Bible in duytsche (Delftse bijbel 1477)

§ capittel .xvi.

1

SAray abrams wijf en had gheen kinder ghewonnen. mer si had een ioncwijf wt egipten die agar hiet

2

ende si seide haren man. Sich die heer heeft mi besloten dat ic niet gebaren en mach: ganc in tot minen ioncwiue: of ic machscien van haer kinder mach ontfaen. Ende doe abram ghehoert had haer bede:

3

so nam si haer ioncwijf. na thien iaer dat sij begonsten te wonen in dat lant van chanaan: ende gafse haren man tot enen wiue.

4

Ende hi ghinck in tot haer Ende doe si sach dat sij ontfaen hadde: soe versmade sij haer vrouwe.

5

Ende saray seide tot abram. Du does onrechtelic teghens mi. Ic heb mijn ioncwijf gegeuen in dinen scoet: ende als si siet dat si ontfaen heeft. so heeft si mi in versmaetheeden. Die heer moet vonnissen tusschen di ende my.

6

Ende abram antwoerde haer. Sich seide hi dijn ioncwijf is in dijnre hant ghebruycse als du wils Mer doe haer sarai quelde: nam si die vlucht.

7

Ende doese des heren enghel gheuonden hadde neuens eenre fonteynen waters inder woestinen die inden wege is inder wildernissen sur:

8

soe seide hi tot haer. Agar sarays ioncwijf. waen coemstu: ende warwaert gaestu. Si antwoerde Ic vlie van saray mijnre vrouwen aensichte.

9

Ende des heren engel seide haer Kere weder tot dijnre vrouwen: ende

[p. *20]

worde veroetmoedicht onder haer hant

10

Ende echter seide hi. Menichuoudende sal ic dijn zaet menichuoudigen: ende men en sals niet moghen tellen ouermits der menichte.

11

Ende hi seide noch voert: sich. du hebste ontfaen. ende du salste gebaren enen zoon: ende du salste sinen naem heeten ysmahel: om dat god dijn vernoy gehoert heeft.

12

Dit sal een wreet man wesen. Sijn hant sal sijn teghen alle menschen: ende alle menschen tegen hem: ende hi sal setten sine woninghe teghen alle sine broederen

13

Ende agar heete des heren name die tot haer sprack: du god die mi saghes Want si seide. Waerlick sach ic hier dat achterste des gheens die my sach.

14

Daer om heete di den put: die put des leuende ende des gheens die mi sach. Dese put is tusschen cades ende barad.

15

Ende ager gebaerde abram enen zoon: Ende hi heet sijnen naem ysmahel.

16

Abram was out ses ende tachtich iaer: doen agar hem ysmahel gebaerde