Bible in duytsche (Delftse bijbel 1477)

§ Capittel .xxvi.

1

DOe die hongher wordden was op dat lant na dier ondrachtich ede die ghesciet was in abrahams daghen: soe ghinc ysaac tot abimalech den coninc vanden palestijnen. ende gerara.

2

Ende die here openbaerde hem ende seide Ende ganc niet neder in egipten: mer ruste int lant dat ic dij segghen sal

3

ende doe daer pelgrimagie: ende ic sal mit di sijn ende di benedien. Want di ende dijnen sade sal ic geuen alle dese lantscappen: ende ic sal voldoen den eet dien ic gheloeft hebbe dinen vader abraham:

4

ende ic sal dijn saet menichfoudighen gheliken die sterren des hemels. Ende ic sal dijne nacomelinghe gheuen al dese lantscappen: ende in dijnen sade sullen wordden ghebenedijt alle die luyden der aerden:

5

om dat abraham ghehoersam heeft gheweest mijnre stemme: ende om dat hi heuet ghewacht mine gheboden: ende mijn beuelen. Ende om dat hi ghehouden heeft mine oeffeninghe ende mijn wet.

6

Ende aldus bleef ysaac in gerara.

7

Ende doe hem die mannen vander stat vragheden van sijnen wiue. soe antwoerde hi. Het is mijn suster. Want hi ontsach hem dat hij lijden soude dat sij hem ghesellet was te huwelic: want hij achte dat si hem misschien dootslaen souden om hare schoenheit

8

Ende doe vele daghe gheleden waren ende hi daer woende: soe sach abimalech die coninc vanden palestinen tot eenre venster wt. Ende hi sach ysaac spelen met rebecca sinen wiue:

9

ende hi ontboet hem ende seide. Het is openbaer dattet dijn wijf is. Waer bi hebstu ghelogen dat sij dijn suster is? Hi antwoerde. Ic ontsach dit ic steruen soude om hare wille

10

Ende abymalech seide. Waer bi leitstuut op ons. Yemant vanden volke mocht gheleghen hebben bi dijnen wiue: ende du sondtste op ons ghebrocht hebben ene grote sonde

11

Ende hi gheboet alle den volc ende seide. Soe wie des mans wijf ghenaket. hi sal den doot steruen

12

Ende ysaac saeyde in dien lande: ende hi vant in dien iaer hondertfout. Ende die heer ghebenedide hem.

13

ende hi wort een rijc man: ende hi ghinc voertgaende ende toewassende. tot dat hi alte seer groot was gheworden:

14

ende hi hadde besittinghe van scapen ende van vele vee ende familien. Om dese saec beniden hem die palestinen.

15

ende alle die putten die abrahams sijns vaders knapen ghegrauen hadden. die slechtense ende voldense mit aerden te dien tiden:

16

al so seer dat abimalech selue seide tot ysaac. Ganc wech van ons: want du biste alte veel machtigher gheworden dan wi.

17

Ende hi ginc wech ende quam totter vloet in gerara ende woende al daer:

18

ende echter so groef hi ander putten. die abraham sijns vaders knapen ghegrauen hadde: ende die wilen eer geslecht hadden die philestinen. Ende hi hietese metten seluen namen: daerse sijn vader te voren mede gheheeten hadde.

19

Ende sij grouen in die vloet:

[p. *35]

ende sij vonden leuende water.

20

Mer daer was ghesceel van den herden van gerara: teghen ysaacs herden ende sij seideu Ons is dit water. Ende om dese sake so heete hi den name des putten van dat aldaer ghesciet was ende heetse claghe:

21

ende si grouen enen anderen ende om dien so streden si oock: ende hij heete die onurientscap.

22

Ende si tiden van daer ende groef een ander put: om die welcke si niet en streden. Ende aldus so heete sijnen naem breetheit. ende hi seide. Nu heeft ons die here ghebreet: ende heeft ons doen wassen opden lande.

23

Ende van dier stat ghinck hi op tot barsabee:

24

ende daer openbaerde hem die here ende seide in dier nacht. Ic ben abrahams dijns vaders god. En wilt niet ontsien: want ic ben bi di. Ic sal di ghebenedien ende menichuoudighen dijn zaet: om abrahams mijns knechts wille.

25

Ende aldus stichte hij den heer aldaer een outaer: ende als hi desheren naem angheropen hadde so spreide hi sijn tabernakel wt ende beual sijnen knapen dat sij een put grauen souden.

26

Doe tot deser stat ghecomen waren. abymelech van gerara. ende ochozath sijn vrient. ende phicol die leidsman sijnre ridderen:

27

so seide ysaac tot hem. Wat beroemdi tot mi tot enen man dien gi hatet: ende hebten van v verdreuen.

28

Si antwoerden. Wij sien dattie here mitti is: ende hier om segghen wi. Een eedt sij tusschen ons. ende aengaen wij beloefte.

29

dattu ons niet quaets doen en sels: also wij dij niet en hebben ghenaect datti toebehoerde: mer wi lieten dij met vreden. ende wi en deden di niet enich verdriet die ghewassen waers met des heren benedictien.

30

Dus makede hi hem een werscap Ende na die spise ende na die dranc

31

stonden sij vroech op. ende sworen onderlinghe. Ende ysaac lietse varen vredelijc tot hare stat.

32

Ende sich in dien seluen daghe quamen ysaacs knapen: ende boetscapten hem vanden put die si ghegrauen hadden. ende seiden. Wij hebben water gheuonden

33

Daer bi so hiete hi den put oueruloedich: ende die poerten wort den name ghegeuen bersabee: tot desen daghe toe.

34

Doe esau twalf iaer out was soe nam hi twe wijuen: iudith beheris dochter van etheen. ende basemath elons dochter van dier seluer stat

35

ende si hadden beide verbolghen ysaacs ende rebecken ghemoede.