Bible in duytsche (Delftse bijbel 1477)

§ Capittel .v.

1

DIt is dat boeck van adams gheslachte: in dien daghe dat god die here den mensche sciep.

2

Ter ghelikenisse goods maecte hi den man: Ende dat wijf sciep hi. ende hi gebenedijdse: ende hete haren naem adam in dien daghe dat si ghescepen waren.

3

Ende adam leefde hondert iaer ende dertich: ende hi wan enen zoon tot sijnen beelde ende te sijnre ghelikenisse: ende hi heet sinen naem seth.

4

Ende na dien dat adam seth wan worden alle sine daghe gemaect acht hondert iaer: ende wan zonen ende dochteren.

5

Ende alle die tijt dat adam leefde wort gerekent neghen hondert iaer ende dertich: ende hi is doot.

6

Ende seth leefde hondert iaer ende vijf: ende wan enos.

7

Ende seth leefde nadien dat hi enos wan acht hondert ende seuen iaer: ende hi wan zonen ende dochteren.

8

Ende alle seths dagen worden gemaect neghen hondert iaer ende twaelf: ende hi is doot.

9

Ende enos leefde tneghentich iaer: ende wan caynan.

10

Ende nae sijnre gheboerten leefde hi acht hondert iaer ende vijftien: ende hi wan zonen ende dochteren.

11

Ende alle enos daghen worden gemaect neghen hondert iaer ende vijf: ende hi is doot.

12

Ende caynan leefde tseuentich iaer: ende hi wan malaleel.

13

Ende caynan leefde nae dien dat hij malaleel wan acht hondert iaer ende veertich: ende hi wan zonen ende dochteren.

14

Ende alle caynans daghen worden gemaect neghen hondert iaer ende tien. ende hi is doot.

15

Ende malaleel leefde vijf ende tsestich iaer: ende hi wan iared.

16

Ende malaeel leefde nae dien dat hi iared wan acht hondert iaer ende dortich: ende wan zonen ende dochteren.

17

Ende al malaeels daghen worden gherekent acht hondert iaer ende vijf ende tnegentich ende hi is doot.

18

Ende iared leefde hondert iaer ende twe ende tsestich: ende hi wan enoch.

19

Ende iared leefde na dien dat hi enoch wan acht hondert iaer: ende hi wan zonen ende dochteren.

20

Ende alle iareds daghen worden ghemaect neghen hondert iaer ende twe ende tsestich: ende hi is doot.

21

Oec leefde enoch vijf ende tsestich iaer: ende hi wan matusalem.

22

Ende enoch wandelde mit gode. Ende enoch leefde na dien dat hi matusalem wan drie hondert iaer: ende hi wan zonen ende dochteren.

23

Ende alle enochs daghen worden gemaect drie hondert iaer ende vijf ende tsestich:

24

ende hi wandelde mit gode ende hi en openbaerde niet: want god nammen. of voerden wech.

25

Ende matusalem leefde hondert ende seuen ende tachtich iaren: ende wan lamech.

26

Ende matusalem leefde na dien dat hi lamech wan seuen hondert iaer ende twe ende tachtich: ende wan zonen ende dochteren.

27

Endede alle matusalems daghen worden gemaect negen hondert iaer ende negen ende tsestich: ende hi is doot

28

Ende lamech leefde hondert iaer ende twe ende tachtich: ende wan eenen sone:

29

ende hiet sinen naem noe ende seide. Dese sel ons vertroesten vanden werken ende vander pinen onser

[p. *9]

handen inder airden: die god vermaledijt heeft.

30

Ende lamech leefde na dien dat hi noe wan vijf hondert iaer ende vijf ende tnegheutich. ende wan sonen ende dochteren.

31

Ende alle lamechs daghe worden ghemaect seuen hondert iaer ende seuen ende tseuentich: ende hi is doot

32

Mer doe noe out was vijf hondert iaer: soe wan hi sem. cham. ende iaphet