Ars moriendi

[fol. 85v]

§ Mit wat loen dat die salighe werden gheloent

Inden hemel hebben sommighe sielen.xxx fout loen. als gheechte luden ende anderen hoers gheliken die mit dat heylighe kersten gheloue. ende mit eenuoudicheyt dat ewighe leuen verdient hebben.

Sommighe hebben. lxfout loen als weduwen die hem god gheheel ouerghegeuen hebben. ende hoer goet salichlike deylen den armen. ¶ Sommighe hebben hondertfout loen. als die reyne maechden die hoer lichaem al hoer daghen in godliker hoeden ghehadt hebben.

Dat dit waerachtich is betughet Theophilus ende het hout mit hem die glosa op sinte matheus euangelium. Ic segghe dat dit groetste loen des ewighen leuens niemant ghegeuen en wordt dan den salighen die de crone verdienen.

Ende dat zijn drierhande menschen, als martelaren. maechden, ende leerdaers. Want die martelaren verwinnen die werlt ouermits horen liden. die maechden verwinnen hoer eyghen vleysch in aenuechtinghe. Die leerdaers verwinnen den bosen gheeste mit godliken lere aen hem seluen ende aen anderen menscen Ende daer omme vercrighen si die croene des hondertuoudighen loens. Want si zijn broederen ons heren ihesu xpristi Si zijn oeck die ghene dye den menschen die in der werlt zijn die waerheyt predijken ende leren ende wisen. ende si werden gheloent vanden ghenen die sine martelije heeft gheleden omme des menschen wille. die oeck maechdelike reynicheyt oefende bouen alle menschen. ¶ Ende daer omme soe wie die werlt laeten wil ende zijn eyghen lijf haet ende den bosen gheeste dats die duuel vander hellen verdrijft vanden menschen mit godlike leringhe. die verdient die crone des hondertuoudighen loens int ewijghe leuen. ¶ Hier af seyt ons here ihesus xpristus in eenre Omelien vanden twalef apostelen. O minnende siele neemt waer dat die wtuercoren heylighen godes hoer lijf te samen in horen geest steruen wanneer si den bosen gheeste dats den duuel vander hellen weder staen. ende crachtich werden in doechden. ende versmaden tijtlic goet ende idel dwase genoechte deser werlt omme te ghewinnen dat hemelsche goet. si prediken mit den woerden ende tonent mitten wercken ende en laten hem ghenen arbeyt verdrieten ende daer omme wordt hem ghegeuen dye crone des hondertuoudighen loens

Ten zijn niet alleen martelaers ende dese crone weerdich te besitten die hoer bloet wtghestort hebben naden lichaem Sij en moeten inwendich oersake hebben. dat si dat doen omme die liefte xpristi. ende omme dat heylighe kersten gheloue Dit sprect sinte Iheronimus vanden leuen des alre glorioesten ende heylichsten apostels ende doctoers pauli. die een vat was vol alre godlicker leren in een epistolen daer aldus ghescreuen staet. Dat

[fol. 86r]

Ende daer omme raet sinte Augustijn den menschen inden boecke der kersteliker lere ende sprect aldus. Een heylighe maghet en sal niet hebben crom ghesichte met horen oghen. ende en sal niet veel woerden hebben. si sal schamel wesen in wercken ende in ghelate ende stedech. alsoe dat hoer lichaem si een forme ende een figuer der sinnen soe mach si dan te bet die croen des honderuoudighen loens verdienen. want een maghet die ydele van ghelaet is. die is recht als een vat dat clinghet ende van buten schint datter wat in is ende nochtans van binnen idel is. ¶ Sint Augustinus, ende sinte Ambrosius spreken inden boeke vanden maechden. Die nu een maecht is alleen inden lichaem ende niet inder herten. die en mach dit costelike loen niet verdienen. Ende hier af sprect Isidorius inden boecke vander hoecheyt godes. Die nu maechden zijn mit herten mit wille. ende mitten liue die volghen nae dat lam godes inden ewighen leuen. Sinte Iohannes seyt. Dese croen wort oeck ghegheuen den goeden wijsen gherechten leerrers daer omme want si die duuelen ende die bose gheesten vanden menschen ghedreuen hebben mit horen godliken ende goeden ingheuen. ¶ Dat dit waerachtich is, betughet die heylighe man sinte Rijchardus inden boecke benyamins. segghende aldus. Ick en weet niet oft die mensche in desse teghenwordige tijt costeliker gauen van gode ontfanghen mach dan dat god hem die ghenade ende dat verstant verleent. dat hi mit sinen doechden ende mit sinen godliken onderwisen enen mensche brenghet van sinen ondoechden ende van sinen quaden werken. Ofte die van duuelschen sinnen godes kinder maken. Tis sonder twiuel alle die ghene die dit doen die zijn weerdich ghecroent te werden mit die crone des honderuoudighen loens. Want hij en weet niet dat dusenste deel ho anghenaem dat god is. die enen quaden mensche brenghet tat goeden leuen

Des ghelikes sprect sinte Gregorius in sinen boecken Het is een veel groter teken ende wonder dat een leerre mit sinen woerden ende mit zijnen ghebeden enen zunder bekeert van sinen sunden. dan dat hi enen doden leuendich makede.

¶ Hoe schoen hoe heerlick. hoe rijckelick hoe machtelick ende cierlick den saelijghen zijn verdiende werck inden ewigen leuen wesen sal dat en mach gheen mensche begripen. Ende het is een cleyn ende een wenich ghelikenisse. daermen daer af scriuen ofte segghen mach. teghen dat die salighe ende wtuercoren vrienden sien inden spieghel des godlicken moghentheyts Ende sien daer in ende vinden god volcomelick ende bekennen hem als enen coninck des hemelschen houes.¶

O wie soude dese glorie moghen bescriuen. Voerwaer niemant. Mer nochtans moetmen daer een wenich af scriuen op dat die menschen daer soeticheyt in crighen. ende op dat si daer vromelick omme arbeyden.