Bible in duytsche (Delftse bijbel 1477)

§ Ca.viij.

1

GOd ghedachte noe ende alle der dieren. ende alle des quic die mit hem waren in die arcke. Ende hi brochte den gheest bouen der aerden ende die fonteinen des afgronts worden ghesloten. ende die wateren worden vermindert:

2

ende die wolken des hemels. ende die regenen worden verboden vanden hemel.

3

Ende die wateren keerden vander aerden. gaende ende wederkerende: ende si begonsten te minderen. na hondert ende vijftich daghen

4

Ende opten seuen ende twintichsten dach inder seuender maent. so rustede die arcke opten berch van armenien.

5

Ende die wateren ginghen ende minderden. totter tiender maent. Ende opten eersten dach vander tiender maent. so openbaerden die coppen vanden berghen.

6

Ende doe veertich daghen gheleden waren. so dede noe op dat venster vander arcken dat hi ghemaect had

7

ende liet den rauen vlieghen: ende hi voer wt: ende en keerde niet weder voer dat die wateren ghedroghet waren bouen der aerden.

8

Oeck liet hi vliegen die duue na hem: om dat hi sien soude of die wateren opghehouden waren op die aensichten der aerden

9

Ende doe sij niet en vant daer haer voet rusten mochte: so keerde si weder tot hem in die arcke Want die wateren waren noch bouen alle der aerden. Ende hi stac sijn hant wt:

10

ende doe hi noch ander seuen daghe gebeit had: so liet hi echter die duue vliegen wt der arcken.

11

Ende si quam des auonts weder tot hem: ende brocht in haeren mont een rijs van eenre oliue mit groeyenden bladeren Daer om verstont noe dattie wateren opghehouden waren bouen der aerden.

12

Ende echter ontbeide hi seuen ander daghe: eude hi sende die duue weder wt: ende si en keerde voertmeer niet weder tot hem.

13

Aldus worden die wateren gemindert bouen der aerden. naden seshondersten iaer in den eersten iare van noes leuen inden eersten dach vander maent. Ende noe dede op dat venster vander arcken: ende hi besconwede ende sach dat dat bouenste vander aerden ghedroget was.

14

Op ten seuen ende twintichsten dach vander ander maent so was die aerde ghedroghet.

15

Ende god sprak tot noe ende seide

16

Ganc wt der der arcken du ende dijn wijf. dijn zonen. ende dijnre zonen wiue mitti:

17

ende leide wt mitti alle die dieren die bi di sijn. van allen vleisch beide in

[p. *12]

gheuogelte ende in beesten ende alle crupende dieren ende die crupen bouen der aerden leitse mitti wt ende gaet wt opter aerden. Wast ende wort gemenichfoudicht bouen der aerden.

18

Daer om ginc noe wt ende sijn zonen. sijn wijf ende sijnre zonen wiuen mit hem:

19

ende oeck so ghinghen vter arcken alle beesten. ende quic ende crupende dieren die crupen opter aerden. na haren geslachte.

20

Ende noe stichte den here een outaer: ende hi nam van allen den suueren quicke ende vanden suueren vogelen ende hi offerde holocaust opten outaer

21

Ende die here roec den roec der sueticheit: ende hi seide tot hem. Gheens sijns en sal ic voertmeer die aerde vermaledyen om der menschen wille. Want des menschen hert ende gepeise sijn ghereet in quaet van haere ioncheit. Hier om en sal ic niet verslaen veertmeer dat dat lijf in heeft alsoe ic ghedaen heb.

22

In allen den dagen der aerden dat saet ende die ooxt. coude ende hetten. zomer ende winter nacht ende dach en sullen sij niet rusten.