Bible in duytsche (Delftse bijbel 1477)

§ Ca .xxix.

1

IAcob tide voert aldus ende quam ten oesten lande:

2

ende sach enen put in enen acker: ende drie cudden van scapen daer neuen legghende. Want wt die put plach dat vee te drincken: ende des putten mont was besloeten mit enen groten steen.

3

Want het was daer een castume. als alle die scapen vergadert waren dat si den steen of keerden: ende als si ghedroncken hadden soe leiden sien weder op den mont vanden putte.

4

Ende iacob seide totten herden Broeders waen si di? Sij antwoerden. Van aran.

5

Ende hi vraghede hem. ende seide: kendi laban nachors zone?

6

Sij seiden. Wi kennen hem. Is hi ghesont seide iacob? Ia hi seiden sij: ende sich rachel sijn dochter comt mit haren cudde

7

Ende iacob seide. Noch isser vele daghes ouer: ende ten is gheen tijt datmen die cudde driue ter coyen waert Ghif te voren den scapen drincken: ende drijfse also weder ter weyden.

8

Sij antwoerden Wi en mogen. voer dat al dat vee vergadert wort: ende dan sullen wi den steen heffen van des putten monde ende die cudden sullen drincken.

9

Noch spraken si: ende sich rachel quam mit haers vaders scapen. Want si hoede een cudde.

10

Ende doese iacob gesien hadde. ende hi wiste datter sijn nichte was. ende die scapen waren labans sijns oems: so hief hi den steen op daer den putte mede gesloten was: ende doe die cudde ghedroncken hadden soe omhelsede hijse.

11

Ende hy hief op sijn stemme ende weende:

12

ende hi seide haer dat hy was haers vaders broder: ende rebecken zoon. Ende si haeste haer ende seit haren vader.

13

Ende doe hi ghehoert hadde dattet iacob sijnre suster zoon was die daer gecomen was soe liep hi hem te gemoete: ende hi omhelseden. ende viel op hem ende kusten: ende leyden in sijn huys. Ende doe hi ghehoert hadde die sake van desen weghe

14

soe antwoerde hi. Du biste mijn been ende mijn vleysch. Ende doe die dagen van eenre maent voldaen waren:

15

soe seide hem laban. Sulstu mi te dancke dienen. om dattu mijn broeder biste? Segt wattu van loon ontfanghen suls.

16

Hi hadde twe dochteren. Die meester naem was lya: ende die minste heet rachel.

17

Mer lya was leep mitten oghen. ende rachel was van schonen aensichte ende van minliken aenschouwen:

18

ende iacob mindese ende seide. Ic sal di seuen iaer dienen om rachel dijn minste dochter.

19

Laban antwoerde. Het is beter dat icse di gheue dan enen anderen man. Daer om bliue mit mi.

20

Aldus diende iacob seuen iaer laban om rachel: het dochte hem luttel dagen ouermits dye groetheit vander minnen.

21

Ende hi seide tot laban. Gheuet my mijn wijf. want te hant is die tijt voldaen: dat ick tot haer ingaen mach.

22

Ende laban riep ende node vele scaren van sinen vrienden te werscap: ende maecte die brulocht:

23

ende

[p. *40]

des auonts leide hi tot iacob in lya sijn dochter:

24

ende gaf haer een ioncwijf die zelpha heet. Ende doe iacob nader castumen te haer in ghegaen was:

25

doet smorghens gheworden was soe sach hi lya: ende hy seide tot laban sinen sweer. Wat is dit dattu mi doen wilste? En diende ick dy niet om rachel? Waer om hebstu mi lyam ingheleyt?

26

Laban antwoerde Ten is gheen gewoente in onser stat da wi die minste voer moegen te huwelic gheuen.

27

Voldoe een weke van dagen des huwelics: ende ic sal di rachel oec gheuen. om dat werc daer ghi my seuen ander iaren om dienen selt.

28

Iacob consenteerde dese beloefte: ende doe een weke gheleden was soe nam hi rachel te wiue.

29

Ende die vader gaf haer een ioncwijf die bala heet.

30

Ende doe iacob ten lesten ghecregen hadde sijn begeerde huwelic. soe minde hi meer die achterste dan die eerste: ende hi diende noch seuen ander iaer bi laban sinen sweer.

31

Ende doe die here sach dat iacob lyam versmade. so ondede hi haer vroulicheyt: ende liet haer suster ondrachtich bliuen.

32

Ende si ontfinc ende ghebaerde enen zoon: ende heete sijnen naem ruben ende seide. Die here heeft gesien mijn oetmoedicheit Nu sal mi mijn man minnen.

33

Ende echter ontfinc si: ende ghebaerde enen zoon ende seide. Om dat die here gehoert heuet datmen mi in versmaetheden versmadet heeft: soe heuet hi mi oec desen gegheuen. Ende hi hete sinen naem symeon.

34

Ten dorden male ontfinc sij ende gebaerde enen anderen zoon: ende seide. Nu sal oeck mijn man mit mi vergadert worden: om dat ic hem drie zonen ghebaert hebbe. Ende hier om hete si sinen naem leuy.

35

Ten vierden male ontfinc si: ende gebaerde enen zoon ende seide. Nu sal ic den here belien. Ende om dit soe hete si sinen name iudas. Ende sij hielt op te ghebaren.