Bible in duytsche (Delftse bijbel 1477)

Ca .xxiij.

1

SAra leefde hondert iaer ende seuen ende twintich:

2

si starf in die stat arbea. dat is hebron int lant van chanaan. Ende abraham quam dat hijse beclaghen ende bewenen soude.

3

Ende doen hi opghestaen was van dien dienste: soe sprack hi tot hets zonen ende seide.

4

Ic bin een toecomelinc ende een vreemde onder uwen luyden: gheeft mi dat recht van begrauen mit uwen luyden. ende ic sal minen dode grauen

5

Hets zonen antwoerden ende seiden.

6

Hore ons here. Du biste gods prince onder ons: in onsen wtuercoren grauen soe begraue dinen doden: ende niemant en salt dy moghen verbieden: du en suls in finen graue dinen dode moghen begrauen.

7

Abraham stont op ende aenbede dat volc van dien lande: dat waren hets zonen Ende hi seide tot hem.

8

Ist dattet uwen zielen genoghet dat ic minen dode sal begrauen. so hoert mi: ende bidt voer mi ephron seors zoon.

9

dat hi mi geue die dubbelde speluncke dien hi heeft int achterste deel van sinen acker. Hy leuerse mi voer uwen luyden voer dat ghelt dat sij waerdich is: in besittinge van begrauen.

10

Want ephron woende int midden van hets zonen. Ende ephron antwoerde tot abraham: daer sij dat alle hoerden die in quamen ter poerten van dier steden ende seide.

11

Here mijn

[p. *29]

ten sal alsoe niet gheschien: mer hoert bet wat ic spreke. Ic geue di den acker ende den spelunc die daer in is: inder tegen woerdicheit der sonen mijns volcs. Begraue dinen doden.

12

Abraham aenbede voer den here ende tvolc vanden lande:

13

ende hi sprac tot ephron: daer sijn volc omtrent stont. Ic bidde dattu mi hoerste. Ic salt ghelt gheuen om den acker: ontfanghet: ende ic sal alsoe minen doden begrauen inden acker.

14

Ephron antwoerde hem.

15

Here mijn hoert mi. Dat lant dattu eysches. is waert vier hondert silueren cyclen. Dat is die prijs tnsschen di ende mi. Ende hoe veel is dit? Begraue dinen doden.

16

Doe dit abraham ghehoert hadde. so woech ende betaelde hi dat ghelt dat ephron gheeyshet had. daert heths zonen hoerden vier hondert cyclen siluers: geproeft ende openbaer munten.

17

Ende die acker die wilen ephrons was. in die welke die dubbelde spelunc was ende mambre anscouwede. beide die acker ende den dubbelde speluncke: ende alle sinen bomen in allen terminen al om ende om.

18

wort abraham vast ghemaect in besittinghen daert heths zonen saghen: ende alle die in quamen in die poerte van dier stede.

19

Ende aldus begroef abraham sara sijn wijf. in die dubbelde speluncke des ackers die mambre anscouwede: dat is hebron. int lant van chanaan.

20

Ende die acker. ende die speluncke die daer in was. wort abraham gheconfirmeert in besittinghe des graues. van heths zonen