Ars moriendi

§ Die woninghe der heyligher martelaren.

DAer nae is die andere woninge der heyligher martelaren int chore cherubin. Want cherubin is een volcomen doerlichtinghe des godliken ansichtes daer hem die heylighe martelaeren in verbliden. want si hoer bloet in die godlike liefte onschuldelick wt ghestort hebben ende verduldich zijn geweest in allen horen liden Ende voer die ghene ghebeden hebben die hem liden an deden ghelijck als xpristus ihesus dede anden cruce daer omme hebben si verdient die crone der cherubinnen

§ In dese woninghe horen oeck alle die gheene die in horen herten ende sinnen menigherhande liden hebben ende veel onweerdicheyden liden moet ende verduldich daer in zijn ende dancken gode in horen liden ende droefenisse. Ende oeck die ghene die van herten medeliden hebben mit horen naesten die si weten in droefenissen ende in liden. Ende oeck die ghene die hoer vianden liefhebben ende bidden gode voer die gheene die hem haten ende castijen sonder schult Dat dit waerachtich is betughet die hilighe man sinte Augustinus. Bernardus ende Cypryanus. Want daer zijn zere veel groter martelaren die meer lijdens inder sielen gheleden hebben. dan of si hoer bloet wtghestort hadden.