Bible in duytsche (Delftse bijbel 1477)

§ Ca. .xxi.

1

DIe here visiteerde saram alsoe hi gheloeft hadde: ende hi veruolde dat hi sprac.

2

Ende sij ontfinck ende ghebaerde enen zoon in haere outheit te dien tiden die haer god voerseyt had.

3

Ende abraham hete sijns zoons name die hem sara gebaert had ysaac.

4

Ende hi besneet hem inden achsten daghe. alsoe hem god geboden had

5

doen hi hondert iaer out was Want in dese outheit sijns vaders. wort ysaac gehoren.

6

Ende sara seide. God heuet mi een lachen ghemaect: soe wie dattet horen sal. hi sal mit mi lachen

7

Ende echter sprack si. Die abraham hoerde wie sals ghelouen. dat sara soecte enen zoon: die si gebaert heuet als si te hant out is?

8

Dus wies dat kint: ende het wort ghespaent. Ende abraham maecte ene grote werscap in sinen huyse in dien daghe datmen dat kint spaende vanden sughen.

9

Ende doe sara sach agars van egipten zoon. spelende mit ysaac haer zoon: seide si tot abraham.

10

Werp wt of verdrijf dat ioncwijf mit haren zone Want des ioncwijfs zone en sal niet erfghenaem wesen mit minen zoon ysaac

11

Abraham ontfinc dit hardelic om sinen zoon.

12

Ende die here sprac tot abraham. En laet dy niet hart duncken opt kint ende op dijn ioncwijf. Al dat di sara geseit heuet. hoert haer woert: want dy sal saet gheheten worden in ysaac.

13

Mer oec so sal ic dijns ioncwijfs zone maken in groet volc: om dat hy dijn saet is.

14

Ende aldus stont abraham des morghens op: ende nam broot. ende een vat waters. ende hi leit op des ioncwiues scouderen. ende hi leuerde haer dat kint: ende hi lietse gaen. Ende doe si wech ghegaen was: soe doelde si inder wildernissen van bersabee.

15

Ende doe dat water vten vate verteert was: so worp si dat kint of onder een vanden bomen die daer waren: ende ghinc wech.

16

Ende satter van verre tegen: alsoe verre als een boghe schieten mach. Want si seyde. Ic en salt kint niet mogen sien steruen Ende si satter tegen: ende hief op haer stemme ende weende.

17

Mer god hoerde haer kints stemme. Ende des heren enghel riep vanden hemel agar ende seide. Wat duetstu agar? En wilt niet wenen. Want god heeft ghehoert dijns kints stemme: in die stat al daer hi is.

18

Stant op ende neem dat kint. ende houde sijn hant: want ic sal hem groet volc maken.

19

Ende god ondede haer oghen. Ende sij sach enen put waters. ende ghinc wech ende vollede daer dat vat: ende gaf den kinde drincken:

20

ende sij was mit hem Het wies ende woende inder wildernissen: ende hi wort een ionghelinc een scutter.

21

Ende hi woende in der wildernissen pharan. Ende sijn moeder nam hem een wijf vanden lande van egipten

22

Te dien tiden soe seide abimelech ende phicol die prince sijns heers tot abra-

[p. *27]

ham. God is mitti in allen dien dattu doetste.

23

Daer om so sweer mi bi gode. dattu mi ende mijn nacomelinghen noch mijn gheslacht niet deren en sels. Mer dattu my doen sels nader ontfermherticheit die ic mitti gedaen hebbe: ende den lande daer du in hebste gewoeut toecomelinc.

24

Ende abraham seyde. Ic sal v zweren.

25

Ende hi berispede abimelech om een put waters: die hem siuen knechten ghenomen hadden wt crachte.

26

Ende abimelech antwoerde Ic en wiste niet wie dese dinc gedaen hadde. Mer du en seidest mi oec niet. Ende ic en hebs oec niet gehoert. sonder huyden

27

Ende aldus nam abraham scapen ende ossen: ende gafse abimelech. Ende si sloeghen beide beloeften.

28

Ende abraham settede die seuen ionghe oyen besiden vanden cudden.

29

Ende abimelech seide Wat willen hem dese seuen ionghe oyen: die du besiden hebste doen staen?

30

Abraham seide. Du sulste die seuen oyen ontfaen. van mijnre hant. om dat si mi een oercontscap sullen sijn: dat ic desen put groef.

31

Hier om wort dye stat gheheten bersabee. want si zworen daer beide:

32

ende aenghinghen beloefte omden put des eedts.

33

Ende ahimelech stont op. ende phicol die prince van sijnen here: ende si keerden weder in palestijnen lant. Mer abraham plante een bosch in bersabee. ende hi aenriep daer des heren naem des ewighen gods:

34

ende hi was vele daghen een aertwinre van der philisteen landen