Bible in duytsche (Delftse bijbel 1477)

§ Capittel .iiij.

1

ADam bekende euam sijn wijf: ende si ontfinc ende ghebairde cayn ende seide. Ic hebbe eenen mensche bezeten bi gode.

2

Ende echter so ghebairde si abel sinen brueder. Ende abel was een herde van scapen: ende cayn een lantwinre

3

Ende het gheschiede na veel dagen: dat cayn offeren soude den here ghiften

[p. *7]

vander aerden vruchten.

4

Abel offerde oeck vanden eerst gheboren sijns cudden: ende van haren vetten. Ende die heer aensach tot abel. ende tot sijnre ghiften

5

mer tot cayn ende tot sijnen ghiften en sach hi niet. Ende cayn wort alte seer gram: ende sijn aensicht viel nederwart

6

Ende die heer seide tot cayn.

7

Waer om bistu gram. ende waer bi valt dijn aensicht nederwart? Ofstu wel doetste en sulstu niet ontfaen? Ende en doestu niet wel: en sal die sonde niet te hant wesen binnen dijnre doeren. Mer onder di sal sijn die begeerte van hare. ende du sels heerscap bouen haer hebben.

8

Ende cayn seide tot sijnen broeder abel. Gae wi wt daer buyten. Ende doe si waren inden acker. so stont cayn op teghen sinen brueder abel: ende dode hem.

9

Ende die here seide tot cayn. Waer is abel dijn brueder. Ende hi antwoerde. Ic en weet des niet. Bin ic wachter mijns brneders?

10

Ende die here seide tot hem. Wat hebstu ghedaen? Die stemme van dijns brueders bloede. roept tot mi vander aerden.

11

Nu daer om sulste vermaledijt wensen opter aerden: die haren mont ondaen heeft ende ontfanghen heeft dijns brueders bloet van dijnre hant.

12

Alstuse wercken sels: so en sel si di hair vruchten niet gheuen. Du selst onghestadich ende vluchtich wesen bouen der airden.

13

Ende cayn seide totten here. Mijn quaetheit is meerre: dan dit ic waerdich bin te verdienen ghenadicheit.

14

Sich du sels mi huyden verdriuen vanden aensicht der airden: ende ic sel wordden verborghen van dinen aensichte: ende ic sel onghestadich ende vluchtich wesen. inder airden. Dair om so wie mi sel vinden hi sel mi doden.

15

Ende die here seide hem. Ten sel also niet gheschien: mer so wie dat cayn doden sel het sel seuenuout worden ghecastijt. Ende die heer sette in cayn een teyken: datmen niet doden en soude. so wie datten vinden soude

16

Ende cayn ghinc wech van des heren aensichte ende hi woende int lant vluchtich: ter oist ziden van eden.

17

Ende cayn bekende sijn wijf: ende si ontfinc ende ghebairde enoch Ende hi stichte een stat: ende hietse na sinen soen enoch

18

Enoch wan yrad Ende yrad wan maniahel: ende maniahel wan matusalem Ende matusalem wan lamech.

19

Dese nam twee wiuen. Der eenre naem was ada: ende der ander naem sella

20

Ende ada wan iahel. die der gheenre vader was die wonen in tenten. ende der herden:

21

ende sijns brueders name was tubal. Hi was der gheenre vader die singhen in chytaren ende in organen.

22

Oec wan sella tubalcayn: ende hi was een smit. in elken werck van metael ende van yser. Tubal cayns suster was. noemenia.

23

Ende lamech seide sinen wiuen ade ende selle. Hoort mijn stemme lamechs wiuen: hoort mijn redene. Want ic heb eneu man ghedoot in minen wonde: ende enen ionghelinc in minen nidicheit.

24

Seuenuout sal wrake ghegeuen worden van cayn: mer lamech salse ghegeuen worden. seuen ende tseuentich wrrf.

25

Ende adam bekende echter sijn wijf ende sij ghebaerde enen soon: seth ende seide.

[p. *8]

God heeft mi ghesent een ander saet ouer abel: die cayn dode.

26

Ende seth wort oec enen zoon gheboren: ende die hete hi enos. Dese began des heren naem an te ropen.