Bible in duytsche (Delftse bijbel 1477)

§ Capittel .ij.

1

DVs waren volmaect hemel ende aerde: ende alle haer verchieringhe.

2

Ende god voldede opten seuenden dach sijn werck dat hi ghemaect had: ende hi ruste opten seuenden dach van alle den wercke dat hi ghemaect had.

3

Ende god gebenedide den seuenden dach ende heilichden: want in dien daghe had hi op ghehouden van allen werck dat hi gheschepen had om dat hijt maken soude.

4

Dit sijn die geslachten des hemels ende der aerden als si ghescepen waren in dien dage dat god maecte hemel ende aerde:

5

ende elke spruyte of scote des ackers eer si rees inder aerden: ende eer si groeyde alle dat cruyt des lantschaps Want god en regende niet bouen of opter aerden: ende nye gheen mensche en was die aerde wercken of winnen soude

6

Mer een fonteyn quam opter aerden: ende ververschede alle dat bouenste der aerden.

7

Dus foremeerde die here god. den mensche vanden slime der aerden: ende hi in blies hem in sijn aensichte den adem des leuens: ende die mensche wort ghemaect in leuender zielen.

8

Ende die here god had vanden beghinne geplant dat paradijs der weeldicheit: daer hi den mensche in dede die hi geformeert hadde.

9

Ende die here god dede comen wt der aerden alle schoen hout te sien. ende suet om te eten: ende oec dat hout des leuens int midden des paradijs: ende dat hout der const guets ende quaets.

10

Ende een riuier quam vter stat

[p. *5]

der weeldicheit om dat paradijs te ververschen: die van daer ghedeilt waren in vier hoefden.

11

Der eenre naem is phison Ende loept al om tlant van euilath. daer wasset gout:

12

ende dat gout van dien lande is alte goet. ende daer vintmen bedellium: ende een steen onix.

§ 13

Ende der ander riuier naem is gyon. Dat is die riuier die loopt al om dat lant van ethiopien

§ 14

Ende der derder riuieren naem is tygris. Dese riuier gaet yegens die van assierien. Mer die vierde is eufrates.

§ 15

Dus droech die here god den mensche. ende deden inden paradise der weeldicheit: dat hijt wercken ende wachten soude:

16

ende hi gheboet hem ende seide. Van allen houte vanden paradise eet:

17

mer vanden houte des consten guets ende quaets en eet niet. Want in wat daghe du daer of eten suls: soe sulstu den doot steruen.

18

Echter seide god die here. Ten is niet guet den mensche alleen te wesen: maken wij hem een hulpe hem ghelijc.

19

Als die here god dus formeert hadde. van die aerde alle die beesten der aerden. ende all tgheuogelte des hemels: so brocht hijse tot adam: om dat hi sien soude hoe dat hijse heten soude. Soe wat naem dat adam gaf der leuender zielen: dat is haer name.

20

Ende adam heete mit haren naem alle die dieren: ende alle geuoghelte des hemels: ende alle die beesten der aerden. Mer gheen hulper en wort geuonden adams ghelijc.

21

Daer om seinde die here god vaec in adam. Ende doe hi in slaep was. so nam hi een van sijnen ribben: ende hi veruoldet mit vleysch daer voer.

22

Ende die here god stichtede die ribbe die hi ghenomen hadde van adam in een wijf: ende brochtse tot adam.

23

Ende adam seide. Dit been is nv van minen benen: ende tvleysch van minen vleysche. Dese sal heten manhaghet: want si is van enen man ghenomen.

24

Om dese dinc sal een mensche laten sijn vader ende sijn moeder: ende sal hem houden an sijnen wiue: ende si twe sullen wesen in enen vleysche.

25

Ende beide waren si naect dat is te weten adam ende sijn wijf: Ende si en scaemden hem niet.