Berliner Liederhandschrift vom Jahre 1568

[fol. 60r]

[101]

Ein annder

Mein hertzigs lieb,
ich mich stetz ieb,
nach dir jn allenn erhe,
Aůch einiger trost,
mein hoffnůng groß,
hertzlich zů dir thůitt kerenn,
Darůmb ich kein tag,
aůch wieder nachtt,
ohn dich kan raůwig pleibenn,
allein dů mich,
erfrewest hertzenlich,
von mir thůe dů nitt weichenn.

Ach Jůngelinck rein,
das hertze mein
thůitt all so gar versinckenn,
Aůch wen dů wist,
wie mein hertz ist,
nach dir wůrstů dich krencken,
hertzliebster gesell
von mir nitt stell,
gned machs dů hir woll finden,
wan mein gantz hertz,
vor grossem schmertz,
will mir nach dir verschwinden.

Schone Jůnckfraw
mir aůch vertraw,
als ich dir thůn sagenn,
Nůr dir allein,
Jn treůwenn mein,
Darůmb thůns heimlich wagenn,
ohn argeliste,
dů bei mir bist,
dweill mir daß lebenn haben,
Den willen dein,
setz gar darjn,
Darmitt mein hertz wůrst habenn.

Hilff Venůs schier,
Jn rechter gir,
Jn lieb hast mich verstrickett,
Wan ich ansehe
dich jungelinck hie,
So ist mein hertz erqůickett,
Sweig dů nhůr nů still,
Dir wůrtt dein wil,

[fol. 60v]

 

nach deinem hertzenn erscheinen,

 

allein mirck mich,

 

das du aůch dich

 

der erhe thůist nitt verneinen.

 

 

 

Hertz Jůnckfraw zartt,

 

weiblicher artt,

 

dir gib ich mich vůr eigenn,

 

glaub dů mir,

 

dů hochste zeir,

 

von dir will ich nitt weichen,

 

Daraůff auch ich,

 

hab stettigs dich

 

den kuiß will ich dir gebenn

 

ein kronn gůitt

 

hab gůtenn můitt,

 

Dweill wir haben das leben.

 

 

 

Hertz Jůngelinck schon

 

dir underthan,

 

mein lieb dir hir můs werden

 

Jn warheitt sag

 

das ich mein tag

 

kein lieber gehabtt aůff erdenn,

 

Darůmb Jůngelinck miltt,

 

thů waß dů wiltt,

 

mein leib, thu ich dir gebenn,

 

Von dir allein,

 

hertz lieb zu sein

 

Jn allem meinem leben.