Bible in duytsche (Delftse bijbel 1477)

§ Ca .xxij.

1

NA dien dat dese dinghen dus gedaen waren. soe becoerde god abraham: ende seide tot hem. Abraham abraham. Ende hi antwoerde. Ic bin hier

2

Ende god seide hem. Neemt dijn eengheboren zoon dien du minnes ysaac. Ende ganc int lant des visioens: ende offer hem daer in holocaust: op een vanden berghen dien ic di wisen sal.

3

Hier om stont abraham bi nacht op. ende ghereide sinen ezel: ende leide mit hem twe ionghelingen: ende ysaac sijnen zoon. Ende doe hi thout ghehonden hadde ten holocaust: soe ghinc hi wech te dier stat waert die hem god beuolen hadde.

4

Inden derden daghe so hief hy sijn ogen op ende sach die stat van verre:

5

ende hi seide tot sijnen kinderen Beit hier mitten ezel: ic ende dat kint sullen tot daer tiden: ende als wij aenbedet sullen hebben so sullen wi weder tot v keren.

6

Ende hi nam dat hout vanden holocaust: ende hy leidet op ysaac sijn zoon. Mer hi droech dat vuer ende een zwaert. Ende doe sij twe te gader ghinghen:

7

soe seide ysaac sinen vader. Vader mijn Ende hi antwoerden. Sone mijn wat wilste? Sich seide hi hier vuer ende hout. Waer is die offerhande des holocaustes?

8

Ende abraham seide. Sone mijn god sal hem voersien ten offerhande des holocausts. Doe ghinghen sij te gader:

9

ende quamen ter stat daer hem god ghetoent hadde. Ende daer maecte hi een outaer: ende leide daer dat hout bouen. Ende doe hi ysaac sinen zoon te hoep ghebonden had: soe leide hi hem opten outaer opten hoep vanden houte:

10

ende hi stac sijn hant wt ende begrepet zwaert: dat hi sijnen zoon offeren

[p. *28]

soude.

11

Ende sich des heren engel riep vanden hemel ende seide. Abraham abraham. Ende hi antwoerde. Ic bin hier.

12

Ende die engel seide hem. Steke dijn hant niet voert bouen dat kint: noch en doe hem niet. Nu kenne ick dattu gode ontsies: ende du niet en spaers dijn eengheboren zoon om minen wille.

13

Abraham hief op sijn ogen: ende sach achterwaert enen weder verwarret in den braem mitteu hoeruen. Ende hij nammen: ende hi offerden in holocaust voer sijnen zoon:

14

ende hy hiet die naem van dier stat: die here siet. Daer bi seit men noch huyden: inden herghe salt die here sien.

15

Ende des heren enghel riep abraham anderwerf vanden hemel ende seide.

16

Bi mi seluen heb ic ghezworen seit die here: om dattu dese dinc hebste ghedaen. ende om dattu niet en spaers dijn eengeboren zoon om minen wille.

17

so sal ic di gebendien: ende dijn zaet menichfoudighen ghelijc die sterren des hemels: ende ghelijc den sande dat is inden ouer vander zee. Dijn zaet sal besitten sijnre vianden poerten:

18

ende in dinen zade sullen worden gebenedijt alle die luyden der aerden: om dattu gehoersaem waerste mijnre stemmen.

19

Abraham keerde weder tot sijnen kinderen: ende sij ghinghen te gader te bersabee ende hi woende daer.

20

Als dese dinghen dus ghedaen waren so wort abraham gheboetscapt. dat melcha oec zonen had ghebaert nachor sinen broeder:

21

hus den eerstgeboren zoon: ende bus sinen broeder. ende chamuel der syrien vader.

22

ende cafeth. ende azau. ende pheldas. ende iedlaf. ende bathuhel:

23

van wien rebecca gheboren wort. Dese acht zonen ghebaerde melcha: nachor abrahams broeder.

24

Mer sine vriendinne wies name roma was. si ghebaerde hem thabee. ende gaon ende thaas ende maacha.