mi een deel van dijns zoons mandragoren.

15

Ende lya antwoerde. Duncket di cleyn dattu mi minen man ondergaen hebste: ten sij dattu oec mi nemes mijns zoons mandragoren? Rachel antwoerde ende seide. Hi sal te nacht slapen mitti om dijns zoons mandragoren. Lya ghinc wt iacob ta gemoet:

16

doe hy des auonts weder vanden acker keerde. ende seide. Du suls tot mi incomen: want ic heb di ghehuyert om loen om mijns zoons mandragoren. Ende hy sliep mit haer dien nacht: ende

17

die here hoerde haer ghebet. Ende si ontfinc ende ghebaerde den vijften zoon:

18

ende seide. God heuet mi desen loen gegeuen: want ic mijn ioncwijf minen man gaf. Ende si heten sinen naem ysachar.

19

Ende echter ontfinc lya ende gebaerde den sesten zoon:

20

ende seide. God heeft mi rijc ghemaeet mit gueder ghiften. Oec dese reyse mijn man sal myt my wesen: om dat ic hem ses zonen ghebaert hebbe. Ende hier om so hete si sijnen name zabulon.

21

Ende na hem gebaerde si hem ene dochter die dyna heet.

22

Ende die here ghedachte rachels ende hoerdese:

23

ende ondede haer vroulicheit: ende si ontfinc ende ghebaerde enen zoon ende seide. Die here heuet minen lacher of ghenomen.

24

Ende si heet sinen naem ioseph ende seide. God moet mi enen anderen zoon toe doen.

25

Doe ioseph geboren was so seide iacob tot sinen sweer. Laet mi: dat ic wederkeren mach te minen vader lande ende te minen lande.

26

Ghif my mine wiuen ende mine kinderen daer ic di om gedient heb. dat ic wech mach gaen. Du wetes den dienste daer ic di in ghedient heb.

27

Laban seide hem. Sal ic gracie vinden in dinen aenschouwen In minen ondervinde heb ic ondervonden: want mi god ghebenedijt heeft om dinen wille.

28

Sette dijn loon dat ic dy gheuen sal.

29

Iacob antwoerde du wetes dat hoe ic di ghedient hebbe: ende hoe groot dine possessie in minen handen heeft gheweest

30

Du hadste luttel eer ic hier quam. ende nu biste rijc gheworden: ende die here gebenedide di te minen incomen. Hier om ist recht dat ic tot enighe tide mijn huys voersie.

31

Ende laban seide. Wat sal ic di gheuen? Iacob antwoerde. Ic en wil niet: mer doestu dat ick eyssche: soe sal ic noch hoeden ende voeden dijn vee.

32

Vergadere alle dine cudde ende verscheide alle dine bonte scapen. ende die menigerhande verwe op haer vel hebben. ende so wat dat root ende besmet is ende van menigherhande verwe wesen sal. beide in scapen ende in gheyten. dat sal mijn loon wesen.

33

Ende morghen sal mijn rechtuaerdicheyt antwoerden. als die tijt van plaideren toe comen sal voer di: ende alle die niet sijn en sullen van menigher hande verwe ende mit vlecken van graeu. beide in scapen ende in gheiten. die sullen my berispen van dieften.

34

Ende laban seide. Ic hebt bequaem dattu eyssches.

35

Ende in dien daghe soe scheide hi die gheyten

[p. *42]

ende die scapen. ende bocken ende weders die menichfoudich waren van verwen ende ghesprekelt of mit vlecken. Ende alle die cudde van eenre verwen. dat is die wit of swart waren van vlieze. die leuerde hi in sijnre zonen handen:

36

ende hy leide drie dachuaert weghes tusschen hem ende sinen behuweden zonen iacobs: die sijn ander cudde voede.

37

Doe nam iacob groene popelbomen rueden ende van amandelbomen. ende hi wtplantese: ende hi dede een deel die scelle of Ende doe hi hem die scellen ofgetogen hadde. so openbaerde die witheit: mer die gene die heel ende ongescellet waren. die bleuen groen: ende na dier maniere so wort die verwe menigerhande

38

Ende iacob leidese inden troegen daermen dat water in goet: op dat als. die cudden quamen om te drincken. dat si voer oghen souden hebben die rueden ende dat si in haren aenscouwen ontfaen souden.

39

Ende het ghesciede dat inder hetten des springhens. die scaep aenscouweden die rueden: ende dat si ghebaerden van menigherhande verwen beulect ende besprekelt. mit verkeerder verwen

40

Ende iacob sceide die cudde: ende leide die rueden inden troeghen voer der rammeren oghen. Ende al dat swart of wit was dat was labans. mer die ander waren iacobs: als si die cudden onder hem sceiden.

41

Als ten eersten tiden die scapen spronghen. soe leide iacob dye rueden inden troeghen vanden wateren. voer der rammen oghen ende der scapen. dat si ontfaen souden mit aensien der rueden: mer als die achterste reden soe si ontfingen soe en leide hi die rueden niet.

42

Ende die spadighe drachten waren labans: ende die vanden eersten tiden waren iacobs.

43

Ende iacob wort rijc bouen maten ende hi hadde vele cudden: ioncwiuen ende knapen cameels ende ezelen