Berliner Liederhandschrift vom Jahre 1568

[fol. 48v]

[79]

Ein annder

Es iagtt ein ieger woll gemůtt,
ehr iagt aůff frischem freiem můth
ehr iagtt aůff breiter heiden,
ehr iagtt demselbenn thirlein vill
mitt seinen schnellenn winden ja winden.

Ehr iagtt vber berg vnnd thieffenn thall,
vnter ein staůdenn vnnd vberall,
sein hornlein thett ehr blasenn,
sein lieb vnder einem staůden saß
thett aůff den Jäger losenn.

Er schwenckt sein mantell jn daß grone graß,
ehr batt sei daß sei zv jm neder saß,
mitt weissenn armenn vmbfangenn schonn,
so gehab dich well, mein trosterjnn,
nach dir steitt mein verlangenn.

Hatt vnß der reiff, hatt vns der schnehe,
hatt vns erffrortt die grůne klee,
der blůmlein aůff heidenn
wo zwei hertz leib seindt,
Die zwei soltt niemans scheidenn.

[Spreuk]

Schweig vnnd leitt,
Mirck vnnd mydtt,
Weß fromb mitt erhenn
Des kann nemantz verkerenn.