Bible in duytsche (Delftse bijbel 1477)

Ca .xviij.

1

ENde die here openbaerde abraham in die valeye mambre: daer hi zat in die dore sijure woninghen in die hetten vanden daghe.

2

Ende doe hi sijn oghen opgheheuen had: so openbaerden hem drie mannen staende om sijnen wille. Doe abraham dese ghesien hadde. soe liep hi vander dore sijnre woninghe in haere gemoete: ende hi aenbedese opter aerden:

3

ende seide. Here of ic gratie geuonden heb in dinen oghen soe en lijt dinen knecht niet

4

mer ic sal halen een luttelkijn waters. ende v sullen uwe voeten worden ghedwoghen: ende rust onder den bome.

5

Ende ic sal hier leggen een brocke broots. ende vermaect v herte: ende daer nae suldi liden. Want hier om soe sidi nederghecomen tot uwen knechte. Sij seiden duet alstu ghesproeken hebste.

6

Ende abraham haeste hem inder woninghe tot saram: ende seide haer. Haeste di. ende neme drie satum beslachs: ende make brode onder die assche gebacken

7

Ende hi liep ten vee: ende nam aldaer een alte tederen calf ende alte guet: ende hi gaft enen kinde. Ende het haeste hem ende zodet.

8

Ende abraham nam butter ende melc. ende dat calf dat hi gezoden hadde: ende hi setter voer hem. Mer hi stont neuen hem onder den boem.

9

Ende doe si ghegeten hadden: so seiden si tot hem. Waer is sara dijn wijf?

10

Hy antwoerde sich si is in die tabernacule. Sij seiden hem. Wederkerende so sal ic wedercomen totti te desen tiden. bliue ic te liue: ende sara dijn wijf sal heb-

[p. *22]

ben enen zoon. Doe sara dat hoerde: soe loech si achter die dore vanden tabernakel.

11

Want si waren beide out. van tidigher outheit: ende sara had gelaten te gheschien wijflicheiden

12

Ende si loech al heymelic ende seide: Na dien dat ic out bin geworden ende mijn here herde out is. soe sal ic naersticheit gheuen ter weelden:

13

Ende die here seide tot abraham. Waer om soe loech sara dijn wijf seggende: sal ic die een quene bin waerliken ghebaren?

14

Is god yet pijnlic te doen? Also ic gheseit heb sal ic comen tot di tot desen seluen tide. bliue ic te liue: ende sara sal enen zoon hebben.

15

Sara versaectet ende seide ic en loech niet: om dat si van vresen veruaert was. Ende die here seide ten is also niet sara: mer du loechs.

16

Ende doe die mannen vandaen opgestaen waren. soe sloegen sij haer ogen teghens sodoma: ende abraham ghinc mede: ende geleydese.

17

Ende die here seide. Sal ic abraham mogen helen dat ic doen sal.

18

als hi te worden staet in groet volc ende alte starc: ende als in hem te ghebenedien sijn alle die geslachten der werlt?

19

Ic weet dat hi sijn kinder ghebieden sal. ende sijn huys nae hem dat sij des heren wech wachten: ende dat sij doen gherechticheit ende vonnissen: dat die here toebrengen moet om abrahams wille alle dat hi tot hem ghesproken heuet.

20

Ende die here seide. Die roop van sodoma ende gomorra is gemenichfoudicht: ende haer sonde is vermeerret harde seer.

21

Ic sal nedergaen ende besien: of si den roop die tot mi gecomen is hebben voldaen mit wercken. of niet dat ict mach weten.

22

Ende si keerden hem van daer: ende si ghinghen wech tot sodoma waert. Mer abraham stont noch voerden here:

23

ende hi ghinc hem naerre ende seide. Salstu den gerechtighen verliesen mitten quaden/1

24

Of vijftich gerechtige menschen in die stede sijn: sullen si te gader veruaren. ende en salstu niet sparen die stat om die vijftich gherechtighe. of si daer in sijn.

25

Dat moet van di sijn. dattu dat doen sels: dattu den gherechtigen mitten quaden doden sels: ende dat die gherechtighe worden sullen mitten quaden Dat en behoert di niet toe: die alle dat lant vonnisses. Gheens sins en sulstu dit vonnis doen.

26

Ende die here seide tot hem. Vinde ic in sodoma vijftich gherechtighe menschen in midden die stede: ic salt alle die stede verlaten om haren wille.

27

Abraham antwoerde ende seide. Om dat ic eens begonnen hebbe: so sal ic spreken tot minen here al bin ic ghemul ende assche.

28

Offer vijf min is dan vijftich gherechtighe: salstu alle die poerten ofdoen om die vijf ende veertich? Ende die here seide. Ic en salse niet ofdoen op dat icker vinde vijf ende veertich.

29

Ende abraham sprack echter totten heer ende seyde. Ende ofter veertich gheuonden wort Wat salstu dan doen? Hi seide. Ic en salse niet slaen om die veertich.

30

Ende abraham seide heer ic bidde dattu niet en veronwaerdes dat ic spreke. Wat ofter daer dortich gheuonden worden hi antwoerde. Ic en salse niet ofdoen vinde ic daer dortich.

31

Ende abraham sey-

[p. *23]

de om dat ic eens begonnen hebbe: so sal ic minen here spreken. Wat offer twintich geuonden wort? Hi antwoerde ende seide. Ic en salse niet doden om die twintich.

32

Ende abraham seide ick bidde di here dattu niet toernich en wordes: dat ic noch eens spreke. Wat offer daer tyen gheuonden wort? Hy seide. Ic en salse niet ofdoen om die tyen

33

Die here ghinc wech na dien dat hi op hielt teghen abraham te spreken. Ende abraham keerde weder tot sijnre stat.