Bible in duytsche (Delftse bijbel 1477)

§ Ca.vij.

1

ENde die here seide tot noe Ganc in die arcke du ende alle dijn huys Want di heb ic ghesien gherechtich voer mi in desen gheslachte.

2

Van allen suueren beesten sulstu nemen seuen ende seuen. manne ende wiue: ende vanden onsuueren dieren twe ende twe. man ende wive:

3

ende oeck vanden voghelen des hemes sulstu nemen seuen ende seuen. man ende wiue. dattet saet mach worden gehouden op die aensichte van alle der aerden.

4

Wat noch na seuen daghen sal ic regenen bouen der aerden veertich dage ende uachte: ende ic sal ofdoen alle dat ic ghemaect heb bouen der aerden

5

Hier om dede noe al dat hem god die heer gheboden had.

6

Ende noe was ses hondert iaer out: doe die wateren van der diluuien vloeyden opter aerden.

7

Ende noe ghinc iu die arcke ende sijne zonen. ende sijn wijf. ende sijnre zonen wiue mit hem: om die wateren vander dilunien.

8

Ende vanden suueren ende onsuueren dieren. ende voghelen ende van alle dien dat beruert wort bouen der aerden.

9

twe ende twe quamen tot noe inder arcken man ende wijf: also hem god beuolen hadde.

10

Als seuen daghen waren geleden: twater der diluuien ouernloeyde al aertrijck.

11

In desen seshondersten iaer van noes leuen in die auder maent inden seuenthienden dage vander maent Soe worden gescoert alle die fonteynen des groten afgronts: ende die wolken des hemels worden ondaen.

12

ende het wert een regen opter aerden veertich dagen ende veertich nachten

13

Ende in een wile des daghes soe inghinc noe. ende sem ende cham. ende iaphet sijn zonen. ende sijn wijf ende sijnre zonen wiue mit hem in die arcke:

14

ende elc diere nae sijne geslachte ende alle quicke na sijn gheslachte ende alle dat beruert wort inder aerden in sijn geslachte: ende alle gheuogelte na sijnre manieren.

15

Ende alle voghelkijn quamen tot noe in die arcke: twe ende twe van allen vleysche daer die gheest des leuens in was.

16

Ende in die arcke quamen man ende wijf ende allen vleysche: also hem god beuolen had: ende die heer slootse daer in van buyten.

17

Ende die diluuie wort gemaect bouen der aerden veertich dage: ende die watere worden gemenichuoudicht Ende sij hieuen die arcke hoge op vander aerden.

18

Want die wateren vloeyden anxtelic: ende si veruoldent al bouen der aerden. Oeck wort die arcke ghedraghen bouen den wateren:

19

ende die wateren worden seer crachtich bouen der aerden. Ende alle die hoghe bergen worden ouerdect onder alle den hemel.

[p. *11]

20

Ende vijftien cubitus was dat water hogher bouen alle geberchte die si bedect had.

21

Ende alle vleysch wort verteert dat bouen der aerden beruert wort Van vogelen van dieren van beesten. ende van allen crupende dieren. die crupen opter aerden

22

Alle menschen ende alle daer adem in was des leuens inder aerden. bleuen alle doot.

23

Ende god dede of alle dat bouen der aerden was vanden mensche totten quicke. beide crupende dieren ende die voghelen des hemels: ende si worden of gedaen vander aerden. Mer noe bleef alleen: ende die met hem in die arcke waren.

24

Ende die wateren der diluuien hielden bouen die aerde hondert ende vijftich daghen.