Bible in duytsche (Delftse bijbel 1477)

§ Capittel .xiiij.

1

IN dien tiden geschiede dat amraphel die coninc van sennaar. Ende arioch die coninc van ponthi ende chodorlaomor die coninc van elamiten. ende thadal die coninc van luden.

2

aenghinghen strijt tegen basa die coninc van sodoma: ende teghen barsa die coninc van gomorraa. ende tegens sennaar die coninc van adame. ende teghen semeber die coninc van seboym. ende teghen den coninc van bale: dat is segor.

3

Alle dese quamen in des bossche valeye: dat nu is die soute zee

4

Want si hadden twalef iaer ghedient chodorlaomor: ende inden dorthienden iaer soe ghinghen si hem of.

5

Dus soe quam inden veertienden iaer. chordorlaomor ende die coninghen die mit hem waren ende si sloegen raphaim in aftaroth ende carnaym. ende zuzim mit hem: ende enim in sauhe chariatharim.

6

ende chorreos inden bergen van seyr. totten campaengen van pharan: die inder wildernissen is.

7

Ende si keerden weder ende si quamen ter fonteynen mesphat. dat is cades: ende si sloeghen alle dat lantscap vanden amalechiten. ende die amorreeusche die woenden in asasonthamar

8

Ende die coninc van sodoma. ende die coninc van gomorra. ende die coninck van adame. ende die coninc van seboym ende die coninc van bale dat is segor. quamen wt. ende si maecten scaren inden bosch valeye:

9

dat is te weten teghen chordorlaomor die coninc van elamiten. ende tegen thadal die coninc der luden. en teghen amraphel die coninc van sennaar ende teghen arioch die coninc van ponti: vier coninghen tegens vijf.

10

Mer die bosch valeye hadde veel putten van lime. Ende die coninc van sodoma ende die coninc van gomorra. keerden haer rugghen ende si vielen al daer: ende die bleuen waren. vloghen totten berghe.

11

Ende si na-

[p. *18]

men alle die van sodoma. ende gomorra haer guet. ende alle datter spisen toebehoefde: ende sij ghingen wech:

12

ende si namen oec loth abrams broeders zoen die in sodoma woende: erde al sijn guet

13

Ende sich ene die ontlopen was. boetscaptet abram den hebreeuschen: die woende in die valeye mambre des amorreusche. die eschols brueder was. ende aners broeder Want dese hadde belofte gedaen mit abram.

14

Doe abram dit ghehoert hadde. dat loth sijnen broeder gheuanghen was. soe telde hi sijn gerede knapen drie hondent ende achtien: ende hi volghede hem na tot dan.

15

Ende hi deilde die gesellen: ende viel op hem inder nacht. Ende hi sloechse ende volchdese na tot soba ende phenicen: die ter slincker ziden is van damasco.

16

Ende hij brocht weder alle dat guet: ende loth sijn broeder mit alle sijnen guede: ende die wiuen ende dat volc.

17

Ende die coninc van sodoma quam wt in abrams ghemoete: in die valeye sabe dat is des conincs valeye: na dien dat hi wederghekeert was vander slacht chordorlaomors. ende der coninghen die mit hem. waren.

18

Mer uuelchisedech die coninc van salem. brocht voert broot ende wijn want hi was des alre hoechsten godes paep:

19

ende hi gebenedide hem. ende seyde. Abram sij ghebenedijt vanden hogen gode. die sciep hemel ende aerde:

20

ende ghebenedijt sij die hoghe god: bi wies beschermen die vianden in dinen handen gheleuert sijnp Ende abram gaf hem die thienden van allen.

21

Ende die coninc van sodoma seide tot abram. Ghif mi die zielen: ende die ander neem in dijn behoef.

22

Hi antwoerde hem Ic heffe mijn hant op totten heer den hoghen god besitter des hemels ende der aerden: dat ic niet nemen en sal van allen dein dat dijn is

23

vanden drade des ondercleets tot ten rieme vander cousen. op dattu niet segghen en moghes:

24

ic hebbe abram rijc gemaect: wt genomen tghene dat die ionghen ghegheten hebben. ende deser mannen deel die mit mi quamen. aner eschol. ende mambre. Dese sullen haer dele nemen.