Berliner Liederhandschrift vom Jahre 1568

[fol. 4v]

[6]

Ein annder Jm thon Wach aůff mein hortt

Jn drůck vnnd schmertz,
mein Junges hertz,
wirtt nhu ohn schuldtt geqůeltt,
das thůitt allein,
die trewe mein,
so vast aůff dich gestellet,
Jn rechter liebt,
vnnd anders nitt,
hab ich dich hertzlieb erwelett.

Dein ehr vnnd zůchtt,
gar woll versůchtt,
darzů dein freůndtlichs wesenn,
hantt mich verstricktt
Jm aůgenblick,
das ich nitt mochtt genesenn,
Dů hets dann dich,
zů mir verplichtt,
vnnd ganntz jn lieb ergebenn,

Ob sei nů wirdtt,
důrch kleffers gefertt
arßlig vonn mir sich kerenn,
Vnnd sich ergeb
jn frembde lieb,
es kůndtt jr nemantz werenn,
es ist mein schůldtt,
ich drag gedůldtt,
vnnd drag heimlich groß leidenn.

Der trawe mein,
mogt keinenn schein,
bei dir hertzlieb erhaltenn,
vnnd was ich saght,
wardtt als verdacht,
die liebde woltt sich spaltenn,
Das důrch argwonn,
liebde soltt zergan,
es bethrůbt mich von hertzen.

Jch klag vnnd rew,
mein liebt
soll gantz vnd gar verloren sein,
vnnd gleub das schonn
mein glůck mein haab
sthen vergessenn
kann mir kein trost ermessenn,
Dan das die alte seitt,
ein saw achtt kein můscatt nitt.

[fol. 5r]

 

Eß thůtt mir antt,

 

das vnerkantt

 

soll werdenn mein getrewer will,

 

denn ich jn still,

 

vor andern dir erzeige,

 

keiner sich mehe

 

so eigenn ergebenn hatt,

 

mitt sulchem fleiß

 

es wirdtt kein rap von baden weis.

 

 

 

Vnd ob ich wehr

 

vil falscher mehr,

 

vnnd vngetrewer als Judas was,

 

so mein ich das

 

es mogtt nitt vbeler werdenn,

 

gelontt aůff dieser erdenn,

 

Jch hoff der zeitt

 

folg schier hernach,

 

vntrew threibtt seinem hernn nach.