Bible in duytsche (Delftse bijbel 1477)

[1]

[p. *3]

1

INden beghin sciep god hemel ende aerde.

2

Mer die aerde was onnut ende ydel: ende donckerheden waren op die aensichten des afgronts. Ende goods gheest was ghedraghen bouen den wateren.

3

Ende god seide dat licht moet werden: ende dat licht wort ghemaect

4

Ende god sach dat licht dattet goet wesen zoude: ende hi sceide dat licht van die donckerheden.

5

Ende hi noemde tlicht den dach. ende die donckerheden die nacht. Ende het wort ghemaect tsauonts ende tsmoghens enen dach

§ 6

Echter zeide god. Het worde een firmametn int midden der wateren: ende hi sceide die wateren vanden wateren.

7

Ende god maecte dat firmament ende hi sceide die wateren onder dat firmament van dien die waren bouen dat firmament. Ende het ghesciede also.

8

Ende dit firmament hiete hi den hemel: ende het wort ghemaect tsauonts ende smorghens die ander dach

§ 9

Echter seide god. die wateren die onder die hemel sijn worden vergadert in een stat: ende die droecheit openbare. Ende het ghesciede also.

10

Ende die droecheit hiete god aerde: ende die vergaderinghe vanden wateren hiete hi zee. Ende god sach dattet goet wesen soude:

11

ende hi sprac. Der aerden groeie groeiende cruyt ende dat zaet maect: ende hout dat appel draghet dat vrucht maket elc na sijnre manieren: wiens zaet sij inhem seluen bouen der aerden. Ende het ghesciede also.

12

Ende die aerde brochte wt groeiende cruit ende dat zaet droech na sijnre manieren: ende dat alrehande zaet hadde na sijn ghedaente Ende god sach dattet goet wesen soude

13

Ende het wort ghemaect tsauonts ende tsmorghens die derde dach

§ 14

Ende god seide. Het worde licht inden firmament des hemels: ende si deylen den nacht ende den dach: ende si sijn in teeken ende in tijden daghen ende iaren:

15

ende dat si lichten inden firmament des hemels. ende sij verlichten die aerde Ende het ghesciede also.

16

Ende god maecte twee grote licten: dat meeste licht om dattet bouen den dach wesen soude. ende dat minste om dattet bouen den nacht wesen soude: ende die sterren.

17

Ende hi settese inden firmament des hemels. dat si lichten souden bouen der aerden:

18

ende dat si wesen souden bouen den daghe ende bouen den nancht. Ende dat si deylen souden dat licht ende die donckerheden. Ende god sach dattet goet wesen soude:

19

ende het wort ghemaect tsauonts ende tsmorghens die vierde dach

§ 20

Oec seide god. Die wateren brenghen voert crupende dieren met leuender zielen. ende gheuoghelte bouen der aerden: onder dat firmament des hemels.

21

Ende god sciep die grote walvissche: ende alle leuende zielen ende beroerlic. die die wateren voertghebrocht hadde in haerre ghedaente: ende alle ghevoghlte in sijre manieren. Ende god sach dattet goet wesen soude:

22

ende hij ghebenedide hem ende zeide. Wast ende wort ghemenichuoudicht ende veruollet die wateren des zees: ende die voghelen worden ghemenichuoudicht bouen der

[p. *4]

aerden.

23

Ende het wort ghemaect tsauonts ende smorghens den vijfsten dach.

24

§ Echter seide god. Die aerde brenghe voirt leuende zielen in sijnre manieren: vee ende crupende diereen. ende beesten der aerden nae haere ghedaenten. Ende het gheschiede alsoe.

25

Ende god maecte die beesten der aerden na haire ghedaenten. Ende dat vee ende alle crupende dieren in sijnre manieren. Ende god sach dattet goet wesen soude:

26

ende hi seide. Maken wij den mensche ten beelde ende onse ghelikenisse: ende hi sij bouen den visschen der zee. ende die gheuoghelte des hemels ende bouen alle beesten der aerden: ende bouen elc crupende dat beruert wort inder aerden.

27

Ende god sciep den mensche te sijnen beelde ende te sijnre gelikenisse: te gods beelde schiep hi den man: ende hi schiep hem een wijf.

28

Ende god ghebenedide hem: ende seide. Wasset ende menichfoudicht ende veruollet die aerde. ende doetse tonder: ende hebt heerscappie bouen die visschen der zee. ende den geuogelte des hemels: ende bouen allen dieren die beruert worden bouen der aerden.

29

Ende god seide. Siet. ic hebbe v ghegheuen alle groeyende cruyt dat zaet brenct der aerden. ende alrehande houte dat in hem seluen heeft zaet na sijnre manieren: dat sij sullen wesen een spijs.

30

v ende allen den dieren vander aerden. ende elken voeghel des hemels. ende allen die beruert worden inder aerden. ende daer leuende ziel in is: dat si teten sullen hebben. Ende het gheschiede also.

31

Ende god sach alle dat hi gemaect had: ende si waren herde guet. Ende het wort ghemaect tsauons ende smorghens den sesten dach.