Bible in duytsche (Delftse bijbel 1477)

§ Capittel .vi.

1

ALs die menschen begonsten te worden ghemenichuoudicht bouen der eerden: ende si dochteren ghewonnen hadden.

2

Soe saghen die goids sonen der menschen dochteren dat si scoen waren: ende si namen wiuen van alle die si cosen

3

Ende god seide. Mijn gheest en sel niet bliuen inden mensche ewelike: want hi es vleysch Ende sijn daghe sullen wesen van hondert ende twintich iaren

4

Mer in dien daghen waren gyganten bouen der airden. Want na dien dat gods sonen inghinghen totter menschen dochteren ende die wiuen ghebairden: dit sijn die machtighe vander werelt: die vermaerde mannen.

5

Mer doe god sach dat dies menschen quaetheit veel was inder aerden: ende alle gepeis des herten was aendachtich totten quade in allen tiden:

6

Soe wast hem leet dat hi den mensche gemaect had inder aerden. Ende om dat hi verwachten wilde int nacomen. ende om dat hi getast wort binnen mit rouwen des herten

7

so seide hi: ic sal ofdoen vandeu aensichte der aerden den mensche dien ic sciep. vanden mensche tot den dieren: vanden crupenden totten vogeleu des hemels. Want mi berouwet dat icse ghemaect hebbe

8

Mer noe vant gracie voer gode.

9

Ende dit sijn noes geslachten. Noe was een gerechtich man ende volmaect. in sijnen geslachten: hi wandelde mit gode.

10

ende wan drie zonen. sem. cham. ende iaphet.

11

Want alle die aerde was besmet voer gode: ende sij was veruollet mit quaetheden.

12

Ende doe god hadde ghesien dat die aerde besmet was: want elck vleysch had sijnen wech besmet bouen der aerden:

13

soe seide hi tot noe. Dat einde van allen vleysche is ghecomen tot mi. Die aerde is veruollet van haere quaetheden: ende ic salse verderuen inder aerden.

14

Make di een acker van ghescauen houte. Du salste woninghe maken inder arcken: ende du sulstese bestriken buyten ende binnen mit lime:

15

ende aldus sultuse maken. Der arcken langhe sal sijn van drie hondert cubiten: ende die wide van vijftich cubiten: ende haer hoecheit sal sijn dortich cubiten.

16

Du sels een venster maken inder arcken: ende haer hoecheit sulstu einden in een cubitus. Mer die dore vander arcken salstu setten in die zide nederwaert Eet cameren ende drie ander cameren salstu daer in maken.

17

Sich ic sal brenghen bouen der aerden die diluuie vanden watere om dat ic doden sal alle vleysch daer die gheest des leuens in is onder den hemel: ende al dat inder aerden is sal worden verteert.

18

Ende ic sal mine belofte mitti setten: ende du sals in die arcke gaen du ende dijn zonen. dijn wijf. ende dijnre zonen wiuen mitti:

19

ende van allen dieren ende van allen

[p. *10]

vleysch soe sulstu daer twe leiden in die arcke. dat si leuen moghem mit di. van manliken ende wijfliken maecselen.

20

Vander vogelen na haere gheslachte: ende vande quicke in sijne geslache. Ende van allen crupende dieren der aerden. na haere manieren: van elken twe ende twe sullen mit die ingaen. dat si leuen momogen.

21

Hier om sulstu mitti nemen van allen spisen diemen eten mach. ende du snlstese mitti drageu: ende si sullen beide di ende dinen kinderen wesen in spise.

22

Aldus dede noe al dat hem god gheboden hadde