Bible in duytsche (Delftse bijbel 1477)

Ca. xi

1

MEr dat lant was eens lippen ende van geliker spraken.

2

Ende doe sij togen van oosten. doe vonden sij een velt int lant van semaar: ende sij woenden daer in

3

Ende die een seide totten anderen. Coemt maken wi quarelen ende laetse ons backen mitten vuere. Ende sij hadden tegel voer steen. ende lime voer moerter: ende sij seiden.

4

Coemt maken wij ons een stede. ende enen toorn die totten hemel gereyke: ende vieren wi onsen naem eer wij ghedeylt worden in allen landen.

5

Ende die here quam neder om die stede te besien. ende die toorne die adams kinder stichten: ende seide.

6

Siet dit volc is een. ende een lippe is in hem allen Ende sij beghinnen dit te maken: ende sij en sullen niet oflaten van haren ghepeysen voer dat sijse voldaen hebben mitten wercken.

7

Hier om coemt ga wi neder ende scheiden haer tonghen: soe dat elck niet en hore sijns naesten stemme.

8

Ende aldus scheidese die here van dier stat in allen landen: ende sij lieten die stede te stichten.

9

Ende hier om wort haer name vander stat gheheeten babel: want daer wort ghescheiden die lippe van allen landen Ende van daer soe scheidese god op dat aensicht van allen lantscappen.

10

Dit sijn sems gheslachten. Sem was hondert iaer out doe hi wan arphaxat: dat was twe iaer nader diluuien.

11

Ende sem leefde na dien dat hi arphaxat wan vijf hondert iaer: ende wan zonen ende dochteren.

12

Oeck leefde arphaxat vijf ende

[p. *15]

dortich iaer: ende wan sale.

13

Ende arphaxat leefde na dien dat hi sale wan drie hondert iaer ende drie: ende wan zonen ende dochteren.

14

Sale leefde dortich iaer: ende wan heber.

15

Ende sale leefde na dien dat hi heber wan vier hondert iaer ende drie: ende wan zonen ende dochteren.

16

Ende heber leefde. vier ende dortich iaer: ende wan phalech.

17

ende heber leefde nae dien dat hi phalech wan vier hondert iaer ende dortich: ende wan zonen ende dochteren.

18

Ende oeck leefde phalech dortich iaer ende wan reu.

19

Ende phalech leefde na dien dat hi reu wan twe hondert. iaer ende neghen: ende wan zonen ende dochteren.

20

Ende reu leefde vijf ende twintich iaer: ende wan sarnch.

21

Ende reu leefde nae dien dat hi saruch wan twe hondert iaer ende seuen: ende wan zonen ende dochteren

22

Ende saruch leefde dortich iaer: ende wan nachor.

23

Ende saruch leefde nae dien dat hi nachor wan twe hondert iaer: ende wan zonen ende dochteren.

24

Ende nachor leefde neghen ende twintich iaer: ende wan thare.

25

Ende nachor leefde nae die dat hi thare wan hondert iaer ende negentyen: ende wan zonen ende dochteren.

26

Ende thara leefde tseuentich iaer: ende wan abram. ende nachor. ende aram.

27

Want dit sijn thares gheslachten. Thare wan abram. nachor. ende aram Mer aram wan loth.

28

Ende aram starf voer sijnen vader thare: int lant sijnre geboerten. in hur van chaldea.

29

Ende abram. ende nachor namen wiuen. Abrams wijfs naem was: saray Ende nachors wijfs naem was: melcha arams dochter melchen vader ende iesschen vader.

30

Mer saray was ondrachtich: ende sij en had gheen kinderen.

31

Dus nam thare abram sijnen zoon. ende loth arams sijns zoons zoon: ende sarai abrams wijf sijn ghehuwede dochter. ende hi leidese wt hur van chaldea dat sij gaen souden int lant van chanaan. Ende sij quamen in aram. ende sij woenden daer.

32

Ende thares daghen worden gemaect twee hondert iaer ende vijf: ende hi is doot in aram