Berliner Liederhandschrift vom Jahre 1568

[fol. 13v]

[22]

Ein annders

Vonn edler artt,
ein frewlein zartt,
bistů ein kron,
der ich mich han,
ergebenn gar,
gleub mir fůrwar,
das hertz jn mir,
krencktt sich zů dir,
darůmb bitt ich,
aůff deine ehr,
hilff mir zů dir,
ich hab nitt trostes mehr.

Wie ich jm thůe,
hab ich kein r[e]w,
nach deiner gestaltt,
die mich mitt gewaldtt,
gefangenn hatt,
hertz lieb gib rath,
vnnd das ich mich
zů dir versprig,
anders ich jn,
ander hoffnůng foernim,
hertzlieb setz mir ein guedigs zill.

Wantt dů die bist,
nach der ich list,
nitt braůchenn soll,
das weistů woll,
ahn allenn schertz
will dir mein hertz,
Jn trewen sein,
darůmb ich dir,
kein stůndt jm tag,
vor leidtt vnnd clag,
aůß rechter lieffdenn vergessenn magh.

[Spreuk]

Hern gůnst vnnd Aprils Wetter,
Junckfrawen loff vnnd rosen bletter
Kartenn vnnd wůrpell spill,
verlauffenn sich dick vnnd vill.