Tot den Leser.
Goedertieren Leser, ick heb in die iaren voorleden, niet sonder mijnen grooten arbeyt ende oetmoetheyt, verghadert ende versaemt menigherhande beproefde recepten, die welcke moghen leeren een groot ghetal van schoone secreten. Ende die voorscreuen secreten ghetoont ende versocht, met sommige van mijnen vrienden, die hebben mi in 't leste ghebeden, ia bedwonghen, om dat ghemeyn profijt, die te doen printen ende in forme te stellen, op dat si ende alle der seluer gelijcken, die genoechte hebben ende behagen in alsulcke eerlijcke dinghen, die Copie daer af mogen hebben. Ende also wilde ic onderdanich zijn haeren goeden begheerten, so hebbe ic my beraden mijn voorschreuen receptboecxken te doen printen van 't welcke (na mijn aduijs) een yegelijc sal moghen ontfangen groot profijt ende ghenuechte, ende sal dat selue tractaet ghedeylt zijn in drie deelen.
In dat eerste sullen ghescreuen zijn menigherhande seer nutte recepten, van die welcke men sal moghen eenich vermaeck hebben ende ghenoechte, alsoo men in 't lesen breeder beuinden sal.
In dat tweede sult ghi gescreuen vinden een groot ghetal van schoone ende edele secreten, aenghaende die conste ende compositie van menigherhande soete ende conforterende rueken.
In dat derde ende laetste, sal men tracteren van sommighe secreten behoeffelijcken der ghesontheyt des menschen lichaems, die welcke niet soo cleyne en zijn, si en zijn wel eenen grooten schat weert. Want voorwaer, sonder die grote secreten van die conste der medicinen, sonder twijfele soude onse leuen veel corter zijn, daeromme, beminde Leser, neemt waer te leuene ende dy in gesontheyt te onderhoudene.
Auteursrechtelijk beschermd