Bible in duytsche (Delftse bijbel 1477)

§ Ca .ix

1

ENde god ghebeuedide noe ende sine zonen: ende seide tot hem. Wast ende wort ghemenichfoudicht ende veruolt die aerde:

2

ende uwe vrese ende anxt si op alle die dieren der aerden: ende op alle die gheuoghelte des hemels mit alle die beruert worden opter aerden. Alle die visschen der zee sijn tot uwer hant gheleuert:

3

ende alle dat beruert wort ende leeft. dat sal v sijn in spise. Ic hebse v alle geleuert als groeyende koelen. dat wt genomen.

4

dat gi dat vleisch mitten bloede niet eten en sult.

5

Want ic sal versoken tbloet van uwer zielen van alre beesten hant. ende van des menschen hant. Van eens mans hant ende sijns brueders hant sal ic versoeken des menschen ziel.

6

So wie dat wt storten sal des meschen bloet: men sal sijn bloet wt storten. Want die mensche is ghemaect te goods beelde.

7

Mer wast gij luyde ende wort ghemenichfodicht: ende gaet in opter aerden: ende veruoltse.

8

Dit seide oeck god tot noe: ende tot sinen zonen mit hem.

9

Siet ic sal mine belofte setten mit v luyden. ende mit uwen zade na v.

10

ende tot elker leuender zielen die mit v is. beide in vogele ende in quicke ende mit alle vee der aerden: ende mit allen die wt gegaen sijn van der arcken: ende mit allen beesten der aerden.

11

ic sal mine belofte setten mit v ende gheens sijns en sal voertmeer alle vleysch. worden ghedoot mitten wateren vander dilnuien: ende die diluuie en sal voertmeer nimmermeer sijn alle die aerde verderuende

12

Ende god seide Dat sal wesen dat teiken der beloften dat ic gheue tusschen mi ende v: ende tot elker leuender zielen die mit v is inden eweliken geslachten.

13

Ic sal mijn boge setten in die wolken des hemels. Ende dat sal sijn dat teiken der beloften tusschen mi ende der aerden.

14

Ende als ic den hemel sal hebben ouertoghen mit wolken so sal mijn boghe openbaren inden wolken:

15

ende ic sal ghedenckeu mijns beloften mit v: ende mit allen leuenden zielen die dat vleisch doet leuen: ende die wateren der diluui-

[p. *13]

en en zullen voertmeer niet sijn om of te doen alle vleysch

16

Ende mijn boghe sal wesen inden wolken: ende ic sallen syen ende ic sal ghedencken der eweliker beloften: die geset is tusschen gode ende elcker leuender zielen van allen vleisch dat bouen der aerden is.

17

Ende god seide tot noe. Dat sal wesen dat teyken der beloften na dat ic gheset heb tusschen mi ende alle vleysch opter aerden

18

Dus waren dit noes zonen die gegaen waren wt der arcken: sem. cham ende iaphet. Mer cham was chanaans vader.

19

Dit sijn drie noes zonen: ende van desen is ghedeilt alle menschelike geslachte bouen der aerden.

20

Ende noe wort een man een ackerman ende begonste dat lant te oeffenen: ende hi plante den wijngaert.

21

Ende hi dranck wijn ende hi wort droncken: ende hi wort ondect ende lach in sijnre woninge.

22

Doe dat cham chanaans vader gesien had. dat sijns vader schamelheiden ondect waren: soe boetscapte hijt sijnen tween broederen daer buyten.

23

Mer sem ende iaphet. leiden op haer scouderen enen mantel: ende sij ghinghen daer mede achterwaert: ende decte haers vaders scamelheden. Ende haer aensicht waren daer ofghekeert: ende si en zagen haers vaders manlicheden niet.

24

Ende doe noe ontwakede vanden wijn: ende hi verstaen had dat hem sijn minste soen gedaen had. soe sprac hi.

25

Vermaledijt sij chanaan: hi sal sijnen broederen knecht der knechten wesen.

26

Ende hi seide. Die here god sems sij ghebenedijt: ende chanaan sij sijn knecht

27

God moet iaphet breeden. hi sal wonen in sems woninge: ende chanaan moet sijn knecht sijn

28

Ende noe leefde uader diluuien drie hondert iaer ende vijftich:

29

ende alle sijn dagen worden ghemaect neghen hondert ende vijftich iaer: ende hi is doot.