Berliner Liederhandschrift vom Jahre 1568 (1568)

Berliner Liederhandschrift vom Jahre 1568

(1568)–Anoniem Berliner Liederhandschrift vom Jahre 1568– rechtenstatus

Auteursrechtvrij

Vorige Volgende


[5] Ein anders Nach willenn dein, ich mich dir allein, Jn trewenn thů erzeigenn :/: Fůr all aůff erdt bistů mir werdt, vnnd gib mich dir zů eigen, Gantz jn dein pflichtt, der zůůersichtt, Las dir mein dienst gefallenn, glaůb mir fůrwar, Jn frawenn schar, liebstů mir ob Jn allenn. Bei deiner gestaltt, wůnsch ich offt baldt, Zů sein jn lieb vnnd erhen :/: Da hett mein hertz, freůdt lůst vnnd schertz, recht lieb vnnd trew zů merhenn, On all verzick, hilff rath vnd schick, bedarffstů nichtz bedarffenn, Vnnd das das glůck kem, das ich dich nem, wůrdt sein bei mir verborgenn. Lebenn bei dir, er alzeitt mir, fůr alle
[Folio 3v]
freůndt aůff erdenn, Beger offt der stůndt, darjnnen dir kůndt, meins hertzen geheim mocht werdenn, Dan ietz vnnd ehe nach dem a.b.c. liebt mir der bůchstab zů thragenn, Denn dein leib sach, vnnd daraůff sprach eß wůrdt baldtt vierhe schlagenn. Wie offt aůff mich, feltt neidt vnnd haß, dennoch kan ich mich tůckenn, Wens regenn wehr, so wůrdt ich nas, das ich also pleib thrůckenn, mircks woll vnnd schweig, můß haben scheir, biß ich bas kom aůß sorgenn, ich schencks nitt gar, wiewoll ich zwar, die schůldt ein weill moß borgen. Neidiger stich der leidt ich fill, mitt vntrew woll gespickett :/: als wen beim tag aůßfliegenn will, ein eůll sie baldt erblickett Der fogell stůtz, so ist ehr nůtz, nitt grosser den zů fliegenn, sůnst wirdt den hůpfft vnnd dortt gerůist, glůck mags woll besser fůegen. Allso geschicht mir mannichmall, gleich wie armenn eůlenn, wen sichs begibtt Jn gleichn fall, das aůsfliegenn bei weilenn, můss leidenn vill, nidiger stich ohn zill, von mannicherlei gefugell, forchtt kein so gar, als
[Folio 4r]
denn adeler, der zůreist mir meine flugell. Vnnd machttt das ich nitt kan, mich jn der hoch aůffschwingenn, wiewoll ich jm kein leidt hab than, thůtt ehr mich doch fast zwingenn, floch hoch ob mir, ich hoff gar schier, wirdt ehr sich zů mir lendenn, vnnd mich als dann, dem ich gůetz gann, Jn sein gůnst widder nhemen. Dann ich bin ie, nitt Eůlen geschlechtt, das alle vogell neidenn, Sunnder frůmb, schleichtt vnnd ohn gepeichtt, Mein hertz als arges meidett, tregtt wienig fůr, als ich woll spůer, wer nitt kan gelerntt versetzenn Vnnd dann allein nichtz denn frůmb sein, thů[n]tt hern jetz lichtt schertzenn. Dar ich gerne wer vnnd nitt en moitt, Dar wer mir ein getrewer botte gůitt.

Vorige Volgende