Bible in duytsche (Delftse bijbel 1477)

§ Ca .xiij.

1

WT egipten ghinc doe abram: ende sijn wijf ende alle dat hi had. ende loth mit hem: ter zwtzide waert:

2

want hi was herde rijc in besittinghen van goude ende van siluer.

3

Ende hi keerde weder alle den wech dien hi comen was van suden tot bethel. totter stat daer hi eerst sijn woninghe had gheset tusschen bethel ende hay.

4

in die stat vanden outaer dat hij eerst had gemaect: ende daer hi anriep des hereen naem.

5

Mer loth die mit abram was. had ooc cudden van scapen. ende vee. ende woninghen:

6

ende dat lant en mochtse niet beuaen datse te gader wonen mochten. Want haers guets was soe vele. Dat sij niet ghemeenlic en mochten wonen.

7

Waer bi dat oeck een ghescheel gheschiede tusschen die harden van abrams cudden ende loths cudden. Want in dien tiden woenden int lant chananeus ende phereseus.

8

Daer om seide abram tot loth. Ic bidde dat gheen ghescheel en si tusschen di ende mi: ende tusschen dijn herden ende mijn herden. Want wi sijn gebroeders.

9

Sich alle dat lant is voer di. Ganc van mi dat bid ic di. Ende ist dattu ter luchter ziden gaes. soe sal ic ter rechter ziden houden: ist dattu ter rechter ziden kieses: soe sal ic ter luchter ziden tiden

[p. *17]

10

Dus hief loth sijn ogen op. ende sach alt lant omtrent die iordane. dattet al wort veruerschet. eer dat die heer versincken dede sodomam gomorram als dat paradijs des heren: ende als egipten den ghenen die comen in segor.

11

Ende loth coes tot sijn behoef dat lantscap omtrent die iordanen: ende toech wech van oosten Ende sij worden ghescheiden die een broeder vanden anderen.

12

Abram woende int lant van chanaan. Ende loth woende omtrent die iordane inden poerten die daer bi waren: ende hi woende in sodoma.

13

Mer die menschen van sodoma waren alte quaet: ende sondaers voer den heer alte seer.

14

Ende die heer seide tot abram: nadien dat loth van hem ghescheiden was. Hef op dijn oghen ende sich van dier stat dair du nu bist: ten noerden ende ten zuden. ten oesten ende ten westen waert.

15

Alle dat lant dattu sieste: sal ic di gheuen ende dijn sade tot in eweliken.

16

Ende ic sal dijn saet maken als gemul der aerden Soe wat mensche dat ghemul der aerden mach tellen: hi sal oeck dijn saet moghen tellen.

17

Stant op ende doerwander dat lant: in sijn lengde ende in sijn wide: want ic salt di gheuen.

18

Dus soe ruerde abram sijn woninghe. ende quam ende woende neuen die valeye mambre die in hebron is. Ende daer so stichte hy den here een outaer