Bible in duytsche (Delftse bijbel 1477)

§ Ca .xij

1

ENde die here seide tot abram. Ganck wt dinen lande ende van dijnre maechscappen. ende van dijns vaders huys: ende coem int lant dat ic di tonen sal:

2

ende ic sal di maken in een groet volc: ende ic sal di ghebenedien. ende sal dijnen naem groet maken ende du sels wesen ghebenedijt.

3

Ende ic salse ghebenedyen die di ghebenedien sullen: ende ic salse vermaledien die dij vloeken sullen: ende in dij sullen worden ghebenedijt alle die gheslachten der aerden.

4

Ende aldus ghinck abram wt alsoe als hem die here beuolen had: ende loth ghinc mit hem. Abram was vijf ende tseuentich iaer out: doe hi wt aran ghinc.

5

Ende hi nam saray sijn wijf ende loth sijns broeders zone. ende alle haer goet dat sij beseten hadden: ende die zielen die sij gemaect hadden in aram ende sij ghinghen wt om dat si gaen souden int lant van chanaan. Ende doe si daer gecomen waren:

6

doe doerleet abram dat lant totter stat van sychem: ende totter voerbariger valeyen. Want dat volc van chanaan. was doe int lant.

7

Ende die here openbaerde abram: ende seide hem Dinen zade sal ic dit lant gheuen Ende hij stichte daer den here die hem open-

[p. *16]

baert was een outaer: ende hij anriep daer sijnen naem

8

Ende hi ghinck van daer ouer toten berghe die teghen dat oosteynde was van bethel. ende daer maecte hi of spreide hi wt sijnen tabernakel: ende hi hadde van west bethel: ende hay van oost. Ende daer stichte hij oec den here een outaer: ende aenriep sinen name

9

Ende abram tide gaende: ende voerwert tidende te zuden waert.

10

Ende die hongher wort ghemaect inden lande. Ende abram ghinc neder in egipten: om dat hi daer pelgrimage doen soude Want die honger was machtich gheworden in dat lant.

11

Ende alst daer bi was dat hi in egipten gaen soude: so seide hi saray sinen wiue Ic weet dattu een schoen wijf sijs:

12

ende als die van egipten di syen sullen. dat si segghen sullen het is sijn wijf: ende si sullen mi doden. ende di houden.

13

Daer om bid ic segt. dattu mijn suster sijs. op dat mi om dinen wille wel sijn mach: ende dat mijn ziel leuen mach om die gracie van di.

14

Ende doe abram in egipten comen was: doe sagen die van egipten dat wijf dat si alte schoen was.

15

Ende die princen bootscaptent pharaom: ende prezense voer hem Ende dat wijf wort gehaelt in pharaoins huys:

16

ende si deden oeck abram wel om haren wil. Ende abram waren scapen. ende ossen. ende ezelen. ende ezelinnen. ende camelen. ende knechten. ende ioncwiuen.

17

Ende die here gheselde pharaonem mit groter plagen. ende sijn huys: om sarai abrams wiue

18

Ende pharao riep abram: ende seide. Wat ist dattu mi ghedaen hebtste?

19

waer om en seitstu mi niet dattet dijn wijf was? Om wat sake seitstu dattet dijn suster was: ende dat icse nemen soude mi tot enen wiue? Nu sich hier dijn wijf: neemtse ende ganc.

20

Ende pharao geboet op abram mannen: dien geleiden ende sijn wijf: ende alle dat hi had