Ars moriendi

¶ Vanden ghenoechlicken zoeten sanc die inden ewighen leuen is

TEn anderen mael werden die wtuercoren sielen verblijt mit zoeten sanck. want die zoete melodie die inden hemel is die is onsprekelick. Die heylighe enghelen singhen daer soe genoechlick mocht een mensche alsulcken sanck eens horen. Iae al waer hi die alre rijcste coninck die ye in der werlt quam oft vmmermeer comen mach. sonder twiuel hij soude willichlike ouer gheuen al sine rijcdomme omme dezen ghenoechliken sanck te horen. Want al die zoete stemmen die inder werlt zijn en hebben gheene ghelikenisse bi dezen sanc der genoechliker enghelen. ¶ Si hebben al sulke vroude in alderhande spel. In organen. In simbelen. In psalterien. in herpen. in luten. ende in ander spelen die alsoe ghenoechelick luden dat hem dunket dattet soete gheluyt bouen gaet alle ander ghenoechten die si hebben.

¶ Die heylighe enghelen spelen op desen spelen zoe ghenoechlick datmen dat dusenste deel niet wtspreken en mach.

¶ O onbegripelicke ghenoechte ic hope dat alle kersten menschen in dij begeren sullen ewelick te leuen. Iae ic hope ende tis zonder twiuel dat nyemant buten dezer vrouden ghesloten en zal werden Ten waer sake dat hi hem zeluen daer buten beslote mit sinen sunden. alst nu god betert dick ende menichweruen gheschiet. Daer omme die hem zeluen dus qualiken regeren dat si deze vroude niet ghebruyken en moghen dat en zijn ghene kersten menschen. mer duuelsce menschen. want hadden si ghedaen als kersten menschen toe behoert. si en worden buten die vroude niet ghesloten

¶ Hier omme moeghen die menschen wel toe sien dat si hem zeluen wt desser onsprekeliker vrouden niet en besluten. Ende dit machmen alte lichtelick beteren want die vroude te verdienen dat is den menschen ghenoechelic ende goet te doen Der werelt te dienen ende den duuel. dat is zeer zwaer ende bitter. want als die mensche in groten zunden staet soe heft hij altoes een wroeghen in zijn herte ende nummermeer en is zijn herte te vreden. want hem gruwelt voer die grote pine der hellen. Mer als een mensche gode dient zoe is hi altoes blide van herten. ende ouerdencket die vroude die hem aenstaende is nae dezen leuen Ende hier om is dat hemelrike lichter te verdienen dan die ewighe pijne.

¶ Ten derden male zal die zalighe siele hoer verblijden in dat ghenoechlijcke gheselschappe des ewighen leuens

¶ Ende hier af sprect die heylighe man. sinte Ancelmus tot zijn siele segghende

[fol. 73v]

¶ O mijne siele al zouden wij ontsprekelike pijnen lijden. Iae al souden wi langhe tijt die gruwelike helsche pine moeten besoecken. op dat wi xpritsum sien mochten in sine glorie ende dat wij sine glorie oeck mede ghebruken mochten. waert niet ghenoechlick daer pijn ende verdriet omme te liden

¶ Hier af sprect die heylighe apostel. sinte pauwels segghende. Quis nos separabit a caritate xpristi Dat is te segghen. Wie zal ons afscheyden moghen van die liefte godes. Niemant. want wij en ontsien gheene zweerden. noch persequeringhe noch enighe tormenten diemen ons aen doen mach

¶ O mensche houdet deze lere in memorien. ende weest oetmoedich in uwen lijden. want deze heylighe mannen hebben zoe veel omme die minne xpristi gheleden ende nochtans al dat si leden was hem soet. ende zij begheerden altoes van gode dat hi hem meer pijnen ende lijdens toe seynden woude. ¶ Want si wisten wel hoe si meer omme godes wil leden soe hoer ghenoechte ende vroude int ewijghe leuen grooter ende menichuoudigher wezen zoude. ende want een yeghelick begheert dat meeste loen bij gode te hebben ende daer omme begheren si van gode dat hij hem veel liden toe seynt op dat hoer vroude ende ghenoechte inden ewighen leuen te groter wezen mach

§ O mensche wanneer v god lijden ende verdriet toe seynt soe en begheert vmmers niet dat v pijne vermindert mach werden. mer begheert van gode dat hi v noch meer pijnen ende lijden toe seynt. op dat v vroude ende ghenoechte int ewijghe leuen oeck meerre wezen mach

Want die pijne diemen liden mach dye en is niet te noemen bi die onsprekelike vroude diemen daer voer hebben sal